閃電王 2 + PLAY HOUSE – (3Y8M) – 22.08.11

<閃電王2> ~~ 晢晢呢位FANS點會錯過~!?

當知道閃電王暑假出第二集時, 爸爸媽媽已一早預咗要帶晢晢去睇, 只係考慮選日子問題…

咁橋某日爸爸到玩具反斗城買玩具時, 眼尾望到一張單張, 上面寫住有抽獎, 其中一份獎品係<閃電王2>戲票兩張, 爸爸見有時間就填填抽獎卷, 許多日之後, 耐到差不多將此事忘記時, 爸爸突然收到電郵通知領獎, 獎品正是<閃電王2>戲票兩張!!! 嘩~~~ 又會咁好彩嘅!!!

領取換領卷都有一段日子, 因為爸爸怕weekend人多, 所以堅持平日去睇, 但由於晢晢每天的暑假班都『密不透風』, 所以度了很久才度出個期, 最後鐵定8月22日(星期一), 即遊船河第二天齊齊請假(+逃學)去輕鬆下~!

是日節目冇預到陶陶~~ SORRY啊~~~!

因為爸爸想睇完戲仲有時間行街, 所以揀咗早場11:20AM, 朝早餵完陶陶吃奶奶就要拿拿林出發咯~!

準備入場啦~! 爆谷唔少得~!

入場前巧遇BAT MAN, 晢晢要求合照

仲有SUPER MAN, 原來晢晢唔係好識佢個喎…

全套戲個多小時, 說真的, 真的頗悶, 主要原因是故事內容太複雜, 新角色又唔突出  總之趣味欠奉! 接近尾聲, 晢晢更睡著了!!! 連fans都悶到瞓著, 可想而知有多糟!!! (絶對不是先入為主, 但確實係第一集好睇好多!!!)

好在, 到完場時媽媽叫醒晢晢問佢好唔好睇時, 佢都仲識捽住雙眼答:『好睇…』, 仲未至於悶到唔識比反應~!

因為睇早場, 所以完場後食埋個long lunch 時間仍然好早, 於是又要諗節目, 剛巧外面又落雨, 媽媽就想到室內遊樂場, 然後又突然想起一間位於觀塘的, 就拿起手機search一下, 發現PLAY TOWN就在觀塘地鐵站附近! 爸爸本來極不願意到每天工作的地區, 但因為想不到其他好去處, 於是唯有順從….

誰不知一去到打開lift門時… 咦! 點解係酒樓嚟架!!!??? 此時才知道PLAY TOWN原來已結業一段時間, 爸爸當然又微言幾句, 媽媽心諗:『鬼知咩! 佢執凹果陣又冇登大字報!!!』, 最後唯有改變行程到Mega box PLAY HOUSE… 搭lift離開時晢晢都感到奇怪, 問:『又搭lift嘅???』媽媽唯有話:『係呀! 搭完lift要再搭的士先去到架~!』 晢晢就傻間間地答:『哈哈~~ 去遊樂場又搭lift, 又要搭的士咁奇怪嘅???』

排除萬難終於來到PLAY HOUSE了… 雖然地方(在大人眼中)不算大, 但晢晢郤玩得非常盡興!! 爸爸見晢晢成個暑假都冇認真玩過, 所以都打算由得佢玩到夠為止, 而媽媽都想測試下晢晢要玩幾耐先識停…

 

一直由得佢玩, 直到3個鐘頭後, 因為已經7點多, 飯又未食, 又趕住回家餵陶陶, 於是爸爸就開聲:『晢晢, 走喇!』晢晢的反應竟然是:『哦, 知道!』… 明顯地已夠晒皮~~ 哈哈~~~

離開後吃了個美味的台灣菜(或許肚餓)就回府了~~~

呢日的節目相信晢晢相當滿意~! 媽媽見到晢晢開心都感到好欣慰~~

晢晢, 你大個睇到呢編卜就唔好話媽媽暑假冇帶你去玩啦~~ 哈哈~~~

夏日遊船河 (3Y8M/10M2W) – 21.08.11

HOT HOT SUMMER~!

今個暑假, 媽媽除了報暑期班外, 還安排了兩個戶外暑期活動, 其中一個是曹公潭day camp (可惜當日陶陶發高燒而泡湯), 另一個就是壓軸活動 ~~~ 遊船河!!!

