大鬧宜家傢俬 13.02.10

年三十晚我哋一家三口要到爺爺嫲嫲家食團年飯, 到埗前, 走到九龍灣閒逛一翻。 抱恙中o既晢晢心情唔多靚, 經常喊同扭計, 直到走到好比兒童遊樂場o既宜家傢俬先見到佢笑返~!

呢個廚房仔簡直係兒童至愛, 不過咁貴, 買返屋企就免問喇~! 仔, 你都係喺度玩飽佢算啦!

呢張氹氹轉又係非常受小朋友歡迎! 晢晢玩到不停怪笑~! 

其實呢日媽媽都睇中唔少嘢, 但爸爸話「買$1500內就$70運費, 你揀得幾百蚊嘢, 唔抵!」就咁, 媽媽就放棄咗… (真後悔! 唔知等到幾時先會再到九龍灣行街?? 唔知等到幾媽媽先買到想買o既呢?)

我愛"阿妹"

呢日爸爸播起張惠妹o既歌, 晢晢竟然跳起勁舞上嚟! 好搞笑~!

晢晢有趣語錄 <26個月>

同爸爸踢波時:「衝力射球… 猛虎射球… 好勁呀! 好犀利呀!」有時睇體育新聞見到人地入波都會咁講。

近來好鍾意同我哋分配交通工具: 「媽媽返工呀~搭巴士lor… 爸爸呀~搭van lor… 婆婆搭mini bus lor… Lily姐姐就搭train lor… 晢晢呢~搭shuttle bus lor…」間中媽媽會問:「咁媽媽返工搭motorcycle好唔好?」晢晢會好言相勸:「唔好啦, 搭巴士啦…」

有時boo boo中會放屁, 晢晢就話:「晢晢放臭屁呀! 好核凸呀!! 哈哈~~」

放咗不知名食物入口時, 會張開口指住口中食物問:「咩嚟架?」媽媽:「肉肉嚟架, 食啦!」晢晢繼續問:「咩嚟架?」大概答佢10次到佢就放心食…

通常晢晢唔肯執玩具時, 媽媽都會先執起一兩件然後同佢講:「到你!」而家晢晢識點返我做. 執完一兩件就:「到媽媽!」

開始愛撒嬌, 手指有少少倒剌就扮晒可憐:「嗚嗚嗚… 媽媽, 好痛呀! 搣咗d皮皮好痛呀! 要see doctor呀」

晢晢變了貪錢怪… 晢晢:「晢晢冇錢錢呀」婆婆:「冇錢錢呀, 問爸爸攞啦!」晢晢:「婆婆bag bag呢?」婆婆:「你要婆婆bag bag做咩?」晢晢:「婆婆bag bag 有錢錢呀!」

前排天氣相當潮濕, 婆婆家走廊o既牆身同地板都出現水珠, 晚上接晢晢回家時, 晢晢一反常態, 唔再扭抱, 堅持要自己行, 然後邊扮踩roller邊話:「嘩! 好wet wet 呀! 好跣呀! 好驚驚呀! 哈哈哈!」嚇得媽媽步步為營, 因為媽媽對鞋其實都好跣, 兩個一齊跌低就大鑊!

鍾意特登講錯d嘢, 然後更正返自己, 例如指隻狗問:「Is it an elephant?」之後自答:「No, it is not an elephant! It is a dog! Good boy! I’m great!」

開始會將d耳熟能詳o既歌仔改歌詞…

原本係:「Butterfly, butterfly, I’m a little butterfly」會改為:「Airplane, airplane, I’m a little airplane」(動作上都有分別架, 唱butterfly會拍翼, 唱airplane就只會張開手。)有時又會唱成「bicycle, bicycle, I’m a little bicycle」… 創意無限…

原本係:「I like lollipop, do you? Yes, I do!」會改為:「I like bicycle/motorcycle/airplane/mini-bus/shuttle bus/light rail etc,  do you? Yes, I do!」

呢首改得最犀利, 原本係「有隻雀仔跌落水 … 被水沖去!」佢就跟據唔同環境及人物改歌詞, 例如:

「媽咪 媽咪 去咗邊? … 去咗 返工!」

「Daddy Daddy 去咗邊? … 去咗 藹瞓!」

「婆婆 婆婆 去咗邊? … 去咗 煮飯!」

「姐姐 姐姐 去咗邊? … 去咗 揍放學!」

「晢晢 晢晢 去咗邊? … 去咗 食奶奶!」

「司機叔叔 去咗邊? … 去咗 拃車!」

有時又會作到好無厘頭…

「Motorcycle去咗邊… 去咗 mini-bus」

上學的第2-4週

第二週 08~11/Feb/2010

呢個星期因為新年只需返4日學, 4日有2日冇喊, 算好成績。放假前一日係學校o既「中國日」, 晢晢著咗佢件新年戰衣出席, 心情大靚。 放學後仲跟婆婆去嘆茶, 食咗大量點心, 致電婆婆時更聽到佢喺旁邊哈哈大笑, 似乎呢日玩得好開心!    

