呢朝早我哋一早就出門口準備食早餐, 因為媽媽打算到超市入貨, 所以就推埋BB車出動! 點知一出lift門晢晢就話「我自己嚟! 我自己嚟!」, 堅持要自己推! 開頭媽媽見晢晢論論盡盡都想出手協助, 但爸爸話:「畀晢晢試下自己解決問題啦!」好! 就畀你試下!
結果, 晢晢就由lift口推到目的地, 路程有成10多分鐘, 真有毅力! 
2010年1月8日 星期五
床邊故事 - 過馬路
12月29號晚, 媽媽揀咗<過馬路>呢本書仔作為床邊故事, 晢晢好有興趣呀! 媽媽指住封面同晢晢講呢本書叫「過馬路」時, 佢竟然接住講「要-小-心-呀-!」… 哈哈! 「過馬路, 要小心」, 邊度學返嚟呢?
媽媽刻意將書中小男孩角色叫做「晢晢」, 成人那位就叫做「爸爸」, 咁小女孩呢!? 媽媽情急之下唯有就咁叫佢做「妹妹」, 用意係增加晢晢投入度, 結果係成功o既!!!
已經講咗好幾晚, 晢晢對書入面o既內容都開始熟識啦!
媽媽:「爸爸(書中的角色)話而家唔過得馬路呀? 咁點解呀? 因為…」
晢晢:「因為… 紅燈」
媽媽:「咁而家又咩燈? 可唔可以過馬路呀?」
晢晢:「綠燈, 得!」
略…
媽媽:「除咗紅綠燈, 仲有咩方法過馬路?」
晢晢:「行人隧道… 行人天橋… 」
(當講到書中一角危險過馬路時)
晢晢:「NO! 危險…BOM呀! 嗚嗚… 痛痛呀… ambulance」
略…
媽媽:「咁交通燈壞咗點算呀?」
晢晢:「警察叔叔呀!」(書中有警察叔叔正在指揮交通)
而家每次出街要過馬路時, 晢晢都會第一時間講「過馬路, 要小心!」, 又會指住交通燈講「紅燈/綠燈!」, 亦都會願意拖實大人o既手過馬路! 呢同生活息息相關o既書仔對教導小朋友真係好有幫助!!!
2010年1月7日 星期四
冬日賴人滋潤飲料
晢晢1歲時經常咳嗽, 朋友就教媽媽煲「雪梨燉川貝」畀晢晢飲, 結果飲完1兩(分6次) 果然就好返晒! 之後晢晢再有咳, 媽媽都會燉畀晢晢飲… 不過, 漸漸個人就開始懶
川貝蜜糖水
做法: 川貝粉1/2茶匙 + 60度水半杯 + 蜜糖少許(約1/3茶匙) = 完成!
係咪好簡單呢~!
近來, 爸爸時時咳, 媽媽就諗住開杯川貝蜜糖水畀爸爸潤一潤, 點知爸爸受唔到川貝粉黐住喉嚨o既感覺! 媽媽就再一次請教婆婆… 婆婆又介紹以下兩款:
川貝雪梨無花果水
材料: 乾雪梨片數片 + 川貝粉 1-2 茶匙 + 無花果1粒剪開 + 水1.5~2杯
造法: 將所有材料放到電水煲中, 按制滾起後稍焗片刻, 然後再按制翻滾, 大概重複3次就完成!
因為川貝粉煲過會融融地, 所以唔會再有黐住喉嚨的感覺! 用乾雪梨片o既好處, 就係連批皮, 去芯都唔駛做, 拿起幾片就煲得! 最啱懶人一族!
仲有另一款婆婆推介 – 羅漢果水
材料: 羅漢果半個 + 製過的甘草數片 + 水 1~1.5杯
造法: 將所有材料放到電水煲中, 滾起就一直焗於水煲中, 要飲時再按制返熱就完成!
呢款簡單得嚟非常滋潤! 又好味! 
經婆婆賜教後, 媽媽除咗覺得婆婆非常有智慧外, 仲覺得電水煲實在係好偉大o既發明! 從來冇諗過電水煲可以做出如此滋潤o既飲料~! 推介~!
2010年1月6日 星期三
昂坪360 - 03.01.09
對上一次到昂坪360已經係3年前o既事, 係爸爸媽媽慶祝結婚一週年o既其中一個活動… 不經不覺已經有了晢晢, 仲已經兩歲添咯…
晢晢:「出發啦! YEAH!!」
今次特別選坐「水晶車箱」, 感覺… 好靚之餘亦都好刺激, 因為… 媽媽都有D怕高架!! 但晢晢就好享受喇!
沿途風光好靚! 晢晢不停話:「嘩~ 好高高呀!」
晢晢「米」字又嚟啦~! 引得同車o既姐姐都忍唔住大笑~!
穿過薄霧, 有點坐飛機o既感覺~!
坐咗大概25分鐘, 4點多就到達昂坪, 不過呢日因為遲咗出門口, 所以只能「速」遊(因為要趕搭630pm尾班車!), 原本想嘆碗山水豆腐花都唔夠時間添! (媽媽好想食啊!
晢晢:「終於都到啦! 好嘢!」
晢晢:「Hey girl! My name is Adrian ! Nice to meet you!
行行下, 竟然遇到幾頭牛! 緊係要同晢晢影相留念啦!
之後我哋就到大雄寶殿參觀…
之後我哋又走到「心經簡林」, 一個好寧靜o既地方… 沿路都好靜, 其間我哋問晢晢聽吓有咩聲, 佢留意到雀仔叫聲~!
