日食

百年難得一遇, 真係好想 . 好想 . 好想去睇...

曾經渴望爸爸會好識趣咁講: 老婆, 去睇日食咯... (不過爸爸一向都唔識趣呢)

又曾經想今朝遲少少返工去睇... 但又良心過意唔去...

唯有一邊聽住收音機留意住關於日食o既消息, 一邊喺車上注意天色...

8點30分, 平日會有陽光晒到座位, 但此時突然天色變暗, 立即台頭向望天, 係藍天白雲! 我深信係日食作的怪! 當時收音機正報導太陽正被食咗一小啖~!

8點45分, 落車了! 平日陽光猛烈o既路上又係一滴陽光都冇! 但天空依然藍天白雲! 好特別~!

9點, 返到公司了, 已經打定輸數, 諗住一定會錯過呢個難能可貴時刻...

點知到9點25分...

突然聽到同事起哄! "睇到呀, 睇到呀!"

我即刻去八吓! 嘩, 透過公司隻茶色玻璃窗, 加副超! 真係望到呀!!! 真係超超超超級開心!!!  我見到時個太陽係一隻牛角包o既模樣~!

真係估唔到喺公司都可以睇到! 感謝主!

 

 

辛勞的weekend

剛過去o既weekend真係辛苦到暈, 只因爸爸星期六下晝同我哋去完公園玩就去咗返工, 一去就到凌晨2點... 打返嚟話: "打9號風球, 返唔到, 第二日都要做埋d嘢先返得!"... 結果爸爸要去到星期日半夜3點先返到屋企...  

喺毫無心理準備下連續兩日獨力照顧晢晢真係lei 咁hea, 餸又未買, 家務又一大堆, 而且而家o既晢晢又愛爬高爬低...  但都要頂硬上...

星期日朝早, 晢晢5點就醒咗(緊係, 前一晚未夠5pm就瞓咗), 我就一路忙忙忙忙.... 忙到晢晢9點瞓覺為止... 又要陪佢玩, 又要邊看住佢邊買餸煮飯, 餵飯, 沖涼, 洗嘢... 真係人癲!

辛苦咗成個星期日, 都未完, 星期一又拎咗假帶埋晢晢去賀爸爸個朋友新舖開張! 由朝去到晚! 要看住隻冇時停o既馬騮仔, 真係...

"放假辛苦過返工"!! 

在此我要向全職媽媽致敬!!

不過...呢個星期六日一話雖辛苦, 但就好感恩, 因為晢晢喺非常時期(爸爸不在家)非常合作~! 好抵鍚! 例如...

 星期六一早就瞓, 令我有足夠休息~!

 星期日雖然得我一個人揍, 但晢晢一向唔太合作o既食飯時間突然變得好乖, 冇吐飯, 冇say no, 大口大口咁一啖接一啖, 仲抵死到點頭講: yummy~~~ 氹到我飛起~!

 玩o既時間都好聽話, 叫佢做乜就做乜, 冇say no, 仲好叻咁識得叫 "all豬豬"~! 片片全日冇濕過~! 叻仔~!

 再次用開口杯飲奶都冇say no~!

瞓覺時間又好乖, 9點正放眼光光o既晢晢入BB床都冇扭計, 講咗句: "藹瞓呀" 一分鐘內就自行變豬~!

 星期一出街都好合作, 雖然玩咗全日好攰, 但都冇扭計, 食飯仍然大啖大啖咁食~! 返到屋企, 放上BB床時10點, 又係講咗句 "藹瞓呀"就瞓咗~!

仲有好多... 不能盡錄...

感謝天父o既體貼

 喺我最無助時

 叫晢晢好合作

令我減輕不少壓力

 而且讓我順利過渡之餘

又有一個好愉快o既親子時間

呢d全屬天父o既恩典~! A-MEN~!

 

 

打風日子

個個weekend唔係落雨就打風, 真係悶到發毛...

今次呢個"莫拉菲"... 天文台講佢到正面吹襲香港, 真係邊度到唔敢去...

成日留喺屋企, 除咗悶, 晢晢仲因為活動量少咗, 下晝果覺點都唔肯瞓... 到3點多, 我見個天仲有少少陽光, 就決定帶晢晢去公園, 諗住玩攰d就肯瞓...

 

結果, 玩完返屋企, 沖埋個涼, 睇咗陣卡通... 差不多5點(係未夠5點!), 晢晢就真係瞓咗... 但係, 似乎呢覺唔係小睡咁簡單lor~! 而家已經係10點半喇, 但係我點搞佢佢都係要瞓! 我估佢都係瞓到第二朝架啦... 唉... 仔~~~ 你晚飯都未食架...

今日係自己揍晢晢都瞓成咁... 真係唔怪得婆婆架...

爸爸虾人呀~!

晢晢: "爸爸點解成日整古我o既!?"  (相片攝於晢晢2個月大時)

 

爸爸"教仔"一向都好另類, 晢晢可謂畀佢由細玩到大~! 今日, 人哋明明玩得好哋哋, 爸爸又無啦啦整古人, 搞到晢晢...

有片為証, 冇得抵賴~!

晢晢已經say please, 爸爸又話畀舊泥膠人, 但晢晢一拎, 就喺度扮痛大叫! 嚇到晢晢想拎又唔敢拎... 勁無奈... (不過睇見晢晢個傻樣又真係幾好笑o既~!)

