晢晢識反身啦! 2008年4月21日4am

尋晚半夜餵奶時, 晢晢慣性咁向左側身搵我GG想食奶, 唔知係唔係因為心急要食, 竟然拎過咗龍, 成個人反轉咗扒咗喺度! 雖然果陣已經係半夜4點幾, 但我都忍唔住叫聽爸爸齊齊睇! 我哋一齊會心微笑~~

BB, 你每學識一樣嘢我哋都會感到好恩惠, 好為你自豪, 好感恩~!

BB, 你真係好叻仔, 爸爸媽咪錫晒您~!

奶媽唔易做 -- 4個月

仲有幾日, bb就四個月大啦~! 啫係話, 我都差不多餵咗四個月人奶~~~

 

其實我都唔知點解我咁辛苦自己會餵人奶, 好似唔夠瞓啦, 谷奶會痛啦, 街又唔敢出得耐, 要趕頭趕命泵奶...好困身! 又成日怕唔夠奶要介口, 又怕身材走樣… 不過, 母愛真係可以蓋過一切, 見到bb啜我我都會好開心, 幾辛苦都可以捱得過… 我好想影相拍片留個紀念, 我怕唔知幾時bb就唔肯啜我啦…

 

其實由陀住bb開始已下好大決心要餵人奶, 基本上一直都冇諗過要餵奶粉, 因為我想比佢最好, 想佢健康d! 不過話就係咁話, 其實初初都冇乜信心~! 怕自己唔夠奶, 怕自己唔捱得苦~!

 

初初餵時真係好辛苦, 傷口又痛, 又要半夜起身泵奶, 又要洗泵洗樽… 好多好多嘢做, 果陣時成日都祈禱, 求神比我足夠o既奶量比bb! 神真係好看顧, 賜福! 我o既奶量一日比一日多, 而家bb夠食之餘, 仲可以比佢沖涼~! 以我咁o既瘦削身型, 真係冇人估到, 所以在神真係冇難成o既事, 真係好感恩呀~!

 

其實餵人奶, 除咗我辛苦之外, 佳佳都要同我一齊捱, 我唔夠訓或者bb唔啜我我都會發好大脾氣, 佳佳當然係硬食~! 其實都知自己唔啱, 唔可以成日搵佳佳做出氣袋, 對佢真係唔係幾好, 但我成日都本住"餵奶大晒"o既心態, 所以一直都唔想開口話佢知我自己都覺得自己唔啱, 怕自己做唔到佳佳仲唔開心~! 但唔知點解, 尋晚放工行去媽媽屋企o既路上, 我真係感到好內疚, 我就為我o既脾氣祈禱… 之後返到自己屋企, 我同佳佳一齊執衫時我諗咗一陣就鼓起勇氣同佳佳講: “其實我慣性發脾氣真係唔係幾好呵…”, 佳佳就話: “第時亞仔學咗你就C啦…”

 

講完之後, 雖然短短幾句, 但係我心裡面, 好似許下咗承諾唔會再亂發脾氣咁, 我心情都好似放鬆咗好多, 冇咁忟~! 而bb都好乖咁冇食夜奶, 今朝我都係7am先起身泵奶, 好夠瞓~~~ 神呀~! 你o既恩典真係好多好多, 好感激你o既體貼~!

開工啦!

終於返工啦! 放咗成10個weeks要返返工真係有d唔慣, 好攰, 好眼訓…尤其半夜仲要泵奶, 一大朝早又要餵奶...再加上尋晚個肚唔舒服, 今朝又肚疴, 撘車時仲有作嘔, 所以都幾不在狀態... 今日帶咗盒飯都食唔落, 叫咗同事幫我買咗兩碗白粥做早餐同lunch, 所以我今日只係食白粥咋, 但都幾谷奶wor… 幸好今日都唔算忙, 仲可以鼠到出去擠咗兩次奶tim(一次5oz, 第二次7oz),一陣間5點到再擠多次就收工~~ 我要快d返屋企見bb呀!!!!!

 

感謝主! 神好祝福bb, 我奶量都好夠, 係我意料之外, 希望我至少都餵到6個月啦! 主呀! 求祢幫助我有毅力keep住餵人奶, 比bb最好!  

爸爸電髮呀! >.<!

爸爸個頭自從我地拍拖開始就一直都係我剪o既, 但到我35wk開始, 爸爸個頭就冇剪過啦, 因為爸爸怕我辛苦就冇叫我幫佢剪, 一直到我生咗, BB都滿月, 終於都比我哦到佢肯去Salon剪啦!

今日2:00pm我就呢呢林林帶埋呀仔吹爸爸出門口去剪頭髮, 諗住剪完一齊食tea, 4pm就可以返屋企餵仔, 點知...

爸爸入咗Salon, 我就推BB四圍走, 本來諗住行百佳, 點知佢裝修勁大塵我就推BB走咗... 之後係咁行行行, 好肚餓, 又口渴, 但都冇買嘢食, 諗住留肚同爸爸食tea嘛... 跟住又係咁行, 行到好攰, 我睇吓隻錶! 吓3:30pm啦woo, 仲未打比我o既, 我就call佢啦, 佢先話我聽佢電緊髮, 冇咁快! 咁BB又夠鐘食奶, 我又冇帶鎖匙, 唯有再推推推返BB去髮型屋搵爸爸拎鎖匙然後趕返屋企啦!

回家途中, 勁肚餓口渴, 諗住去SEVEN買嘢飲啦, 但個門口都推唔入架BB車, 咁唯有忍住急急腳返屋企先算~ 返到來立刻飲咗兩杯水, 餵埋BB我先食幾塊餅頂肚餓, 之後我就忍唔住攬住亞仔喊, 覺得爸爸好衰, 唔理我同個仔自己想做乜就做乜! 明明講好一齊食tea, 明知我餓, 明知BB趕住食奶奶, 可以粒聲唔出自己電髮, 唔理兩母子死活!

