爸爸電髮呀! >.<!

爸爸個頭自從我地拍拖開始就一直都係我剪o既, 但到我35wk開始, 爸爸個頭就冇剪過啦, 因為爸爸怕我辛苦就冇叫我幫佢剪, 一直到我生咗, BB都滿月, 終於都比我哦到佢肯去Salon剪啦!

今日2:00pm我就呢呢林林帶埋呀仔吹爸爸出門口去剪頭髮, 諗住剪完一齊食tea, 4pm就可以返屋企餵仔, 點知...

爸爸入咗Salon, 我就推BB四圍走, 本來諗住行百佳, 點知佢裝修勁大塵我就推BB走咗... 之後係咁行行行, 好肚餓, 又口渴, 但都冇買嘢食, 諗住留肚同爸爸食tea嘛... 跟住又係咁行, 行到好攰, 我睇吓隻錶! 吓3:30pm啦woo, 仲未打比我o既, 我就call佢啦, 佢先話我聽佢電緊髮, 冇咁快! 咁BB又夠鐘食奶, 我又冇帶鎖匙, 唯有再推推推返BB去髮型屋搵爸爸拎鎖匙然後趕返屋企啦!

回家途中, 勁肚餓口渴, 諗住去SEVEN買嘢飲啦, 但個門口都推唔入架BB車, 咁唯有忍住急急腳返屋企先算~ 返到來立刻飲咗兩杯水, 餵埋BB我先食幾塊餅頂肚餓, 之後我就忍唔住攬住亞仔喊, 覺得爸爸好衰, 唔理我同個仔自己想做乜就做乜! 明明講好一齊食tea, 明知我餓, 明知BB趕住食奶奶, 可以粒聲唔出自己電髮, 唔理兩母子死活!

我不斷問自己, 嬲唔嬲佢好呢? 鬧唔鬧佢好呢? 諗諗吓, 唉! 算啦! 個個人都有貪靚o既時候, 我知佢恨電髮恨咗好耐架啦! 既然佢電得咁開心, 可必掃佢興? 咁我就收起咗D嬲, 當冇事, 大方D啦! 但係到而家都有少少唔開心lor... 唔知爸爸feel唔feel到呢?

BB, 如果你睇到呢一編唔好覺得爸爸好衰呀! 其實爸爸對我哋好好架, 只不過佢有少少大細路, 一時樂極忘型啫~~!! 你記住要愛爸爸呀!

聽日同BB拎出世紙啦! 2008年1月12日

BB, 你個名叫翱晢, 英文名叫Adrian, 爸爸媽媽聽日就會同你拎出世紙啦!

BB個名其實係陀緊果陣諗o既, 果陣仲諗咗幾個(ie: 翱迦, 安晢, 柏翱, 翱霖, 翱晢...), 爸爸接BB返屋企果日, 我就問爸爸BB叫咩嘢名好, 爸爸就好快, 好肯定咁講: "翱晢啦!", 我見爸爸都咁肯定, 我就同意咗, 仲好快咁話: "咁佢個英文名就叫Pang, 唔要O Chi 呢D.." 我哋就係幾句短短o既對話就決定咗BB個名啦!

同日, 媽媽上咗我屋企, 我就急不及待同媽媽講: "我哋諗住叫BB個名做彭翱晢", 媽媽個反應好似話我知佢唔太鍾意, 仲話個晢字音好沈, 唔夠響, 仲有冇其他選擇?... 我聽完個心都沈一沈: "吓, 又要諗過, 好煩woo?"... 過咗幾日, 我D屋企人上來我屋企做冬傾開BB個名, 佢哋又講: "真係叫亞晢呀?" 我二姐話: "個晢字好似好cool咁..." 佢哋有建議過叫翱澄...

聽完之後個心都唔係好舒服, 成日都諗個名係咪真係唔好呢? 成日都想諗過另一個名比BB.. 有時我想同爸爸傾, 但佢冇乜比反應我, 我諗佢要D時間諗掛... 之後幾日我都冇再提呢件事, 係到某日我再問爸爸: "BB係咪真係叫翱晢?", 佢又有肯定咁講: "係呀!", 咁我就知爸爸真係鍾意呢個名, 咁好啦, 就叫翱晢啦!

