陶。晢。愛。這個家

2011年1月5日星期三

返工啦~! 30.12.10

放咗11個星期產假, 終於要回到工作崗位啦!

產假其間, 媽媽時不時都會向晢晢預告…

媽媽:『媽咪就快返工啦! 媽咪返工果陣晢晢唔可以扭媽咪計, 因為媽咪要趕shuttle bus, 晢晢要聽Ciki姐姐話, 乖乖刷牙洗面換校服… 知唔知道?』

晢晢:『咁媽咪放工呢?』

媽媽:『媽咪放工就會趕返屋企陪晢晢玩架啦!』

晢晢:『咁唔返工呢?』

媽媽:『唔返工咪好似而家咁陪住晢晢lor~!』

(問題沒完沒了…)

到正式返工的早上, 晢晢睇見媽媽真係要返工, 就自己搵Ciki姐姐玩, 又乖乖跟Ciki姐姐刷牙洗面, 真係一d都冇扭媽咪計! 之前同婆婆提起過媽媽o既擔憂(擔心晢晢唔肯跟姐姐), 但婆婆好快就話:『唏~ 你駛擔心, 佢正一世界仔, 冇得跟你佢自己會黐第二個~~』果然所言非虛…

媽媽放假期間特意接晢晢放學, 晢晢見到媽媽時個驚喜樣令媽媽十分難忘~! (呢日爸爸正於上海工幹)

而陶陶呢, 媽媽一直都為未能feed on schedule 而擔心, 本打算返工前一個星期開始用樽餵, 但由於每日節目都非常緊湊, 所以一直拖到返工前一日先實行到! 幸好陶陶適應得好好, 第一日已經可以每3個鐘一餐(5oz each), 食飽玩一陣就自然入睡, 真抵鍚~! 而且喺媽媽努力儲奶下, 陶陶仍可以全人奶, 真的好感恩~!

婆婆堅持要畀奶咀, 幸好陶陶食10次有9次都喊~ 叻女!! YEAH!!!

而媽媽回到工作崗位都好快適應, 感覺, 就好似只放咗一星期假咁, 所有工作程序, PW都好似『上身』般唔駛經過腦袋已經會做出嚟, 真奇異!

希望之後都一直順利啦~!

2011年1月3日星期一

艾篙PLAYGROUP 2 – 第十三堂 – 18.12.10

上堂前仲好靚仔...

呢堂晢晢受傷呀! 眼角撞到枱, 腫咗, 幾日後散瘀眼皮仲黑咗一大撻! 唉… 之前同學抓到o既疤痕仲未退又嚟多劑… Kevin哥哥打嚟果陣都好唔好意思, 不過意外o既嘢都冇人想, 媽媽都冇怪責Kevin哥哥~!

腫咗少許, 損咗少少...

不過呢次受傷又見到原來d同學仔都幾鍚晢晢過喎, 見到佢受傷會攬住安慰佢, 又叫佢唔好喊, 晢晢真幸福~!

一開始係音樂課…

重溫 drmfs --- 晢晢仍然唱漏個『r』, 要人提先唱到~! (媽媽喺屋企同晢晢練習, 晢晢連1粒音都唔肯唱, 所以喺課堂上肯唱d mfs已經好好啦~!)

重溫手號 --- 晢晢只記得少少, 但溫習後表現又不錯~! (不過返到屋企媽媽問佢又係一個都唔做!)

音樂+大肌肉 --- 先砌樓梯, 晢晢初時未掌握到, 想對齊向上砌(樓梯應一級級咁砌), Kevin哥哥刻意叫晢晢自己試下拆過再砌藉以提高觸感記憶, 後來表現不錯~!

完成樓梯後, 小朋友要邊行樓梯邊唱, 向上行時唱drmfs, 向下行時唱sfmrd, 晢晢基本上算是掌握到向上, 但比較心急, Kevin哥哥唱d時, 晢晢好快就唱r, 但Kevin哥哥其實係想唱m~! 到向下行時, 晢晢好多時顧住行樓梯而忘記唱~!

課堂下半部份 --- 『Colourful』

主要係玩遊戲『Colourful』, 剛剛早前媽媽先買咗, 但晢晢興趣不大, 所以收埋咗,不過Kevin哥哥話晢晢玩得好認真! 或許因為有其他小朋友一齊做, 所以有心機玩~!

晢晢表現…

間中會有鏡面情況, 不過提佢『睇清楚啱唔啱!?』, 佢又識更正返~!

另外, Kevin哥哥又發現晢晢有『主題/背倒轉問題』, 例如明明係要『底色透明, 藍色星星』的膠片, 但晢晢會拎錯咗『底色藍色, 透明星星』的膠片, 問佢『睇清楚啱唔啱!?』, 佢都堅持自己冇錯, Kevin哥哥知道我哋有呢份遊戲, 所以叫媽媽喺屋企試下玩下睇下係咪真係有呢個問題!

課後餘慶...

咁啱遇到『舞蹈日』, 晢晢睇咗一陣~!

之後又到公園玩啦~!

艾篙PLAYGROUP 2 – 第十二堂 ~ 11.12.10

實在隔太耐先紀錄啦, 希望唔會忘得太多…

生命自然探索 ~ 讓小朋友認識生命的成長, 例如: 蟲變蝴蝶, 科斗變青蛙…

晢晢表現:

只識叫butterfly 同 frog, 聽到同學仔講『蝴蝶』『青蛙』時顯得有點迷茫~! (明明晢晢識中文架, 都唔知點解會咁!?), 另外, 科斗就唔知點解叫咗佢做『黃豆』!?

Surmen姐姐以敍述故事形式講解動物成長過程, 藉以加深印象, 例如: 『蟲蟲, 爬爬爬, 長大變蝴蝶, 飛飛飛…』效果不錯! 晢晢能自己講返一次出嚟, 返到屋企媽媽考佢都仲識答~!

之後做排序, 例如: 小狗變大狗, 小貓變大貓, BB變小朋友變大人… 晢晢表現不錯, 懂得用『以前』係xxx, 『之後』係xxx 表達時序, 亦明白BB係由媽媽個肚長大(當然, 晢晢見證住媽媽生妹妹~!) 不過, 晢晢跟大部份小朋友一樣, 都會形容長大至成年人幅圖為『爸爸』, 小朋友長大咗變『爸爸』… 好搞笑~!