今年為晢晢預備咗中國look, 型仔呢~!
今年新年都係平淡中渡過… 年廿八行花市, 年三十到爺爺嫲嫲家食團年飯, 年初一主日崇拜 + 爺爺嫲嫲家拜年, 年初二到公公婆婆家拜年 + 好友到訪, 年初三在家休息… 節目不多, 但已經令爸爸媽媽好疲倦…
事關晢晢年廿九開始有點咳, 雖則小病是福, 但足以令到晢晢心情變得很差很差
另一感恩事件, 就係晢晢已經愛上猴棗散喇
晢晢口味愈來愈古怪! 除咗猴棗散, 年初三早上仲發現佢愛上食檸檬!
年初三晚, 我哋一家三口叫外賣Pizza, 晢晢食咗少許Pizza同雞翼, 又飲咗少少湯! 最感恩係晢晢竟然肯食cream soup 入面o既肉
以上全部感恩事件都同食有關, 咁令媽媽感動, 只因晢晢係一位超級偏食BB!
新年願望… 乜都假! 最緊要健康同開心! 所以祝大家...
呢晚係年廿八, 我哋娘家總動員, 加埋印印姐姐一行11人到元朗行花市~!
兜咗一圈, 晢晢已經畀d陞汽球吸引, 不停叫住:「balloon呀 balloon呀」
可惜冇帶相機, 只好用手機拍攝…
Yoyo表姐都唔輸蝕, 揀咗個巴施光年陞汽球, 不過佢論論盡盡, 只行咗一陣就唔小心甩咗手, 咁就飛走咗lu…
Yoyo當然唔開心
行到大概11點, 我哋一家三口先行打的回家, 晢晢已經攰到飛起, 返到屋企仲攰到唔願沖涼, 最後多得Mickey汽球相助! 成功引到晢晢跳入浴缸邊玩波邊洗白白! 哈~ 原來個汽球一遇水就唔識飛架啦~!
呢晚爸爸媽媽都攰到得返半條人命, 媽媽見晢晢瞓咗都跟埋一齊zzz
媽媽的公公, 在年廿六的凌晨離開了我們…
他在生時, 絶對是不好惹的老人家, 脾氣臭, 經常對婆婆破口大罵(指的是晢晢的婆婆)… 問心, 媽媽都頗討厭他, 但當他真的離開時, 對他的恨已經消退…
媽媽收到消息時已是翌日早上, 媽媽邊走上往公司的路, 邊為他的靈魂祈禱, 求主赦免他的罪, 求主使他得安息…
雖然婆婆常常說太公很討厭, 但當他走了, 婆婆還是哭得很厲害…
今天晚上, 婆婆跟媽媽說起太公在醫院的事:「明明已經唔認得人好耐, 某一晚竟然叫我『阿米』(阿米是婆婆乳名)」… 「照顧咗佢咁耐, 臨走仲識話我知佢記得我… 感謝主…」
婆婆對太公這份情; 即使他罵的有多髒, 即使他有多臭(因為經常失禁), 即使要照顧兩位孫兒有多累… 仍然風雨不改的每天給他送飯, 替他清潔, 替他做牛做馬…
婆婆渴求的, 不是太公的一句多謝, 更不是他的遺產…
只是一句『阿米』已勝過一切一切…
媽媽從婆婆身上學懂了愛...
愛 是 恆 久 忍 耐 、 又 有 恩 慈 ． 愛 是 不 嫉 妒 ． 愛 是 不 自 誇 ． 不 張 狂 ．不 作 害 羞 的 事 ． 不 求 自 己 的 益 處 ． 不 輕 易 發 怒 ． 不 計 算 人 的 惡 ．不 喜 歡 不 義 ． 只 喜 歡 真 理 ．凡 事 包 容 . 凡 事 相 信 . 凡 事 盼 望 . 凡 事 忍 耐 。
愛 是 永 不 止 息 ． <雅 13;4-8上>
晢晢:「睇吓我幾大對黑眼圈…」
呢朝早媽媽都有一刻想缺課, 因為前一晚晢晢發惡夢, 由半夜2點斷斷續續喊到5點先返瞓, 一家3口精神極度欠佳, 又唔多好老皮
其實自晢晢N1開學後, 就要接受一星期返足7日學o既生涯(抱括MON~FRI 返學, SAT德怡 PLAYGROUP 及 SUN幼兒樂園), 爸爸都有微言安排得太密
話題扯到太遠添! 講返上堂情況先…
今堂因為遲到咗20分鐘, 所以一入門口已經係唱歌仔時間… 唔知晢晢係咪經過一連5日N1而習慣咗獨自上課!? 呢堂竟然唔需要爸爸媽媽坐喺背後, 都可以自己一個人坐定定並投入課堂之中~!
當婷姨姨畀每位小朋友輪流嘗試做圖工時, 雖然每次都係晢晢包尾咁制, 但晢晢只不斷舉手及講:「到晢晢吖~ 到晢晢吖~」, pat pat依然掂凳坐, 冇離座, 又冇發脾氣, 直到婷姨姨畀佢為止… 耐性, 似乎好了… (係咪好似好乖仔呢? 好戲在後頭!
是日圖工 – 穿爆竹, 穿到第5個左右就開始扭眼瞓, 餘下部份由媽媽負責…
完成圖工後, 就是日重頭戲 – 行年宵
婷姨姨預備咗每人4個小金幣到不同「檔口」辦年貨, 分別有揮春檔, 年桔檔, 爆竹檔(以上全部貨品都係同學喺課堂上o既作品)以及小朋友最鍾意o既糖果檔
「年宵」仲未開始, 晢晢已被糖果吸去整個靈魂! 不斷扭計話:「我要candy 呀!
媽媽本想帶晢晢去下一站揮春檔買揮春, 但晢晢已經冇心機再行, 一心只想食糖! 媽媽好言相勸:「買埋揮春先啦!」但晢晢就大發脾氣! 大喊大叫又典地! 
晢晢:「唔好阻住我食糖啦!」 
洗過手, 就到茶點時間, 今堂伙食唔錯, 有柑, 蛋散, 角仔同提子包~! 初初以為柑同燈差不多味晢晢應該會食, 結果?(唔駛多講
晢晢:「不如以後淨係食角仔唔食飯咯~!
臨放學時, 媽媽再一次把握機會到婷姨姨細心擺設o既「賀年枱」前細心講解, 希望晢晢到新年時唔會大鄉里到連存盒, 水仙, 瓜子, 揮春都唔知係咩啦~! (HEEHEE 晢晢家個存盒太過新潮, 又唔會插年花, 所以唯有趁機好好教育一下~!
放學時, 晢晢喺婷姨姨手上接過揮春同利是(入面係朱古力金幣), 講句: 「新年快樂, 恭喜恭喜!」就放學lu~!
小記: 為咗讓晢晢感受多點節日氣氛, 媽媽特意拎晢晢o既賀年圖工將屋企佈置一翻(其實貼得超求奇~!
