艾篙PLAYGROUP 2 – 第14及15堂 – 8 & 15.01.11

隔咗咁耐先紀錄, 一來忙,. 二來艾篙愈來愈隔得耐先report, 有時甚至上咗兩個星期, 然後第三個星期先一次過report上兩堂o既情況, 久而久之, 媽媽就變得冇咁積極去急於紀錄(橫豎都遲開咯)…

其實今次呢兩堂, 媽媽本來都想側側膊, 但… 都記低咗咯, 唔爭在打多幾隻字啦… 況且, 以後都未必有機會再記, 因為上埋呢兩堂, 我哋決定暫停呢個PG(始終路程頗遠, 大家都有點累…), 希望日後有機會可以再次參加佢哋o既課程! 因為媽媽實在係好唔捨得呢…

第14堂 08.01.11

大肌肉+手眼協調

邊碌波波邊走『8字板』, 晢晢manage得唔錯~! 後來加上斜台以增加難度, 晢晢雖仍能平衡身體, 但波波會跌, 練習幾次後表現有改善, 但未算靈活!

之後要跟小朋友合作傳波波, 先用一個彎曲的盤盛住波波走, 然後走到小朋友面前就倒到對方碗中~! 晢晢表現有點心急, 所以時時都會跌, 跌咗幾次更意圖放棄! 幸好在小朋友鼓勵下又重新振作, 加上婷姐姐不斷提醒『慢d慢d』, 表現又好些~!

音樂部份

玩敲擊樂器, 包括: 碰鈴, 木槌及三角鈴

碰鈴 – 晢晢初接觸時只當喳喳用, 後來經指導後學會用『碰』o既方法令碰鈴發聲~!

木追 – 開始只懂敲, 不會刮, 後來Kevin哥哥教佢刮佢先知原來木槌可發出呱呱聲~!

三角鈴 – 一拎起會識講呢個係『三角』, 但唔識叫『三角鈴』, 幸好佢知道係用支棒敲打發聲(因為之前玩過~!)

之後Kevin哥哥安排每位小朋友扮演唔同動物並操作不同樂器, 及按指定排序打出節奏, 晢晢表現麻麻, 要提先做到! 之後再玩打鼓, 要打隔離小朋友個鼓, 呢次晢晢威返次, 仲叻到提其他小朋友點做~!

第15堂 15.01.11

數學 + 大肌肉

有1-10的數字咭, 晢晢認讀及排列大小都表現不錯! 活動係小朋友輪流抽數字咭, 抽到大的就做『大哥哥』, 小的就做『小朋友』, 然後『大哥哥』要拖著『小朋友』走平衡木及過呼拉圈~! 雖然晢晢會分大小, 但郤時時爭做『大哥哥』~! (威d既咩!?)

下一個遊戲是傳大波波! 當走到垂直的呼拉圈前, 因大波波直徑比呼拉圈大, 有些小朋友會不知所措, 有些會夾硬質入呼拉圈, 而晢晢就選擇抬高個波波, 不過因為個子小, 所以未能成功! Kevin哥哥問『唔夠高, 過唔到, 點算好?』, 晢晢繼續嘗試, 但一直都只想到靠自己, 未想到要請朋友幫手, 於是喺Kevin哥哥提點下晢晢就要請小朋友幫忙合作將波波跨過呼拉圈~! 後來到晢晢被邀請幫忙時, 晢晢都十分樂意一同合作~!

最後一個遊戲是『打筋斗』, 呢個係晢晢強項! 印象中晢晢歲半未到已經打得駕輕就熟! Kevin哥哥話晢晢無論前/後滾翻表現出色~! (第二樣又唔見你咁叻…)

噢… 紀錄完了… 媽媽真的好唔捨得啊!!

畢竟當初媽媽毅然放棄N1來參加艾篙課程, 而家要暫別, 心情總有點失落…

回想呢半年, 真的好感謝Surmen 姐姐及各導師用心的教導, 讓晢晢於學前有更好的準備~! 而每次詳盡的反饋, 亦讓媽媽更了解晢晢的進度~!

要感謝的, 當然還有婆婆, 於暑假期間(大熱天時)願意每星期兩日風雨不改的幫忙帶晢晢去上堂(仲要喺條街盪2.5小時後再接放學!!)… 沒有婆婆的支持, 媽媽跟本冇可能如此大胆作出退學(N1)的決定… 所以真的好多謝您, 婆婆, I LOVE YOU~!

最後要多謝當然是晢晢爸爸, 喺媽媽籮咁大個肚及妹妹初出生的階段時樂意晨吉咁早自動自覺帶晢晢去上課, 讓媽媽安心… 呢一切, 媽媽都會記喺心裡…

多謝的說話說不完… 所以… 暫時到此為止…

希望不久將來可以再次參加艾篙課程啦~!

艾篙PLAYGROUP 2 – 第十三堂 – 18.12.10

上堂前仲好靚仔...

呢堂晢晢受傷呀! 眼角撞到枱, 腫咗, 幾日後散瘀眼皮仲黑咗一大撻! 唉… 之前同學抓到o既疤痕仲未退又嚟多劑… Kevin哥哥打嚟果陣都好唔好意思, 不過意外o既嘢都冇人想, 媽媽都冇怪責Kevin哥哥~!

腫咗少許, 損咗少少...

不過呢次受傷又見到原來d同學仔都幾鍚晢晢過喎, 見到佢受傷會攬住安慰佢, 又叫佢唔好喊, 晢晢真幸福~!

一開始係音樂課…

重溫 drmfs --- 晢晢仍然唱漏個『r』, 要人提先唱到~! (媽媽喺屋企同晢晢練習, 晢晢連1粒音都唔肯唱, 所以喺課堂上肯唱d mfs已經好好啦~!)

重溫手號 --- 晢晢只記得少少, 但溫習後表現又不錯~! (不過返到屋企媽媽問佢又係一個都唔做!)

音樂+大肌肉 --- 先砌樓梯, 晢晢初時未掌握到, 想對齊向上砌(樓梯應一級級咁砌), Kevin哥哥刻意叫晢晢自己試下拆過再砌藉以提高觸感記憶, 後來表現不錯~!

完成樓梯後, 小朋友要邊行樓梯邊唱, 向上行時唱drmfs, 向下行時唱sfmrd, 晢晢基本上算是掌握到向上, 但比較心急, Kevin哥哥唱d時, 晢晢好快就唱r, 但Kevin哥哥其實係想唱m~! 到向下行時, 晢晢好多時顧住行樓梯而忘記唱~!

課堂下半部份 --- 『Colourful』

主要係玩遊戲『Colourful』, 剛剛早前媽媽先買咗, 但晢晢興趣不大, 所以收埋咗,不過Kevin哥哥話晢晢玩得好認真! 或許因為有其他小朋友一齊做, 所以有心機玩~!

晢晢表現…

間中會有鏡面情況, 不過提佢『睇清楚啱唔啱!?』, 佢又識更正返~!

另外, Kevin哥哥又發現晢晢有『主題/背倒轉問題』, 例如明明係要『底色透明, 藍色星星』的膠片, 但晢晢會拎錯咗『底色藍色, 透明星星』的膠片, 問佢『睇清楚啱唔啱!?』, 佢都堅持自己冇錯, Kevin哥哥知道我哋有呢份遊戲, 所以叫媽媽喺屋企試下玩下睇下係咪真係有呢個問題!

課後餘慶...

咁啱遇到『舞蹈日』, 晢晢睇咗一陣~!

之後又到公園玩啦~!