第三週 – 新年假期無需上課

本來覺得返兩個星期學就放咁長假蝕學費之餘又擔心晢晢開課後要從新適應校園生活, 但過後先發覺呢個假期正好畀晢晢有喘息機會。始終只剛開始習慣每天獨自返幾個鐘頭學, 生理同心理負擔對一個2歲小朋友嚟講都頗大。藉住呢個假期, 爸爸媽媽陪佢多D, 可以幫助重新建立安全感, 另一方面晢晢又可以有充足休息, 差足電心情都靚D~!

第四週 22~26/Feb/2010

2月22日(星期一): 媽媽心情十分緊張, 放咗咁長假, 真擔心晢晢又哭得C去活來, 幸好一切順利。據爸爸所講, 臨到校門時爸爸畀咗3粒「朱古力牛牛糖」邊行邊食, 似乎有點定驚作用。到學校後, 晢晢化身樹熊黐實爸爸, 好在剛巧有其他同學仔喊, 爸爸趁機放低晢晢叫佢安慰哥哥, 晢晢照做, 然後沾沾自喜滿以為自己好叻仔! 之後漸漸放下戒心, 四處搵嘢玩, 爸爸就趁機偷偷溜走。老師話當晢晢發現爸爸走咗都喊, 只問咗句「爸爸呢?」就繼續玩。放學時, 婆婆話晢晢係笑咪咪走出嚟。感恩!

2月23日(星期二): 爸爸話呢日晢晢情況比過往好好多, 冇再黐身! 入到課室, 晢晢竟然主動放低書包(平時多數唔肯放, 因為知道放低咗就冇得走!), 又自己拎玩具玩! 其間又有同學仔喊, 爸爸再出招叫晢晢安慰人; 爸爸都冇刻意叫佢點做, 但晢晢就想到將佢手上最後一粒「朱古力牛牛糖」請畀姐姐食(真大方, 抵鍚!)。之後爸爸又係趁晢晢專心玩玩具時偷偷溜走。放學時, 本來隔住校門見到婆婆時仲笑咪咪, 但婆婆傻奸奸唔記得交放學證, 晢晢呆等咗好耐都出唔到校門搵婆婆就喊起上嚟, 婆婆先如夢初醒, 幸好婆婆接過晢晢後又笑返。不過晢晢返完3個鐘頭學顯得相當疲倦, 婆婆一放佢落BB車, 推唔夠十步就已經ZZZ…  

2月24日(星期三): 媽媽繼續預備3粒「朱古力牛牛糖」畀晢晢「定驚」, 效果唔錯! 爸爸形容晢晢今日表現再有進步, 心情輕鬆, 又自動自覺放低書包同拎玩具玩, 似乎晢晢對學校戒心已放下不少! 然後爸爸又趁晢晢唔為意溜走。放學時, 唔知係咪有昨天經驗, 晢晢隔住玻璃門一見到婆婆就放聲大哭, 狀甚淒涼。老師話晢晢全日都冇喊過, 只係放學先喊。婆婆接過晢晢問: 「婆婆揹你藹瞓好唔好? 」晢晢:「唔好, 要抱」抱咗一陣, 晢晢又主動話:「婆婆揹揹藹瞓吖」結果一伏低就ZZZ… 

2月25日(星期四): 呢朝早晢晢6點幾就起咗身, 不過無損佢返學心情, 情況相當理想, 爸爸離開時都係冇喊! 但到放學時又係喊住走, 婆婆話今日似乎已經喊咗一段時間, 因為接過晢晢時佢已經喊到索晒氣。 老師話本來一直都冇問題, 只係臨放學時晢晢攰得太緊要, 有一段時間直頭伏咗喺枱休息, 所以一見到親人就喊得咁淒涼, 真陰公。 之後婆婆如常叫晢晢同老師SAY BYE BYE, 但晢晢呢日咩人都唔啋, 又有D脾氣, 婆婆最後要出動candy先搞得掂!  然後又係抱住行唔夠十步就zzz… 可能今日有運動堂, 又早咗起床, 所以特別攰, 希望晢晢快d克服到每日3小時課堂啦! 媽媽會繼續為您祈禱架啦!  

2月26日(星期五): 呢朝早又係天未光就醒咗, 一起身就話要睇書, 睇完一本又一本, 真好學! (不過如果發生喺遲一個鐘會好好多) 爸爸好擔心晢晢咁早起身會唔夠精神上堂影響學習, 不停催促媽媽氹佢返瞓, 不過呢d嘢迫得嚟o既咩!? 結果唯有陪佢玩到天光, 一直玩到夠鐘換校服就開始扭眼瞓! (仔, 你話你係咪玩嘢?) 以為咁精神狀態下返學實會有點不順, 但情況又出奇地好, 連「朱古力牛牛糖」都唔駛出動都能夠自動自覺進入課室兼坐定定玩! 抵鍚! 爸爸臨走時, 跟班主任傾咗幾句, 老師話晢晢適應得唔錯, 只係臨放學時真係顯得好疲倦, 所以連續幾日放學都喊, 希望晢晢快快克服! 放學時, 晢晢本來好地地, 但一見到婆婆就喊, 婆婆接過晢晢就同佢講:「你喊咩啫? 你睇吓個個小朋友都冇喊過wor」晢晢望咗一眼就話:「係wor~」婆婆:「咁以後放學仲駛唔駛喊呀?」晢晢:「唔駛~」婆婆:「係lor, 唔駛喊咁要點呀?」晢晢:「要笑笑」然後就笑返晒~!