出發前一天, 媽媽話畀晢晢知:『我哋聽日去遊船河呀!』晢晢興奮心情一直延續至第二朝! 一早起床就心急到自己主動刷牙洗面換衫兼著埋鞋等出門, 更催促:『快d啦! 我哋去遊船河呀! 要搭船去沙灘呀!!!』

呢日天氣好熱好熱, 不止陽光猛烈, 空氣更像靜止般連半點風都沒有! 幸好一向不怕熱的晢晢心情仍然十分良好, 但是媽媽郤熱得差點連說話都不想說…

乘旅遊巴到達西貢碼頭後, 等了約15分鐘船到達了!!! 說真的, 一看見首船其實是有丁點失望的, 實在頗殘舊… 但領隊說只有這款船才容得下80多人… 都到了這個地步, 就只能夠接受…

上船後的第一站是吃海鮮午餐, 在一個完全無風+無風扇的海邊吃飯真的吃不消!! 熱得媽媽也少有地贊同爸爸買雪條給晢晢降温, 而媽媽也極速渴了罐汽水, 然後邊吃飯邊為午睡中的陶陶撥扇…

一個鐘頭後, 大家就向廈門灣出發! 到達時看到沙灘擠得滿滿媽媽都嚇一跳, 估不到那麼偏遠的一個海灘會那麼受歡迎!!?? 我們勉強地選好位置settle down後, 爸爸就帶晢晢游水降温, 媽媽就陪陶陶玩沙… 不過, 因為到達時人很多, 又要顧住陶陶, 又要看守財物, 所以全程都冇拎到相機出嚟影相… 只用手機拍了幾張…

大約15分鐘, 天氣熱得像火爐!!! 媽媽都顧不得太陽伯伯有多猛烈, 就抱埋陶陶去游水!!! 一落水~~ wooo~~~ 爽呀!!! 很清涼, 很舒服~~~ 陶陶都十分興奮, 不停笑, 不停拍打水花, 可惜媽媽沒有預備一個合適的水泡(只有一個頸圈水泡格硬放在腰間用), 否則一定玩得更暢快~!

而晢晢一向愛沙愛水, 當然都樂在其中! 爸爸帶他游下水, 又帶他衝衝浪, 玩了一會又走回頭玩沙去, 完全不怕猛烈的陽光! (可惜連一張照片都沒拍到…)

媽媽和陶陶游了一會, 發現陶陶皮膚開始發紅, 便打算上岸補點防晒再游過, 誰不知上岸後發現防晒用品不翼而飛!!! 媽媽怕陶陶會晒傷, 所以只好無奈地和陶陶先行沖身, 然後到有瓦遮頭的地方休息…

過了一會, 晢晢和Yoyo表姐都玩夠兼換好衫來到媽媽這裡, 他們餓鬼上身般不停叫:『好肚餓呀! 好肚餓呀!』媽媽拎盒手指餅出嚟, 眨下眼就畀佢哋食晒!!! 然後再要求食這個, 食那個, 一直食到回程都還在食… 媽媽都未見過晢晢如『渴食』呢~!

回到西貢碼頭, 爸爸和晢晢一起到運動場沖身(因為廈門灣是沒有淡水的!!!), 而媽媽和陶陶因為女更衣室人太多, 所以唯有繼續『yip咸魚』直到回家…

在車上晢晢10秒不到就呼呼大睡, 陶陶就剛好差足電左拎右拎, 媽媽把陶陶交畀爸爸照顧咯~~~

這次遊船河活動雖然很辛苦(尤其天氣實在很熱), 但若果明年再有機會媽媽還是會參加的, 因為看到兩個孩子都玩得開心, 已經值返晒~! (不過明年一定會準備好些, 尤其是防晒衫, 一旦支防晒液生咗對翼出嚟都唔駛咁愁..)

小記: 不得不提, 這個廈門灣其實不太適合幼兒游水, 岸邊有大量尖石, 浪又不小, 小朋友若站不穩跌低可說是必然會受傷! 其次是沒有淡水沖身, 只有水壓極微弱的稀釋咸水, 媽媽花了很長時間才勉強沖走陶陶身上的沙! 媽媽直頭放棄, 抺乾身就換回便服, 很不方便!!! 希望明年不會再安排到這個沙灘….

後記: 船河第二天, 爸爸背脊晒傷了, 幾日後更甩皮(像發毛一樣!), 陶陶和媽媽都晒黑了少許, 而晢晢呢… 曝曬得最耐反而一點陽光的痕跡都沒有! 或許晢晢的膚色已黑到盡頭吧…