因為時間有限, 所以行咗一圈就要走喇! 回程o既路上, 媽媽跟晢晢玩發音遊戲, 媽媽專出D古怪發音考考晢晢「QUA QUA QUEE … SHA SHA SHEE … DA DA DEE… BA BA BEE… 」傻豬晢晢又跟住媽媽怪叫, 媽媽一句, 晢晢一句「QUA QUA QUEE … SHA SHA ShEE …」講完自己又忍唔住笑, 真係笑C人!!! 之後晢晢又學人出題考媽媽「WA SHA SHEE… DA BU GUEE… KA SHUK WEE…」有時媽媽會扮講唔到, 晢晢見到媽媽好苦惱個樣就哈哈大笑取笑媽媽… 一路上充滿我哋一家o既笑聲!
夜景一樣咁靚~! 晢晢:「BYE BYE 360」
到了東涌, 巧遇THOMAS, 晢晢即刻跑去合照~!
呢日雖然行程有點趕急, 但其實都幾享受…
用杯飲奶 06.01.2010 (24個月)
晢晢自14個月開始已訓練用開口杯飲水/果汁, 一直都做得唔錯, 而家直頭係十分純熟! 而用開口杯飲奶呢, 其實一早都做到, 但媽媽想晢晢晚上睡得甜一點(吸啜動作有助放鬆), 所以中途又放棄練習, 繼續畀奶樽食奶。 直到近來, 媽媽想到晢晢還有大半個月就要正式上學去(學校是要用杯飲奶的嘛~!), 所以就決心再次進行特訓!
6號晚, 晢晢就開始轉用開口杯飲奶; 其實開始前媽媽是有點猶豫, 因為戒片才剛開始, 又要晢晢接受多一項挑戰!? 似乎有點「難為」他, 所以媽媽有事先徵詢晢晢意願, 問:「晢晢, 今晚試下用杯杯飲奶好唔好呀?」晢晢話:「好! 試下丫!
之後媽媽一手拿著沒有蓋上奶咀的奶樽(裡面有120ml奶), 另一隻手就拿咗一隻空杯; 媽媽先示範「斟一啖, 飲一啖」, 然後叫晢晢跟著做… 當晢晢斟咗一少口奶到杯中時, 媽媽叫停及叫他先飲下才再添, 點知晢晢話:「唔呀! 要好多!」仲做動作表示想斟滿才飲! 媽媽當然冇反對(雖然有點擔心斟得太滿會倒潟!), 結果晢晢冇倒瀉之餘, 更一口接一口把整杯奶飲完!! 其間媽媽不停鼓勵晢晢:「晢晢, 用杯杯飲奶奶係咪好味d呢~~」… 「晢晢好嘢!!! 大啖d!!!」… 「嘩!!! 犀利呀!!!」… 看見他上唇圍著半個白色圈圈, 還有那笑咪咪的樣子, 就知他好有滿足感!
晢晢, 你要繼續努力啊!
2010年1月5日 星期二
HAPPY YEAR 2010!
今年除夕冇咩特別慶祝活動, 媽媽呢日放1點, 放工後就回家休息, 6點再到婆婆家接晢晢, 然後再一次單拖帶晢晢到到爸爸的朋友家跟一大班小朋友開party, 玩到11點多就回家… (因為呢日d小朋友實在有點像馬騮, 情況十分混亂, 所以媽媽連相都冇影
返到屋企, 晢晢已經瞓咗, 安頓好後, 媽媽就跟爸爸看著電視準備倒數, 明明看到瑩光幕顯示還有2分鐘就踏入2010, 但媽媽竟然不知不覺間在按摩椅上睡著了, 情況跟上年一模一樣! 真奇怪! 結果, 媽媽又是迷迷糊糊中踏入新一年! 
2009回顧… 印象最深的就是在年中時, 爸爸工作量的劇變! 由上半年平均每晚8點多回到婆婆家樓下接我們兩母子回家, 還有每個星期五跟媽媽牚枱腳… 一下子就變成每晚超過凌晨2點, 3點, 4點, 5點… 甚至通頂直到第二晚凌晨2點, 3點, 4點, 5點… 才回家! 星期五的約會更不用多說了… 然後又不時要出trip三幾天… 毫無心理準備下, 突然要媽媽每天獨力照顧晢晢, 真的十分吃力! (心邪的朋友, 一定會猜爸爸是有外遇, 不過呢方面晢晢媽是有信心的!
初期, 媽媽真的極度極度唔習慣, 身心俱疲… 日頭要工作, 放工要趕回家照顧晢晢, 教他學習, 打理家務, 真的忙過不停! 有時遇到自己有點不舒服或晢晢扭計就更加難敖! 不過, 當安頓好所有事宜時, 坐下來, 又只得四度牆, 那種空洞的感覺比忙碌更苦… 但媽媽時刻提醒自己, 不可以倒下來, 晢晢還需要媽媽…
日子一天一天的過, 總算適應過來, 不知不覺間媽媽跟晢晢都習慣了WEEKDAY沒有爸爸的日子, 而且媽媽都鍛鍊得比過去強許多, 自問沒有因為獨力照顧晢晢而降低要求, 每項事依然用心做到最好! 相信晢晢都感受得到, 是麼!?
雖然在這半年裡, 爸爸在家的時間很少, 但其實他很努力為這個家付出! 只是看他的頭髮一天比一天疏落, 還有那斷斷續續的咳嗽就知道了…不過就算爸爸WEEKDAY工作多辛勞, WEEKEND都唔會偷賴, 必定會帶晢晢周圍去, 享受天倫樂! 所以, 晢晢都很愛爸爸的啊!
2010年
希望爸爸工作快D上軌道
晢晢乖乖冇扭計
媽媽愈來愈有智慧教導晢晢
總之一家人開開心心啦!
HAPPY NEW YEAR!!!
訂閱：
文章 (Atom)