幼兒樂園II – 第10堂 – 畢業了!

晢晢:「咁快就最後一堂嗱!? 好唔捨得呀!!」

時間過得真係好快, 由晢晢8個月大開始參加呢個機構舉辦o既幼兒課程, 直到而家26個月大, 當中點滴對媽媽嚟講感受好深! 除咗陪住晢晢, 仲有我呢位新手媽媽一起成長… 

晢晢B由第一天要喊住上堂…

 

到今日, 可以一個人安坐跟老師一齊唱歌

 

媽媽事先聲明冇收過宣傳費, 但晢晢喺呢個機構參加過o既活動(包括幼潛及幼兒樂園)真係好到不得了! 如果冇導師提點, 媽媽跟本唔會諗到幾個月o既BB會聽得明又做得到指令, 亦唔會想到佢哋雙小手會做到咁多動作, 更加想唔到佢哋個小腦袋會發展得如此快…  

婆婆成日都話:「估唔到晢晢又做到喎!」係呀, 如果唔係得到導師啟發, 媽媽跟本唔會同晢晢嘗試咁多「挑戰」, 唔試過都唔知, 原來小朋友o既潛能可以咁強!!!  

媽媽好慶幸參加到呢度o既活動, 令媽媽學懂喺晢晢唔同階段如何幫助佢發展。 小朋友大得好快, 錯過咗就錯過架啦!  

所以媽媽真係好感激每一位導師, 包括梁姨姨, 婷姨姨, 仲有機構負責人廖太! 晢晢B今日畢業喇! 正式進入人生另一階段, 希望晢晢能快快適應校園生活, 繼續愉快學習啦!  

睇返今堂最後一堂做過D乜先~!  

未開始上堂, 晢晢同Anna好多計傾咁wor…

 

玩撈波波遊戲, 要按指定顏色撈架~!

 

茶點時間 – 今堂係整PIZZA, 婷姨姨好細心, 知道晢晢唔鍾意食粟米粒, 特登預備一份小粟米畀晢晢…

整PIZZA時, 晢晢好專心切腸仔, 然後好細心咁將材料放上方包上, 其間好乖仔冇偷食, 直到媽媽批准「好啦, 畀你食一粒啦」晢晢先出手拎咗一粒嚟食…

晢晢:「好香呀! 食得未呀?」

開餐前, 同學仔日朗對晢晢個毛巾盒好有興趣, 互相交流一翻~!

 

終於食得啦! 以為咁香晢晢會鍾意食, 點知搣咗幾粒腸仔同粟米出嚟食之後就將片PIZZA冷落…

 

食飽飽, 放好餐具, 就正正式式跟婷姨姨SAY BYE BYE啦… 臨離開課室時, 婷姨姨跟晢晢來一個BIG HUG, 然後一起合照, 晢晢貫徹始終「米」字笑容~!

 

呢個場面, 媽媽睇見都有D眼濕濕, 媽媽真係好唔捨得婷姨姨呀, 希望有緣再見啦~! (小記: 一個星期後, 晢晢唔駛再返幼兒樂園, 我哋帶咗佢返教會, 聚會其間晢晢突然問媽媽: 「婷姨姨呢?」… 原來晢晢都好掛住婷姨姨架!)  

在此, 媽媽再一次衷心多謝各位導師悉心教導, 令媽媽同晢晢都獲益良多!

晢晢枕邊話 07.03.10

呢一晚, 講完晒床邊故事後,晢晢同媽媽有以下對話…

晢晢:『我要搭飛機呀!』(突如其來的要求, 嚇咗媽媽一跳!)

媽媽: 『你想搭飛機去邊呀?』

晢晢: 『我想去睇Alligator呀!』(吓!! 睇Alligator??? 仔, 你到底想去邊???)

媽媽: 『晢晢咁想搭飛機, 媽媽遲D帶你去啦!』

晢晢: 『爸爸冇錢wor…』(晢晢突然爆出呢句令媽媽十分愕然! 點會諗到佢會知道搭飛機要錢!?)

