拆利是啦~! 21.02.2011

正月十五都過埋, 係時拆利是啦~!

今年有了陶陶的加入, 令利是庫存量大大提升~! YEAH!

晢晢 & 陶陶

感謝各親愛的親朋戚友送上的祝福~!

呵呵呵呵呵呵呵…!!!

晢晢:『嘩~ 錢呀!!』

晢晢學樂器 - 夏威夷小結他Ukulele (3歲2個月)

似乎幾留心喎~!

晢晢終於正式學樂器啦!

爸爸媽媽都好愛玩樂器(愛, 但唔叻…), 所以都好希望自己o既兒女都會一樣咁喜歡~!

睇見時下競爭激烈o既社會, 好多小朋友學樂器好似只為拎張『沙紙』, 個個苦著臉去學, 實在有違音樂本質! 所以爸爸媽媽一直都唔急於要晢晢去學, 只一直觀察佢興趣所在, 繼而加以培養~!

會彈琴的媽媽, 曾經嘗試令晢晢愛上鋼琴, 閒時開吓個琴彈吓, 又會彈d歌仔同晢晢一齊唱, 可惜晢晢一直反應一般(其實又未至於好差, 晢晢都表現到有興趣, 只係專注力不足), 所以唯有等佢再大d再試過~!

而『結他痴』爸爸, 因為實在太愛結他, 得閒無事唔彈都會拎出嚟欣賞吓, 又時時跟晢晢瘋狂地Jam歌, 所以成功感染晢晢, 令佢都愛上結他, 成為小結他痴!

由搵導師到正式上堂都差不多花咗幾個月時間, 最終選定到就近琴行報名, 原因… 只因近, 因為實在唔想花太多時間喺交通上~!

不過咁又唔代表選得求奇, 因為報名前媽媽都對琴行查詢了好多好多次(幸好對方冇厭媽媽煩), 再跟爸爸商量再商量, 結論係 --- 可以一試!

2月20日終於上咗第一堂, 媽媽對年輕的『阿sir哥哥』的感覺十分良好! 雖則應該不是大師級, 但睇得出佢對教小朋友係有經驗的!

半小時的課堂, 爸爸媽媽經琴行同意下全程留守琴房門外偷望, 『阿sir哥哥』不停的講和示範, 晢晢就留心的聽和跟示範做, 沒有半點分心! 十分好!

下課後, 『阿sir哥哥』的評語…

『佢都好叻, 一開始已經識拎結他』…

『好留心, 聽得明我講咩, 亦都跟到』…

最後, 好肯定咁話『佢好有興趣!』…

離開琴行, 揹起結他的晢晢主動問…

晢晢:『媽咪, 點解晢晢要學結他o既?』

媽媽:『因為晢晢鍾意囉~! 咁你鍾唔鍾意吖?』

晢晢:『鍾意呀!』

咁就好喇! 咁晢晢你就畀心機學啦~!