腰骨痛 – 不痛了~!

媽媽幾歲時因為跌親冇好好去醫(因為唔敢講畀大人知), 到大概十多歲時就開始痛症發作! 一痛就十年…  

雖然果種痛未至於令媽媽行動不便, 但都令媽媽好困擾, 因為無論坐, 企, 瞓… 任何姿勢都會「冤」住你, 唔會有一刻唔痛(分別只係大痛同小痛)! 而且d痛係一直由腰錐痛到腳底, 平日返工放工行幾步當然冇問題, 但行完一日街或者揍完一日仔, 腳底就會痛到唔願意再踏上地, 而腰錐又會痛到梗晒, 甚至痛到失眠! 通常要捽返三幾日按摩膏先會減輕… 呢D日子, 轉眼就十年, 「腰骨痛」就好似成為咗生命o既一部份, 漸漸都冇再掛喺口邊… 

最初睇骨科, 照過磁力共振, 診斷為第三與第四之間軟骨退化(十多歲退化), 之後安排物理治療同食止痛藥, 媽媽覺得冇乜幫助… 之後媽媽再四處搜尋醫治方法… 跌打, 推拿, 針炙… 總之人哋話好就去試, 不過時間同錢都花咗, 效果都係一般! 不久, 媽媽就放棄了… 

直到上個星期一, 媽媽經朋友介紹下到一個中醫度就診, 醫師問完症就話:「你跟本唔係腰有事, 係盤骨出咗問題」, 然後就拎咗幅圖出嚟解釋, 大概係話媽媽盤骨有少許移位, 之後再瞓上床檢查確定, 最後將媽媽隻腳一拉, 「lock」一聲後(係好大聲! 連爸爸都嚇一跳!), 醫師叫媽媽落地感受下… 嘩! 真係冇痛啦!! 原來腰骨唔痛係咁架!!! 媽媽好耐都試過啦!!! 感覺有如重生!!! 雖然未係百分百, 但起碼有九成! 媽媽都明白, 始終舊骨咩咗壓住神經十年, 唔會一下子完全唔痛, 不過而家果種痛只係好輕微, 而且你會覺得有希望好返果隻!  

之後醫師再幫媽媽把脈, 開咗幾劑藥粉叫媽媽返去飲~! 飲咗兩日, 已經感覺好好多! 上星期四再返去檢查, 醫師話個關節仍然喺正確位置, 進展良好~! 但仍要keep住飲藥, 因為媽媽有點「氣虛」~! 下星期再覆診~!  

嚟緊媽媽都要戒口, 包括菌類, 茄子, 南瓜等(好在大部份都係媽媽唔鍾意食o既啫), 又要避免做彎腰, 蹲o既動作, 仲要做多d運動(eg: 游水)強化肌肉有助鞏固關節… 

咁難得可以「重生」, 媽媽一定會聽話o既~!!!

 

 

感恩...

今日, 媽媽因為一件事令情緒十分低落...

媽媽唔想講, 但心裡個鬱結就快令媽媽抖唔到氣...

本來唔想令婆婆擔心, 亦冇打算畀佢知道自己唔開心...

但今晚, 媽媽又無端端上咗婆婆屋企...

事, 其實都冇提及到, 只係同婆婆傾傾計...

但傾傾下... 媽媽個結... 鬆咗...

婆婆話: 要包容, 要忍耐, 要信...

又講咗好多生活上o既點滴...

提醒我, 其實神一直保守住我哋...

感恩有個信主o既媽媽...

平日你唔會覺得佢好屬靈...

但每次喺我失意時...

只有佢最能用神o既說話安慰我...

世上只有媽媽好...

感謝主!

 

 

衝出香港 – 祈福長隆之旅 – 驚險回程編~ 感恩!

點解呢編blog唔係歸類 “四處逛”而係 “感恩路上”版o既? 因為實在係...

感恩~!

其實臨離開動物園時天色都開始變沉, 仲不時閃電, 但到我哋食埋飯, 上埋大巴都未有雨落… 直到大巴開出1分鐘後, 天色變得好黃好黃, 喺香港從未見過! 估計係因為大風吹起地上o既泥土所以變得咁黃… 喺車箱入面雖然感受唔到風力有幾強, 但望到窗外o既樹被吹到傾斜45度, 仲有不斷有碎石打喺車頭玻璃o既迫迫啪啪聲, 已經想像風勢有幾猛烈!

車一路行, 除咗風愈來愈大, 連天上厚厚o既雲都好似要壓到地上咁… 冇耐, 就落起大雨… "落狗屎" "倒水" 都唔夠形容個雨勢!

喺狂風暴雨下, 司機一直未有減速, 只不時響銨同“飄移”, 險象環生! 媽媽愈坐愈驚, 即刻拎出揹帶將半睡o既晢晢綁緊喺自己身上, 然後再覽好安全帶兼夾打醒十二分精神… 跟住當然就係不停祈禱, 求天父保守平安…

大概過咗兩個鐘, 終於平安到達皇崗! 不特止, 喺我哋落車一刻, 雨就剛剛停了…

真係好好好好好感謝天父保守我哋一家平安, 哈利路亞~!

