德怡PLAYGROUP – 第10堂 06.03.10

話咁快就嚟到最後一堂喇, 初初參加呢個playgroup既目的係為咗畀晢晢適應學校, 轉眼晢晢已經返咗學個半月lu…  

今堂做過d乜呢?  

Ms. Anna 一開始就講咗個caterpillar 變成 butterfly既故事, 晢晢都幾留心聽, 其間Ms. Anna問佢隻caterpillar係咩色晢晢又好大聲咁答「GREEN」, 證明佢有聽書~ 哈哈~!

之後唱咗幾首歌, 包括BUTTERFLY同IF YOU’RE HAPPY, 兩首都係晢晢飲歌, 所以晢晢好投入, 邊唱邊跳~!

 

到茶點時間, 今堂食香蕉蛋糕, 晢晢好鍾意, 大大啖咬~! 食完又係好乖仔自己收拾餐具, 仲想執埋隔離位果D, 好在媽媽及時制止!

是日圖工 – BUTTERFLY

 一小時課堂好快就過, 因為今堂係最後一堂, 所以有頒發證書時間, 晢晢跟Ms. Anna合照…

 每次唱GOODBYE SONG晢晢都會好投入, 媽媽仲留意到即使老師未示範晢晢都識得跟住歌詞做, 好叻仔! 每次媽媽都好想拍低佢, 可惜媽媽部電話冇拍片呢個功能, 今堂點解拍到!? 因為爸爸陪足全程lor~! (呢日爸爸晏咗返工呀!)

10堂轉眼就完結, 呢個幫助晢晢適應學校生活o既playgroup可謂功成身退。如果問媽媽晢晢喺呢個PLAYGROUP學到D咩!? 講真, 又數唔出幾多… 唔係話呢個PLAYGROUP唔好, 而係內容對晢晢來講比較淺, 好多東東喺晢晢上呢個PLAYGROUP前都己經學會, 所以晢晢表現會看似較為突出~!

不過呢個參加呢個PLAYGROUP都唔係完全冇得著, 起碼上完呢10堂後可以肯定晢晢係唔怕外籍人士之餘, 仲懂得用英文同老師溝通!  

另外, 媽媽覺得Ms. Anna 好有愛心, 雖然而家N1冇教晢晢果班, 但朝早返到學校, 遠處見到晢晢都會特登走過嚟hug下晢晢~! 所以可以遇到呢位好老師都係一個好大o既得著~!

隨住「幼兒樂園」同「德怡PLAYGROUP」完結, 嚟緊o既weekend都係沒有playgroup的日子, 媽媽要花更多心思為晢晢預備節目喇~!

德怡PLAYGROUP – 第9堂

一開始Ms. Anna就講咗個有關母子之間同朋友之間o既愛o既故事, 之後又唱咗「I Love you, You Love Me」, 又介紹咗形狀heart, 圖工又係用heart shape所做… 所以呢堂o既主題應該係LOVE & HEART… 

不過晢晢喺呢堂就特別冇乜愛心喇, 唔知點解有位同學無辜成為晢晢目標, 上上下堂, 晢晢突然好熱情咁走咗埋去攬住人, 對方企唔穩就成個向後撻喺地!! 晢晢再成個人拃上去!!! 好在地下有軟墊, 冇乜損傷, 但可憐o既同學仔就嚇到鼻哥loan都冇肉! 而晢晢呢, 好似冇事發生咁, 繼續自得其樂…  

過咗一陣, 晢晢又想攬人哋, 但對方怕鬼咗佢, 自衛式用手拍咗晢晢個頭一下, 點知晢晢「還拖」! 一巴打落人哋塊面度!!! 媽媽連忙跟對方爸爸道歉, 然後捉埋晢晢埋一邊好好教訓一番!!! 之後再要求佢同對方SAY SORRY同呵返人哋, 好在仲肯照做… 如果唔係, 真係失禮到貼地…

今堂D相唔知去晒邊, 爸爸, 快D搵返出嚟畀媽媽啦!!

