老虎與豬 (3Y4M) – 27.04.11

呢一晚, 媽媽突然興起向晢晢講解『生肖』…

『嗱~ 每人出世果年都有隻動物代表過喎… 好似有雞啦, 牛啦, 兔啦, 老鼠啦..』呢晢晢一直都好感興趣留心聽著…

直到媽媽話畀佢知佢個生肖係豬, 佢就開始扁起咀來…

之後媽媽再話佢知:『你知唔知妹妹個生肖喺咩吖?』

晢晢:『係咩呀?』

媽媽:『係… 係老虎呀!』

當晢晢聽到妹妹生肖係老虎時, 當場晴天霹靂, 然後垂頭痛哭!!!(個樣仲慘過失戀!), 哭了好一陣子, 晢晢紅著雙眼, 好可憐咁同媽媽講:『妹妹唔係老虎, 我先至係老虎, 妹妹先係豬!!!』

陶陶: 乜我好似豬咩?

媽媽曾努力說服晢晢接受現實:『你知道嗎? 晢晢出世果年係金豬年, 都不知幾多媽媽想喺晢晢嗰年生BB, 所以晢晢係豬年出世其實係好威架~!』

晢晢聽完仲傷心:『我唔想我個生肖係豬呀! 我想我個生肖係老虎呀! 哇哇哇!!!』

媽媽繼續努力勸服:『點解晢晢想個生肖係老虎呀??』

晢晢:『因為豬太細隻啦, 老虎大隻d!』

媽媽:『豬都可以好大隻架! (媽媽指住爸爸的情人節送的大豬) 你睇下, 呢隻豬都好大隻啦~!』

晢晢再一次激動起嚟:『豬唔大隻! 我唔想我個生肖係豬, 我想我個生肖係老虎… 我想我個生肖係老虎…. 哇哇哇…』

媽媽勸咗好一陣子都勸唔掂呢舊頑石, 最後… 放棄了… 『好啦好啦, 你係老虎啦! 妹妹, 爸爸, 媽咪都係老虎, 我哋做老虎family啦~!』

情緒開始穩定一點, 但仍未完全接受…

晢晢:『唔好! 我係老虎, 媽咪係fox, 爸爸係大公雞, 妹妹係豬先啱架嘛~!』

媽媽:『吓!? 得晢晢係老虎, 我哋個個都係小動物! 咁我哋咪會畀晢晢食囉!?』

晢晢(有點肉緊):『唔係呀! 我扮食之嘛! 我好鐘意你~!』然後好大力咁攬實媽媽…

好搞笑的對話

一隻堅持要做老虎的豬

一隻唔捨得吃家人的豬

一隻好鐘意媽咪的豬

一句『我扮食之嘛』

一句『我好鐘意你』

一個擁抱

足以令媽媽笑幾日

晢晢

你實在太可愛了~!