翱晢o既意思, 翱-翱翔, 晢-光明 ,爸爸媽媽想BB翱翔喺光明之中, 做個光明之子~!

1月6日, BB滿月果日o既早上, 教會好多人打來賀BB, Fanny問開BB叫乜嘢名, 我就話佢知BB叫"翱晢", 佢就即刻話好聽... 唔知係咪真呀, 但在我就感到好安慰, 好似放下心頭大石咁, 終於有人認同啦!

BB, 聽日拎咗出世紙個名就冇得改o架啦, 希望你都鍾意彭翱晢呢個名啦! 晢晢, I LOVE YOU!!!

第一次帶BB打針

今日第一次帶BB打針, 心情都有D緊張, 我肉痛佢比人拮之餘, 又擔心佢會唔會喊到拆天呢?會唔會發燒? 會唔會影響胃口??? 唉, 做亞媽就係咁多嘢擔心o架啦~~~

到咗健康院, 首先睇咗D黃先, 個醫生話佢都退咗好多, 係D皮膚未退晒, 要再觀察, 1月21日再返去再check, 都好... 跟住我順口問醫生我餵4oz一餐(3hr一次)會唔會太多(亞媽成日話我餵得太多!), 醫生就話食幾多唔係大人決定, 係BB決定, 你發覺BB唔夠食就要加比佢o架啦... 聽完之後, 我就決定加返半oz比BB, 佢一直都食開4.5-5oz架嘛, 係婆婆話太多我先減~~

見完醫生就要打針啦...

入到打針房, BB其實都瞓咗, 咁我就係咁叫BB唔好睇, 我怕佢驚(其實係我驚就真), 見到姑娘拮落去果下我都真係有D赤, 心諗: "姑娘, 快手D啦!", 亞B就即刻醒晒之餘, 仲喊到豬頭咁, 成塊面紅晒, 我仲諗要有呵佢好耐, 點知BB好"UN"皮, 未出打針房已經唔喊, 仲瞓返tim! 我問埋姑娘, 佢話呢支針打完係唔會發燒的... ohho, 放心晒!

BB, 你要健康成長呀! 錫晒您~!

BB滿月啦~!

BB, 今日係2007年1月6日, 你今日滿月啦!

一個月前, 你仲係我個肚肚度掙扎要"捐"出o來, 今日你已經一個月大, 會喊, 會笑, 會摟抱, 會係我懷抱食奶奶...

雖然同你"相認"只係短短o既一個月, 但係你已經成為咗我o既寶貝... 媽媽真係好愛你o架, 無論幾辛苦, 媽媽都會比你最好o既... 你大個都要聽話, 唔好激我咁多, 唔係媽媽就會好傷心o架啦!

今晚我哋就會同婆婆, 公公, 太公, 姨媽姨丈x2, 仲有表姐悠悠去同你食飯慶祝, 不過你就冇份食lu!! heehee

BB, 你要健康成長, 精乖伶俐呀!!

仲乜發咁大脾氣呢?

尋日又發好大脾氣, 令佳佳好難受... 我知道架, 真係好羞愧!

湊BB其實都唔算太辛苦, 但唔知點解我總會為好少事就發好大脾氣... 早幾日, 我唔小心倒潟水喺BB床, 個心一急, 我就好蚊咁推林剛疊好o既衫, 之後又好蚊咁諗: "點解咁少事都冇一樣做得好, BB冇床瞓, D衫又要接過!!!", 咁我就擲爛咗隻衣架... 

到尋晚, 本來我諗住叫老公用樽餵pump好o既人奶比BB, 咁我就安心再pump奶, 點知老公建議我埋身餵... 咁我就埋身啦, 點知BB唔肯啜, 咁我就叫老公坐熱d奶, 我就放BB喺大脾pump奶, 點知BB一直喊唔停, 為左呵佢我就pump唔倒奶... 我一路叫BB唔好喊, 佢就愈來愈喊得勁, 我就開始失控, 我諗: "點解搞亂我個schedule!? 明明我排得好地地, 無啦啦做乜叫我埋身餵!? 而家BB又喊餓, 奶又pump唔倒!!!" 之後我就發脾氣推林左張茶兀, 連剛剛pump出o來o既少少奶都倒潟埋... 佳佳見到我咁, 我知佢都有少少嬲, 但佢唔敢鬧我... 之後我就喊到收唔到聲, 一路餵BB, 一路喊, 到佢食完我都未喊完, 不斷胡思亂想, 覺得自己好冇用... 好彩佳佳安慰返我, 而家我都唔開心架, 因為又令老公硬食我D脾氣, 其實我真係唔想架... 老公可唔可以唔好怪我? 我真係一時控制唔到自己咋...