我不斷問自己, 嬲唔嬲佢好呢? 鬧唔鬧佢好呢? 諗諗吓, 唉! 算啦! 個個人都有貪靚o既時候, 我知佢恨電髮恨咗好耐架啦! 既然佢電得咁開心, 可必掃佢興? 咁我就收起咗D嬲, 當冇事, 大方D啦! 但係到而家都有少少唔開心lor... 唔知爸爸feel唔feel到呢?

BB, 如果你睇到呢一編唔好覺得爸爸好衰呀! 其實爸爸對我哋好好架, 只不過佢有少少大細路, 一時樂極忘型啫~~!! 你記住要愛爸爸呀!

聽日同BB拎出世紙啦! 2008年1月12日

BB, 你個名叫翱晢, 英文名叫Adrian, 爸爸媽媽聽日就會同你拎出世紙啦!

BB個名其實係陀緊果陣諗o既, 果陣仲諗咗幾個(ie: 翱迦, 安晢, 柏翱, 翱霖, 翱晢...), 爸爸接BB返屋企果日, 我就問爸爸BB叫咩嘢名好, 爸爸就好快, 好肯定咁講: "翱晢啦!", 我見爸爸都咁肯定, 我就同意咗, 仲好快咁話: "咁佢個英文名就叫Pang, 唔要O Chi 呢D.." 我哋就係幾句短短o既對話就決定咗BB個名啦!

同日, 媽媽上咗我屋企, 我就急不及待同媽媽講: "我哋諗住叫BB個名做彭翱晢", 媽媽個反應好似話我知佢唔太鍾意, 仲話個晢字音好沈, 唔夠響, 仲有冇其他選擇?... 我聽完個心都沈一沈: "吓, 又要諗過, 好煩woo?"... 過咗幾日, 我D屋企人上來我屋企做冬傾開BB個名, 佢哋又講: "真係叫亞晢呀?" 我二姐話: "個晢字好似好cool咁..." 佢哋有建議過叫翱澄...

聽完之後個心都唔係好舒服, 成日都諗個名係咪真係唔好呢? 成日都想諗過另一個名比BB.. 有時我想同爸爸傾, 但佢冇乜比反應我, 我諗佢要D時間諗掛... 之後幾日我都冇再提呢件事, 係到某日我再問爸爸: "BB係咪真係叫翱晢?", 佢又有肯定咁講: "係呀!", 咁我就知爸爸真係鍾意呢個名, 咁好啦, 就叫翱晢啦!

翱晢o既意思, 翱-翱翔, 晢-光明 ,爸爸媽媽想BB翱翔喺光明之中, 做個光明之子~!

1月6日, BB滿月果日o既早上, 教會好多人打來賀BB, Fanny問開BB叫乜嘢名, 我就話佢知BB叫"翱晢", 佢就即刻話好聽... 唔知係咪真呀, 但在我就感到好安慰, 好似放下心頭大石咁, 終於有人認同啦!

BB, 聽日拎咗出世紙個名就冇得改o架啦, 希望你都鍾意彭翱晢呢個名啦! 晢晢, I LOVE YOU!!!

第一次帶BB打針

今日第一次帶BB打針, 心情都有D緊張, 我肉痛佢比人拮之餘, 又擔心佢會唔會喊到拆天呢?會唔會發燒? 會唔會影響胃口??? 唉, 做亞媽就係咁多嘢擔心o架啦~~~

到咗健康院, 首先睇咗D黃先, 個醫生話佢都退咗好多, 係D皮膚未退晒, 要再觀察, 1月21日再返去再check, 都好... 跟住我順口問醫生我餵4oz一餐(3hr一次)會唔會太多(亞媽成日話我餵得太多!), 醫生就話食幾多唔係大人決定, 係BB決定, 你發覺BB唔夠食就要加比佢o架啦... 聽完之後, 我就決定加返半oz比BB, 佢一直都食開4.5-5oz架嘛, 係婆婆話太多我先減~~

見完醫生就要打針啦...

入到打針房, BB其實都瞓咗, 咁我就係咁叫BB唔好睇, 我怕佢驚(其實係我驚就真), 見到姑娘拮落去果下我都真係有D赤, 心諗: "姑娘, 快手D啦!", 亞B就即刻醒晒之餘, 仲喊到豬頭咁, 成塊面紅晒, 我仲諗要有呵佢好耐, 點知BB好"UN"皮, 未出打針房已經唔喊, 仲瞓返tim! 我問埋姑娘, 佢話呢支針打完係唔會發燒的... ohho, 放心晒!

BB, 你要健康成長呀! 錫晒您~!

BB滿月啦~!

BB, 今日係2007年1月6日, 你今日滿月啦!

一個月前, 你仲係我個肚肚度掙扎要"捐"出o來, 今日你已經一個月大, 會喊, 會笑, 會摟抱, 會係我懷抱食奶奶...

雖然同你"相認"只係短短o既一個月, 但係你已經成為咗我o既寶貝... 媽媽真係好愛你o架, 無論幾辛苦, 媽媽都會比你最好o既... 你大個都要聽話, 唔好激我咁多, 唔係媽媽就會好傷心o架啦!

今晚我哋就會同婆婆, 公公, 太公, 姨媽姨丈x2, 仲有表姐悠悠去同你食飯慶祝, 不過你就冇份食lu!! heehee

BB, 你要健康成長, 精乖伶俐呀!!