虎年快樂! 身體健康! 笑口常開!

今年為晢晢預備咗中國look, 型仔呢~!  

今年新年都係平淡中渡過… 年廿八行花市, 年三十到爺爺嫲嫲家食團年飯, 年初一主日崇拜 + 爺爺嫲嫲家拜年, 年初二到公公婆婆家拜年 + 好友到訪, 年初三在家休息… 節目不多, 但已經令爸爸媽媽好疲倦…

事關晢晢年廿九開始有點咳, 雖則小病是福, 但足以令到晢晢心情變得很差很差, 喊同扭計o既時間較平時多, 胃口亦欠佳, 所以爸爸媽媽都要花更大精神體力去應付… 情況一直維持到年初二晚, 正前往酒樓打邊爐o既路上, 晢晢突然嘔吐大作! 不過嘔清晒之後, 晢晢就開始正常返(包括胃口同情緒), 到酒樓時, 竟然可以跟我哋一齊坐定定食飯食個多小時(好抵讚! 連日來連坐定定10分鐘都好有難度呢!), 又食咗大半個丁丁 + 數條芝士腸! 雖則都係冇乜益o既食物, 但要知道見到一個幾日來都冇好好食過正餐o既小朋友, 竟然肯主動大大啖咁食嘢係一件幾咁令人感動o既事~! 媽媽而家先知道, 原來曳曳係可以嘔出嚟o既~~(事實係媽媽每晚都為晢晢身體同情緒祈禱, 所以晢晢呢晚有如此表現實在好感恩!)

另一感恩事件, 就係晢晢已經愛上猴棗散喇! 今次小病, 喺爸爸緊持下冇睇西醫, 只用每日4支猴棗散 + 川貝無花果水搞掂! 病, 未完全好晒, 不過晢晢已經鍛鍊到可以主動張開口, 面不改容地吞晒整支開咗水o既猴棗散! 好感恩, 終於唔駛再行刑般餵藥!

晢晢口味愈來愈古怪! 除咗猴棗散, 年初三早上仲發現佢愛上食檸檬!

年初三晚, 我哋一家三口叫外賣Pizza, 晢晢食咗少許Pizza同雞翼, 又飲咗少少湯! 最感恩係晢晢竟然肯食cream soup 入面o既肉!!! 平時畀湯佢飲, 只要發現湯入面有少許渣(例如丁屎咁大粒蕃茄茸)就會成碗唔要! 但呢晚晢晢竟然張開口指住口中舊肉問媽媽:「咩嚟架?」媽媽:「雞肉嚟架, 食啦!」晢晢就笑笑口話:「雞肉嚟架!」然後好放心咁咬咬咬~~~吞!

以上全部感恩事件都同食有關, 咁令媽媽感動, 只因晢晢係一位超級偏食BB!

新年願望… 乜都假! 最緊要健康同開心! 所以祝大家...

虎年快樂!

身體健康!

笑口常開!