BB出世啦~! 2007年12月6日1:25pm

2007年12月5日, 放產假前最後一個工作天... 果日做到大概6pm, 開始feel到個肚有規律咁痛, 唔太痛但好有節奏, 我就開始做紀錄, 點知已經係5min痛一次, 個人開始慌, 手都震埋, 但因唔太痛所以唔係好信, 冇幾耐有個生過BB o既女同事見到我面青青咁就問我發生咩事, 佢聽到我5min痛一次就叫我快D入院, 因為都算痛得密, 我就係咁去toilet check吓有冇穿水見紅, 又冇wor, 所以都唔係好信... 本來約左佳佳去荃灣買結婚禮物比朱良, 開頭都諗住照去, 諗諗下都係唔敢博, 之後叫咗佳佳喺荃灣接我回家沖涼洗頭, 點知冇幾耐(大概6:30pm), 佳佳已經到咗我公司樓下接我...

我地撘的士去到荃灣西再轉西鐵回家, 途中我不斷record痛o既情況, 都係5min一次... 返到屋企, 我同佳佳都拿拿聲沖涼洗頭, 連牙都刷埋, 本身諗住沖完就出發去醫院, 但因為沖涼時feel唔到痛, 我怕食咋糊, 所以沖完涼我就坐喺按摩椅唔郁再觀察, 冇幾耐又feel到痛, 我再一次record, 點知又係5min一次, 都係唔太痛, record咗一陣我開始唔耐煩, 就諗住拎件冷衫o來織o來減壓, 但因為個心唔安樂又收埋咗... 隔左一陣, 我哋就打比師母問下我到底係咪陣痛, 佢話係, 仲係咁催我去醫院, 果陣時我都唔係好信... 後來又打比Andy個老婆(佢係產科護士), 佢話我咁o既情況多數都生得, 不過可以再觀察多半個鐘, 咁我就等多一陣, 就開始換衫執行李...

我哋冇撘的士, 因為真係唔係好痛, 我唔想搞到好緊張但原來未生得就好瘀.. 我哋最後撘咗尾班專巴去撘西鐵, 之後係美孚轉地鐵到太子先撘的士去法國醫院...

到左醫院, 個的士司機仲停左個唔係幾就腳o既位置, 我心諗: 好彩我唔係太痛啫, 如果我痛得勁點自己行到去產科病房呀? 司機, 你真係"專業"!

上到病房, 個姑娘同我哋做晒手續後, 就叫我換衫同埋同我檢查... 之後上到病床, D陣痛就開始密咗, 大約3分鐘一次, 亦都痛得勁咗, 但都係一度都未開... 佳佳一直陪住我, 同1am到佢先走.. 我就自己一個人留喺醫院等生BB...

成晚流流長我都冇乜點瞓, 只係不斷紀錄陣痛o既時間, 一直都係3分鐘一次, D痛都係忍受到, 中途我仲可以瞓到1-2個鐘tim...醒咗果陣我仲諗: 我會唔會食炸糊未生得呢? 所以我就祈禱求神比我痛得勁D, 等我肯定自己真係生得...

到咗第二朝7:30am, 我就feel到第一之劇痛, 冇幾耐醫生就到咗, 佢同我檢查完就話我都係一度都未開, 連放支針拮穿羊水o既位都唔夠... 我問佢我要等多幾耐, 佢就話唔知, 起碼等多十個八個鐘, 佢見我咁痛苦個樣, 就建議我做無痛分娩或者開刀, 我就話考慮吓先, 但冇幾耐我就開始後悔啦!!

