屋企多個妹妹, 晢晢適應麼?

屋企添個小寶貝當然高興, 但媽媽依然好擔心晢晢o既反應, 雖然陀住妹妹時晢晢都好期待妹妹出世, 但到屋企真係多個人時, 晢晢又接唔接受到呢!?

就喺媽媽住院第二日, 婆婆就傳來壞消息... 老師話呢日晢晢情緒有點波動, 唔肯換鞋, 又大喊兼掟鞋!!! 媽媽聽到十分擔心, 但當晢晢到醫院探媽媽時, 又跟平日一樣乖巧, 好似冇事發生過一樣...

到媽媽同妹妹出院返屋企時, 晢晢仲好開心咁迎接我哋, 又不停歡呼:『妹妹, 妹妹, 妹妹返嚟啦!!! 快d畀我睇吓妹妹啦~!』不過幾日後, 晢晢情緒變得愈來愈差, 好少事都發脾氣, 又咩人都唔跟, 只要媽咪同爸爸! (但爸爸喺媽媽出院後就要返工, 所以晢晢就只要媽咪...)

有一日, 晢晢瞓醒午覺, 一出到客廳就不停大喊, 因為當時媽媽餵緊妹妹, 所以工人, 婆婆, 姨媽等都打算幫忙安慰晢晢, 可惜晢晢喊得更厲害更激動!!! 好不容易等到妹妹吃飽, 媽媽立即走到晢晢身邊, 張開雙手示意抱佢, 晢晢就樸向媽媽邊飲泣邊叫:『媽咪...媽咪...』媽媽個心有如刀割, 忍唔住同佢喊埋一份... 媽媽感受到晢晢好似冇晒安全感咁, 心裡有個缺口需要媽媽去填補... 然後媽媽就同晢晢講:『晢晢唔駛喊, 媽咪攬住咗你啦』不久, 晢晢就笑返...

除咗以上呢件事, 晢晢每朝臨返學同放學返到屋企都慣性扭計! 有日媽媽終忍唔住恨恨咁鬧佢一餐(因為媽媽唔想因為怕佢心理受到影響而忽略管教)! 結果, 晢晢痛哭咗差不多廿分鐘, 到佢平靜後媽媽就親自送佢返學氹返佢, 免得佢以為媽媽有咗妹妹就鬧佢, 冷落佢... 幸好, 晢晢一落樓就笑返, 而且自始亦少咗扭計~!

喺weekend, 爸爸都會盡可能陪晢晢玩, 又帶佢去街散心~! 喺啱啱o既星期日, 我哋一家四口趁天氣好更舉家到樓下公園玩(媽媽就同妹妹就坐埋一邊)散散悶氣, 大家心情都靚返好多~!

不經不覺妹妹已十多日大, 晢晢似乎已經漸漸適應, 情緒不再無顧失控, 而且都幾幫得手, 妹妹賴咗豬豬會幫手拎片片, 妹妹喊會幫手藹吓妹妹~~~ 媽媽鬆咗口氣~!

雖然晢晢初時有點反常, 但其實晢晢都幾鍚妹妹, 時時都話要抱佢, 每朝第一件事都係要睇妹妹~! 所以晢晢都算係一個好哥哥嚟o既~~~

 

 

我不會做奶媽

媽媽生完妹妹第4日就上奶, 加上有餵晢晢年半的經驗, 本以為呢次一次冇難度, 點知...

妹妹4日大就出院返屋企, 胸有成竹的媽媽奶粉都冇買諗住開始全埋身, 全人奶生涯! 點知惡夢不久就開始...

媽媽大約2:30pm餵第一餐, 點知一餵就餵到6點咁滯!!! 左右左右, 來來回回都唔知食咗幾多次, 而且兩邊nipples都已經啜到損晒兼出晒血(劇痛!)!!! 但妹妹依然食極都唔飽咁! 仔細檢查妹妹輸出情況... 唉! 大件事, 片仍是乾乾的, 即幾個鐘頭妹妹係白啜!!! 媽媽十分焦急!!!

媽媽明明係有奶, 完全唔明白點解妹妹食極都食唔到!? 於是媽媽心裡的魔鬼出現了, 想泵出嚟畀妹妹食(即又做返個全泵媽)! 幸好爸爸突然化身天使同媽媽講:『咁咪啫係又用返樽!』所以媽媽繼續堅持...

到了晚上, 妹妹依然不停喊餓, 媽媽依然繼續不停餵餵餵... 不久, 媽媽終於發現問題所在!!! 原來媽媽右邊塞咗, 完全出唔到奶!!! 唔怪之得妹妹食極都食唔到啦!!!

於是媽媽不停想辦法整通佢, 包括熱fu, 按摩, 畀妹妹啜多啲等... 可惜通通無效!!! 有朋友建議媽媽沖個熱水沖舒緩, 但妹妹喊食o既頻密情度跟本唔容許媽媽咁做!! 到後來妹妹更因為媽媽右邊太硬而拒絕啜右邊!! 媽媽唯有靠左邊獨力支撐, 但因為姿勢唔正確及過度吸啜, 媽媽個左邊損得更加厲害, 每次都係含住泡眼淚餵...

一整晚冇瞓過覺, 塞o既地方依然塞, 痛o既依然痛, 最慘係妹妹依然未有濕片, 媽媽心情幾近跌落谷低...

到早上, 媽媽就致電QE的母乳姑娘求救, 對方安排媽媽即日到診所見面~! (雖然好遠, 但媽媽再唔解決真怕妹妹會餓壊, 所以立即抱埋妹妹飛的出去!)

母乳姑姑好細心咁幫媽媽解決乳塞問題, 又更正媽媽餵奶姿勢... woo~~ 媽媽睇見妹妹食奶個冧樣, 同前一晚個忟爭樣簡直係兩個人(妹妹終於有奶落肚啦)!! 喺果一刻媽媽先醒覺, 過去果年半餵母乳經驗, 只不過係不停泵奶而已, 對於埋身餵奶, 媽媽只係一個新手, 媽媽實在太過自信, 害妹妹餓了一整日..

呢日婆婆同晢晢都有陪媽媽到診所, 婆婆好留心聽姑娘指導, 返到屋企見媽媽做得唔啱都會更正返媽媽, 而晢晢亦有聽姑娘講, 喺媽媽餵緊奶時幫媽媽按摩肩膀放鬆... 餵人奶得到屋企人支持真的好緊要!!!

就由呢日開始, 妹妹終於有濕片, 有boo boo, 而且每餐所隔o既時間長咗, 唔再係不停喊食, 而且更喺呢一晚開始戒夜奶, 大家都有覺好瞓, 真的好感恩~!

下個挑戰係出街餵奶, 媽媽技巧上仍然雞手鴨腳, 要努力練習先得喇!!! 幸好媽媽身邊有好多有經驗o既朋友賜教, 相信媽媽定能成功克服!!! 加油加油加油!!!

餵人奶咁辛苦, 媽媽依然堅持, 除了母愛驅使, 還有什麼!?

真的好感恩天父讓媽媽再一次當媽媽, 再一次為孩子付出...

妹妹, I LOVE YOU~!