德怡PLAYGROUP – 第6堂 - 06.02.10

剛過去o既星期六媽媽要返工, 婆婆又要準備當晚做節o既餸菜(提早食團年飯), 所以呢堂PLAYGROUP就交由爸爸單拖負責~!

爸爸知道媽媽緊張晢晢情況, 所以影咗d相, 又拍咗d片, 又自動自覺一五一十講晒上課程情況畀媽媽知…

據爸爸講, 今堂主題係CHINESE NEW YEAR, Ms. Anna分別邀請咗不同o既同學扮演十二生宵動物, 晢晢擔任TIGER~! 一向唔鐘意放嘢喺頭上o既晢晢(eg: 帶帽), 呢日竟然肯帶上TIGER頭圈, 然後跟住Ms. Anna邊舞獅邊唱LION DANCE~! 其間Ms. Anna曾邀請過晢晢帶上舞獅頭, 不過晢晢拍咗一下LION個頭就走咗去…

Ms. Anna又邀請數位同學穿上跳跳虎造型衫, 晢晢係其中一個~!

茶點時間, 晢晢出奇地好胃口, 竟然食晒成個嘉x小蛋糕~!

做乜無啦啦拎d蛋糕浸水!!!??? 好核凸呀!!!

晢晢的圖工, 十分精美, 爸爸應該幫咗唔少!

放學後, 爸爸同晢晢個班主任傾咗幾句, 老師形容晢晢上課情況不錯, 語言表達能力都冇問題, 唯獨年紀偏小… 晢晢係全班最細果個, 同班同學最大果個係3歲… 唔怪之得媽媽帶返學時個個都高晢晢半個頭啦! 晢晢, 你要加把勁喇! 媽媽都會努力為你預備教材同你惡補惡補架啦!!!

 

9/Feb/2010 小記: 今日係第7日返學, 晢晢終於冇喊喇, 放學時老師都話晢晢好乖冇扭計, 終於鬆一口氣… 感謝主~!

德怡 PLAYGROUP – 第五堂 30.01.10

呢朝早又係由爸爸媽媽帶晢晢返PLAYGROUP, 然後爸爸又如常中途離場返工...

呢堂主要教形狀, triangle, rectangle, circle, square, diamond, star, heart… 雖然晢晢一早都學會, 但晢晢都好留心, 尤其當Ms. Anna教佢哋用手指做出triangle同diamond時(雙手食指同手指公合埋就成triangle & diamond喇), 晢晢覺得好有趣, 直到而家久不久都會做畀我哋睇~! 仲自己做埋circle同rectangle添~!

今堂其中唱o既一首歌仔係butterfly, Ms. Anna邀請咗晢晢做butterfly, 晢晢背住butterfly wings 個樣好搞笑, 好似入晒戲咁, 當正自己係butterfly喺度飛來飛去~!

可惜媽媽部手機拍唔到正面, 呢張算最清...

圖工時間, 今次係用唔同形狀做出一隻chick, 晢晢果隻就係正正係一隻「豆雞」(睇對眼就知啦~!)

晢晢的「豆雞」

Ms. Anna講解緊隻chick點做, 個個小朋友都控埋去睇~!

到茶點時間, 晢晢又發揮佢偏食本領! 成件蛋卷原封不動!

臨放學時, Ms. Anna原意想玩個類似musical chair o既遊戲, 有音樂就walk around, 音樂停咗就坐喺呼拉圈內, 不過場面好快就失控, 位位小朋友都拎住個big circle各自各精彩… 最後變咗free play~

到放學時, Ms. Anna問晢晢係咪下星期一返學, 媽媽say yes後Ms. Anna就話 “He’s really ready to school!” (哈~ 真o既? 唔好氹我喎~!)

媽媽真係愈來愈鍾意Ms. Anna, 真係帶得唔錯, 如果晢晢N1有幸畀佢教到就好咯~!