之後佳佳到咗, 佢買咗碗通粉比我, 但我食唔到第五啖已經痛到食唔落, 之後我就叫姑娘比笑氣我聞, 但一D止痛作用都冇, 只係好頭暈加作嘔!! 忍咗一陣, 我再問姑娘可唔可以打止痛針, 佢話要開到3度先有效, 但我一度都未開... 好慘! 我每痛一次, 個心就會唱住"以馬內利, 神與你同在, 以馬內利, 神與你同在, 在每一天, 上帝以千般恩惠寬恕賜下憐憫..." 開始時都有D用, 但冇耐就開始痛到失控, 我開始諗: 無痛好定開刀好呢? 雖然我一直都好希望自己生(順產), 但做無痛都係要等我自己開夠度數先得, 我一度都未開, 咁咪有排等!? 但要我開刀好似有D唔甘心, 都痛咗咁耐咯! 人生交义點咗一輪後, 最後就決定開刀, 因為真係頂唔順啦! 佳佳不斷打比馮醫生但一直都好唔順利(一係睇緊症, 一係電話收唔到!), 後來佢就叫姑娘急call醫生返來同我開刀. 我一聽到佳佳簽咗紙後, 我就開始發咗狂咁叫, 又捉實佳佳隻手唔放! 冇幾耐(大概12pm)馮醫生就到咗, 佢一見到我個痛苦樣就潤咗我一句: 都話會愈來愈痛架啦, 一點同你開刀啦! 我當時暈陀陀, 只係應咗佢一句: 快D!

被推落手術室時, 我一痛就大嗌, D姑娘見到我咁就叫我唔好叫, 怕我入風落肚, 咁開完刀就好易嘔! 開頭都有聽佢地講用鼻呼吸, 但個鼻塞得太緊要, 又痛到C, 所以冇幾耐都係大嗌~~ 我諗D姑娘都頂我唔順~~

好啦, 終於入得手術室啦! 果陣時痛到失晒控, 我曲埋個身, 差不多半個人出咗手術床, D醫護人員勁驚我跌落地...

ooohhh, 終於打麻醉針啦! 好快個人就鬆晒, 大概20分鐘BB就出世啦~~

BB出世7磅6, 51cm長, 男仔

BB一出世姑鋃就抱BB去我身旁, 我喺佢面珠錫咗一啖, 果種暖粒粒o既感覺我呢世都唔會忘記...

感謝天父讓我生BBo既過程順利, 又畀我經歷到陣痛讓我感受到做媽媽o既偉大(雖然最後都係開刀), 又感受到身邊所有弟兄姊妹o既關心, 我感覺到好多愛包圍住我一家! 哈利路亞~! 

作動!?

尋日返咗屯門醫院做產前檢查, 一上磅見輕咗1kg我都不以為意, 但醫生就即時寫紙叫我入院check BB心跳… 果陣都未識驚, 因為我一直都feel到胎動, 仲好活躍果隻~~

 

上到產前房, 姑娘好友善, 但係個環境都幾差, 一間房有6個床位, 但床與床之間只有僅僅一個身位, 而6位孕婦中連埋我都只得兩個香港人, 其餘係中國同胞或者南亞裔人士…

 

姑娘搞掂晒之後, 我就乖乖咁瞓喺床度check BB 心跳, 大概一個鐘後, 姑娘入嚟睇, 佢話check到我每半小時有一次陣痛, 佢問我feel唔feel到, 我就話我成日都咁痛法架啦… 又問我有冇見紅穿水… 又冇wor… 之後再觀察多半個鐘, 又check到我有好規律o既陣痛, 姑娘叫我通知老公, 我話唔駛, 應該唔係(其實係因為自己好唔想喺呢度生)… 咁姑娘唯有叫我再check多半個鐘, 點知又check到有… 我問娘講咁點算? 當時大概7點幾, 佢就提議我去canteen食咗嘢先, 佢就去問醫生意見, 到我食完件蛋牛治返上病房醫生就話未穿水見紅都唔急o既, 就打發咗我返屋企~~~

 

哈哈~! 無啦啦虛驚一場, 不過當採排都ok既~~ 好彩冇叫老公飛的去醫院搵我啫~~~