念A-Z 05/May/09 (二)

尋日去咗診所拎晢晢份報告, 喺等姑娘叫名時, 婆婆突然同我示範, 喺少少提水o既情況下, 晢晢居然可以由A念到Z!! 我睇見都嚇咗一跳!!!

 

其實晢晢早前已可以冇甩碌咁由A念到G, 估唔到幾日間已經念到Z~!

 

今日同班0712媽媽提起呢件事, 有人話我知原來由A念到Z應該20個月先做到~! 晢晢, 你仲有幾日先17個月咋wor~~~ 嘩~! 你咪好勁~!? 哈哈哈~!  

 

 

晢晢扭偒腳 (4)

剛過去o既星期六係媽媽生日, 但媽媽因為擔心晢晢隻腳都冇乜心機慶祝…

 

其實晢晢隻腳自上星期五已好轉咗不少, 不過我星期一仍然有帶晢晢去健康院見姑娘, 但都冇咩嘢做到, 只再約14號再返去見醫生…

 

兒科果度仲激死我!! 明明話星期一拎報告, 星期日打去double check佢就叫我星期一朝再打去問過, 到我星期一打去, 又好無禮貌咁答我…

 

姑娘: 咁早人哋未開工check唔到過wor..

我: (真係火都嚟!) 係你哋尋晚叫我朝早打嚟check架, 而家又話未知!?

姑娘: 你下晝再打過嚟啦…

我: 我12點去健康院我想拎埋張x-ray去!

姑娘: 12點張片應該未到…

我: 而家先同我講未有!?

(下冊100字)

 

到4點幾個姑娘再打畀我… (我都去完健康院)

 

姑娘: 張片今日一定到唔到, 最快聽日, 最遲後日, 到咗通知你…

我: (我都冇佢咁好氣) 咁麻煩你打去叫佢一定聽日要有…

姑娘: 呢個唔關我哋事, 總知到咗通知你…

我: (愈聽愈火!) 係你哋個醫生轉介我去呢間照架嘛! 係你話最快可以聽日架嘛!  我而家就麻煩打去同佢講呢個係urgent case, 聽日一定要有!

姑娘: 佢遲咗我哋控制唔到, 總知到咗通知你…

我: (頂你個x!) 你究竟聽唔聽得明我講咩? 你叫另一個姑娘同我講!!!

 

之後佢pass咗個電話畀一個正常o既姑娘, 姑娘B就應承我會同我打去追! (咁先係架嘛!)

 

到今晚放工後去拎咗報告, 醫生話盆頭冇事, 終於鬆咗口氣~!

 

晢晢, 你唔好再嚇我喇~! 以後行路唔該小心D啦~! 知唔知~!?

年年牛一都係咁, 是咀咒麼!?

5月2係我生日, 很特別, 特別唔開心...

其實年年都係咁, 有少少唔開心, 但今年... 真的很"特別"...

近來發生豬流感, 佳既工作有關, 喺我生日當日佳都只掛住隻"豬", 連一句"生日快樂"都冇... 只不斷問我: 好唔好出灣仔? ("疫區")... 我知即使我話唔好, 要佢留喺度陪我同晢晢去街食飯... 佢或者會留低, 但佢個心都只會掛住灣仔... 所以我答佢: 早D出去啦! 遲咗咩都做唔到...

佢有話: 帶埋BB一齊出, 我做完嘢一齊食飯? 我話: 疫區... 我唔想帶BB出去, 我一個留喺屋企揍BB冇問題... 佢就出咗去...

我一直有個生日願望, 就係生日可以做一日大爺, 可以有人幫我煲粥, 餵B, 做家務... 我一直都收喺心, 諗住一家人分工合作冇問題, 生日, 食餐飯就可以了... 點知生日呢日特別辛苦, 特別寂寞...

我明白佢緊張工作, 或者你同我講句"對唔住老婆"我個心冇咁難受, 但佢冇... 或者佢把口講句"生日快樂"我都冇咁難受... 但都係冇...

喺佢做完嘢返泥, 佢買咗D外賣, 兩件西餅, 一個似乎臨時臨急買返泥既AGNES B"奶粉袋"同手鍊畀我... 我話: 都話唔駛買, 佢就話: 生日嘛... 就冇講乜嘢...

其實我一直都唔鍾意大搞, 我認我講過"唔駛做咩慶祝, 食飯可以了", 但唔表代我唔駛被尊重... 我, 2009年5月2日, 只喺屋企坐咗一日監, 食咗外賣同各自各食咗件西餅就告一段落... 沒一句"生日快樂"... 他, 有尊重我麼!?

"生日快樂"要講出口都好諷刺, 這樣的生日都可以說成"快樂"!? 或許佳不好意思說出口吧~!  

其實我係可以發爛, 我個心好想好想摌到佢上天花板... 但我咩都冇表示, 仍然笑面迎人... 我知佢呢排好緊張佢工作, 佢份人顧唔到咁多範(包括我開心唔開心)... 我, 可必畀壓力佢!?

呢晚, 佢瞓得好好, 達上床就瞓到變豬.... 我, 失眠了... 我呢咗喺toilet喊咗一晚, 佢都冇發現... 第二日教會朋友問我點解咁冇心機, 我只講: 冇, 攰啫...

我心裡好唔開心, 好想話畀人知我有幾唔開心, 但總要留他一點面子, 所以我冇跟任何人提過半句... 星期日教會有人多口問: 2號去咗邊度慶祝!? 我只笑笑口答: 冇呀... 追問時我扮聽唔到就走開咗...

呢種無可奈何既口是心非就快令我精神分裂...

The ABC Song

晢晢B係一個愛唱歌o既BB, 其實一早已經會唱THE ABC SONG, 不過一直拍唔到呢個珍貴片段, 今日終於好難得咁拍完成首歌先搶電話, 大家一齊欣賞下晢晢o既歌喉啦~!