 

因為難得 所以珍惜

晢晢維持近一個月o既早睡問題, 經過我努力祈禱, 加上每日放工趕頭趕命返屋企後, 自7月中情況已改善不少, 雖然間中都有1-2晚依然早睡(6點幾), 但大致上每晚都係8:30-9:30pm先變豬~! 媽媽每晚都可以有少少親子時間同晢晢玩下, 傾下計, 聽下歌, 講下故事… 雖然只係短短1-2個鐘, 但已經好滿足~!

 

其實每晚放工趕返屋企呢個"使命"曾經都令媽媽都幾大壓力, 事關只要晢晢7點前見我到,佢就可以一路精神到大概9點然後自動變豬, 但一旦我遲咗少少, 即使只係短短15-20分鐘, 晢晢都會捱唔住 zzz… 媽媽試過失望到喊咗出嚟(當然, 趕餐C得個吉!)! 

 

不過經過近一個月o既適應, 又或者係諗通咗, 壓力已減輕不少, 換上o既係感恩同珍惜…  

 

就因為得來不易, 所以即使只係簡簡單單o既短聚, 媽媽都會珍而重之, 亦會提醒自己要好好享受呢d同晢晢o既相處時光… 每日趕回家o既路上由初初帶住壓力皺住眉頭去趕! 到而家, 會帶住笑容去期待(,雖然都係好趕) … 即使晢晢真係瞓咗, 都漸漸學會欣然接受, 當畀自己休息一日又好, 或者打理下頭家/整理下d教材都好… 再唔係衰衰地搞醒晢晢都得啫 (哈哈~! 真係試過架~!)

 

值得感恩o既仲有神o既眷顧~! 作為一個在職媽媽, 加上爸爸近幾個月因為工作未能晚上趕返嚟協助照顧晢晢, 每日放工趕返屋企揍仔其實都幾攰~! 但感謝主近來氹晢晢瞓覺易處理咗好多, 基本上完成所有睡前活動, 放上BB床一陣就會好乖咁自然入睡, 冇扭計, 冇掙扎, 冇大吵大鬧, 即使有時未能順利入睡, 只要媽媽喺晢晢臉同小腿上massage一下, 輕聲唱首"sleep baby sleep", 數分鐘內都必然會入睡, 一d都唔駛勞氣~! 晢晢呢個改變確實令媽媽輕鬆不少, 而且完成任務後仲有時間同精力做自己想做o既事… 起碼可以讓自己安靜一下…

 

爸爸工作暫時預計要忙到年尾, 希望天父繼續保守媽媽有精神體力去獨力應付照顧晢晢o既使命~! 當然~~  如果間中爸爸可以早少少放工返屋企, 一家人一齊就更加好啦~!

辛勞的weekend

剛過去o既weekend真係辛苦到暈, 只因爸爸星期六下晝同我哋去完公園玩就去咗返工, 一去就到凌晨2點... 打返嚟話: "打9號風球, 返唔到, 第二日都要做埋d嘢先返得!"... 結果爸爸要去到星期日半夜3點先返到屋企...  

喺毫無心理準備下連續兩日獨力照顧晢晢真係lei 咁hea, 餸又未買, 家務又一大堆, 而且而家o既晢晢又愛爬高爬低...  但都要頂硬上...

星期日朝早, 晢晢5點就醒咗(緊係, 前一晚未夠5pm就瞓咗), 我就一路忙忙忙忙.... 忙到晢晢9點瞓覺為止... 又要陪佢玩, 又要邊看住佢邊買餸煮飯, 餵飯, 沖涼, 洗嘢... 真係人癲!

辛苦咗成個星期日, 都未完, 星期一又拎咗假帶埋晢晢去賀爸爸個朋友新舖開張! 由朝去到晚! 要看住隻冇時停o既馬騮仔, 真係...

"放假辛苦過返工"!! 

在此我要向全職媽媽致敬!!

不過...呢個星期六日一話雖辛苦, 但就好感恩, 因為晢晢喺非常時期(爸爸不在家)非常合作~! 好抵鍚! 例如...

 星期六一早就瞓, 令我有足夠休息~!

 星期日雖然得我一個人揍, 但晢晢一向唔太合作o既食飯時間突然變得好乖, 冇吐飯, 冇say no, 大口大口咁一啖接一啖, 仲抵死到點頭講: yummy~~~ 氹到我飛起~!

 玩o既時間都好聽話, 叫佢做乜就做乜, 冇say no, 仲好叻咁識得叫 "all豬豬"~! 片片全日冇濕過~! 叻仔~!

 再次用開口杯飲奶都冇say no~!

瞓覺時間又好乖, 9點正放眼光光o既晢晢入BB床都冇扭計, 講咗句: "藹瞓呀" 一分鐘內就自行變豬~!

 星期一出街都好合作, 雖然玩咗全日好攰, 但都冇扭計, 食飯仍然大啖大啖咁食~! 返到屋企, 放上BB床時10點, 又係講咗句 "藹瞓呀"就瞓咗~!

仲有好多... 不能盡錄...

感謝天父o既體貼

 喺我最無助時

 叫晢晢好合作

令我減輕不少壓力

 而且讓我順利過渡之餘

又有一個好愉快o既親子時間

呢d全屬天父o既恩典~! A-MEN~!