媽媽: 『爸爸冇錢呀~ 咁媽咪呢?』

晢晢: 『媽媽都冇錢wor…』

媽媽: 『咁晢晢呢?』

晢晢: 『晢晢都冇錢wor…』

媽媽: 『咁我哋個個都冇錢, 點搭飛機睇Alligator呀??』

晢晢: 『…』 (靜默)

媽媽:『好啦, 晢晢咁想搭飛機, 爸爸媽媽就1蚊1蚊咁儲, 儲到夠就齊齊飛啦! 好唔好?』

晢晢: 『好!』

此時爸爸正拎咗支奶奶入房...

晢晢:『爸爸! 我想搭飛機呀!』『我要睇Alligator呀!』(講得好大聲! 意向十分清晰!)

爸爸: 『哈哈哈….』(或者對晢晢突如其o來既要求唔知點回應, 所以唯有笑!)

媽媽: (打完場)『好啦, 儲夠錢就去一齊搭飛機啦!』 

晢晢, 媽媽何嘗唔係又係好想搭飛機(但唔一定要睇Alligator), 不過爸爸工作依然好忙, 媽媽又唔敢單拖帶你出國… 遲D希望爸爸會冇咁忙, 然後一家人可以飛返次啦~!

 

上學的第5週

3月1日(星期一): 呢日係weekend後第一日上學, 媽媽有點緊張。呢朝媽媽都有加入行列跟爸爸一齊送晢晢返學, 由起床到入到課室晢晢都好聽話, 又自動自覺, 我哋就趁晢晢埋位放書包時離開, 以為大功告成, 點知一到校門外o既玻璃窗一「裝」… oh… 晢晢喊得好淒涼, 可能一令轉頭就唔見咗爸爸媽媽, 所以感到好失落啦, 媽媽睇見都好心痛, 不過爸爸話:「佢都要學架啦!」又係o既~~ 媽媽都要學識忍心d先得! 到放學時, 因為呢日婆婆有要事在身, 所以接放學就交由工人姐姐負責, 姐姐話晢晢放學又係喊到「鬼鍊喉」, 又係一伏低就瞓, 媽媽12:45pm打返去都仲瞓緊, 飯都未食… 我諗晢晢一定好攰… 點算呢??? 日日都係咁, 點先幫到佢呢???  

3月2日(星期二): 呢日由爸爸送返學, 情況十分順利, 爸爸亦係趁爸爸唔為意下偷偷溜走。到放學時, 由工人姐姐負責, 晢晢又係一見到姐姐就喊, 不過一抱起就好快收聲, 都算係咁…  

3月3日(星期三): 經過連續咁多日放學都喊, 媽媽加強思想教育力度! 日日問住:l「晢晢, 放學駛唔駛喊呀?」晢晢:「唔駛, 要笑笑」。呢朝早, 媽媽放假, 可以專誠送晢晢返學! 到咗校門, 老師示意晢晢向我哋揮手說再見, 不過晢晢即刻喊到好淒涼, 我哋唔想嚇怕佢, 所以立刻隨後跟上跟晢晢一齊到課室, 直到晢晢唔為意時溜走。 難得可以親自到學校, 媽媽就順道跟老師了解一下晢晢上課情況, 老師話晢晢上課投入, 尤以英文堂反應最好, 好多問題都會答。 到放學時, 媽媽親自接晢晢, 今次晢晢終於守諾言, 係笑住放學啦! 仲叻到特登走返轉頭, 好風騷咁同老師say BYE BYE先走~! 媽媽見佢咁乖, 獎咗佢食一粒得x素提子糖, 晢晢笑得更甜~!  

3月4日(星期四): 媽媽依然放假中, 所以都係由媽媽管接管送, 情況十分順利, 放學亦係笑住走出嚟。 另外呢日係第一冇著片返學, 晢晢好叻仔冇賴尿! 好抵錫!  

3月5日(星期五): 太公出殯, 請假一天。 

呢個星期整體表現算唔錯, 真感恩! 下個星期要繼續努力呀!!