冬日賴人滋潤飲料

晢晢1歲時經常咳嗽, 朋友就教媽媽煲「雪梨燉川貝」畀晢晢飲, 結果飲完1兩(分6次) 果然就好返晒! 之後晢晢再有咳, 媽媽都會燉畀晢晢飲… 不過, 漸漸個人就開始懶… 雖然材料不多, 但要批皮, 去芯, 放燉中, 加水… 等等的工序… 有時… 嘻嘻… 都要好大決心先做到… 聰明o既婆婆有見及此就介紹咗以下呢款畀媽媽喇!

川貝蜜糖水

做法: 川貝粉1/2茶匙 + 60度水半杯 + 蜜糖少許(約1/3茶匙) = 完成!

係咪好簡單呢~! 而家晢晢每星期都會飲1-2杯補補氣管, 仲成為晢晢「飛弗」添! (日日都叫住「飲甜甜」, 飲到尾仲會要求拎匙更舀d川貝粉食! 婆婆話, 靚o既川貝先唔苦wor!)

近來, 爸爸時時咳, 媽媽就諗住開杯川貝蜜糖水畀爸爸潤一潤, 點知爸爸受唔到川貝粉黐住喉嚨o既感覺! 媽媽就再一次請教婆婆… 婆婆又介紹以下兩款:

川貝雪梨無花果水

材料: 乾雪梨片數片 + 川貝粉 1-2 茶匙 + 無花果1粒剪開 + 水1.5~2杯

造法: 將所有材料放到電水煲中, 按制滾起後稍焗片刻, 然後再按制翻滾, 大概重複3次就完成!

因為川貝粉煲過會融融地, 所以唔會再有黐住喉嚨的感覺! 用乾雪梨片o既好處, 就係連批皮, 去芯都唔駛做, 拿起幾片就煲得! 最啱懶人一族!

仲有另一款婆婆推介 – 羅漢果水

材料: 羅漢果半個 + 製過的甘草數片 + 水 1~1.5杯

造法: 將所有材料放到電水煲中, 滾起就一直焗於水煲中, 要飲時再按制返熱就完成!

呢款簡單得嚟非常滋潤! 又好味!  

經婆婆賜教後, 媽媽除咗覺得婆婆非常有智慧外, 仲覺得電水煲實在係好偉大o既發明! 從來冇諗過電水煲可以做出如此滋潤o既飲料~! 推介~!