又開學啦 - 幼潛第一堂 (14個月)

冇見班同學仔三個多月, 終於可以再次聚首一堂啦~~ (係十堂至真~! )

因為啱啱先過完新年, 各位靚女同學紛紛相約穿靚靚唐裝出席~!

而晢晢呢~~ 雖然冇唐裝,  但都唔執輸著咗件老西襯返班靚女~~

晢晢: 呢張相除咗影得我靚仔外, 仲同我背後o既媽媽好似樣~!

"R"腳紳士

到正式上堂喇~! 同上一期差不多, 先唱上堂歌 + 個小搖鈴,

不過呢期要求高咗, BB要坐定定喺凳仔上, 而唔再坐地下~!

到交玩具時, 又提高咗要求, 就係要等到導師叫名先可以離開坐位, 未叫到你就唔可以郁!

當未叫到晢晢時, 晢晢真係坐得好定, 直到梁EE叫 "彭翱晢",

晢晢就起身向前行幾步, 然後將手上玩具交到梁EE個玩具籃中...

之後梁EE叫晢晢: "好! 返埋位", 晢晢就真係好乖咁返埋位!

媽媽見到晢晢表演真係好感動呀!

因為從來冇諗過14個月o既晢晢會做得到咁複雜o既指令~!   

之後梁EE再唱另一首歌仔, 要邊做動作邊唱(大人唱)...
 
"摸摸頭, 摸摸耳, 一直摸到小腳指~~~"

藉以教曉BB認識身體外, 仲鍛鍊BB蹲呢個動作~~~

晢晢要跟梁EE時先肯做...

跟住有障礙賽玩, 晢晢表現唔錯啊~!

好期待下一堂o既來臨~!

小晢返學喇 - 幼潛第十堂 之 畢業 (11個月)

話咁快就到最後一堂, 真係極度極度極度唔捨得... 今日媽媽o既心情都好忐忑呀~!

今堂冇堂上, 只做評估, 晢晢表現不過不失...

挑戰1: 聽指令"擺"放通粉入杯 --- 過關冇難度~!　

 

挑戰2: 聽指令"擺"放數粒積木入杯 --- 同樣過關冇難度~!　

挑戰3: 連續接3支棒狀積木--

喺接第3支時晢晢未能如預期般先將第二支交到其中一隻手後再接下1支,

而係放低其中1支然後再接, 所以挑戰失敗...

 

呢次參加幼潛對我得著好大, 尤其媽媽真係咩都唔識,

喺呢度有導師指導同提點下, 媽媽喺教導上真係有方向咗好多!

亦都提醒咗我喺唔同階段要同晢晢鍛鍊唔同o既嘢!

每當晢晢達標時, 我同晢晢都好有滿足感同成功感!

今日晢晢畢業啦, 真係好唔捨得一班咁可愛o既同學仔, 希望我哋快d有機會再聚啦~!

點點滴滴...

小晢返學喇 - 幼潛第九堂 (11個月)

呢日其中一個項目係疊廁紙, 因為身高所限, 晢晢最多只疊到3舊咋...

 

另外又學咗過火圈(係呼拉圈先啱), 目的係令BB學會當遇到障礙物時懂得跨欄同縮低個頭...

不過晢晢都未識行, 所以都未知佢算做到定做唔到~!?

今日仲好難得咁同曈曈合照~~ 嘩! 曈曈高成半個頭咁多, 晢晢你唔再努力點追到曈曈呀~!

今日有一件事好感恩, 因為一直晢晢喺學行方面都冇乜進展,

今日喺feedback時我同梁ee提起, 梁ee就示範咗一個方法畀我,

晢晢竟然喺梁ee既示範下行到幾步!

媽媽開心到想喊啊!

感謝主!




小記: 一個桶, 小朋友就玩到傻咗~~

 

小晢返學喇 - 幼潛第七堂 (10個月)

因為今日下晝要出席萬聖節Party, 所以特登為晢晢預備一身魔鬼面孔(一對嘩鬼角)+天使裝束(純白襯衣), 點知同學仔o既媽咪話我知原來晢晢果件係女仔衫... 真係唔講唔知...

晢晢: 媽媽做乜你又同我扮女仔呀?

今日除咗晢晢仲有兩隻小鬼, 分別係Anna鬼同嫣嫣鬼~!

今堂其中一個項目係舀通粉, 晢晢都舀得唔錯架~ 今晚買返包喺屋企玩吓先~!

 

 

另外仲玩咗<奇妙旅程>, 即爬假草, 石春路等藉以刺激BB既觸覺~!

晢晢表現唔錯, 毫無懼色爬完成整條障礙~!