晢晢話: "爸爸吓我丫嗱! 我一於用我個Pat Pat 話畀大家知, I LOVE MAMA 多D~! 哼!"

 

 

 

 

 

 

<<三字經>>

唔經唔覺晢晢已經19個月大, 學英文o既進度算唔錯, 都係時候投放多D時間教中文~! 所以近來就打算買一d教材幫助晢晢認識中文~! 早前借咗隻<<三字經>>DVD畀晢晢試聽, 點知有以下有趣o既對話…

 

媽媽: 晢晢, 睇電視咯~!

晢晢: ABC呀? (有問句語氣架)

媽媽: 唔係ABC, 係<<三字經>>

晢晢: 嗯, ABC? 

媽媽: 唔係~~  係三. 字. 經.

晢晢: 嗯! ABC 呀! (開始忟忟哋!)

媽媽: 三. 字. 經.

晢晢: A. B. C.!

媽媽: 三. 字. 經.

 

拗完一輪, 晢晢竟然講…"三" B C 呀~!

 

哈哈~! 當堂笑C咗婆婆同工人姐姐~!  呢段對話令我諗起多年前o既YAMAHA廣告~!

 

到正式播放時, 可能因為晢晢從未接觸過呢d咁文奏奏o既中文碟, 所以佢有少少嚇到呆咗咁… 冇抗拒, 冇講嘢, 淨係得個"呆"字... 連叫佢都冇反應…

 

所以, 都係算啦~! 唯有再物色下啱晢晢胃口o既教材啦~! 心目中想搵D易上口o既粵語兒歌DVD, 然後我再用D歌詞做字咭教晢晢生字! 呢招應該得!  各方好友推介吓有咩好碟啦~!

晢晢有趣語錄 – 19個月

每朝起身時: 抱抱 please… 媽媽... 開奶奶呀… 等待... 1-2-3-4-5-6-7-8-9-10 (晢晢畀10秒時間我開奶咋~! )

見到我哋飲果汁時: orange juice呀, 要, 謝謝… (我都冇問佢要唔要)

想打開某物件時: open please~! (好有禮貌啊~!  )

見到美食時: (指住) mum mum 我食呀… / 餅餅我食呀…

美食在口中時: (點頭) yummy~!

見到搖控制時: (拎住指向電視) 睇電視呀…

見到DVD時: (揀碟中) 呢隻呀… 呢隻呀…

見到我哋T-shirt上有英文字時: (指住) ABC呀…

入錢箱時: 入錢錢呀, 1蚊~! (但未必真係1蚊wor...) 

數腳指時: one-two-three-four-five, five toes (但明明ten toes架…)

跌咗嘢時: ops… (睇迪迪尼學返嚟~!)

聽到人叫佢中文名時: (舉手) 到~!

想瞓時: 藹藹瞓呀, 僕僕… (然後僕上枕頭)

開飯時: woo... world family 呀… (示意要我哋開world family佢送飯, 唔開唔食! 曳曳!)

催我哋出門口時: (企喺門口) 開門呀!

我哋咋死唔so佢時: (扯我哋件衫) eaa….. 起身呀!!!

 

暫時記到咁多...

 

&quot;感恩路上&quot;開幕 之 晢晢覺覺豬感恩事件

一路都好想開個"分類"好好記得所有值得感恩o既事, 但好奇怪, 心裡竟然感到有壓力, 如果成日都冇嘢寫咪弊? 不過今日下晝同教會一位姊妹傾開計, 佢鼓勵我寫其中一件, 就係有咗晢晢呢個見證, 不過, 實在太長編喇, 需要d時間預備, 今日先記低晢晢覺覺豬感恩事件先啦~!

話說尋日向神祈禱, 希望晢晢唔好咁日日都咁早訓, 畀少少親子時間我... 唔9點, 都8點半丫...

今日, 我依然放工趕頭趕命返屋企, 6點45分喺車上打畀婆婆, 當時佢話晢晢開始呆, 心裡已經好焦急, 6點55分落車, 我半跑去婆婆屋企, 入到屋我就見到好精靈o既晢晢! 我嗱嗱聲食完婆婆牌飯盒就同佢玩波波, 講故仔~ 好開心~!

8點多dd返到自己屋企, 晢晢已經開始捽眼, 但我竟然無懼晢晢扭眼瞓發脾四危機, 要晢晢試用開口杯飲奶! 晢晢開頭有d抗拒叫"唔愛', 但我話: 試吓先啦~! 晢晢就好乖咁一口一口咁飲! 呢個精神狀態有呢個表現我實在要形容為"超級乖"~!

晢晢用杯飲160ml奶, 飲剩杯中一啖, 圍咀是乾的~!

刷完牙, 我哋再玩吓穿珠仔, 睇吓生字同書, 再講個聖經故仔... 就8點55分, 我唱完"瞓覺歌"就放晢晢入BB床... 晢晢好乖咁瞓喺床上望住我, 我就同晢晢一齊祈禱, 其中一句我話: 神呀, 求你畀晢晢今晚瞓得好甜o既... 就剛剛9點, 晢晢就真係好甜咁瞓著咗~!

今晚... 真係好窩心~!  神o既恩典真係超乎我所想所求, 感謝神o既體貼~! 我會繼續努力為晢晢睡眠祈禱架啦!

感謝主~! 哈利路亞~!