年廿八 行花市 11.02.2009

呢晚係年廿八, 我哋娘家總動員, 加埋印印姐姐一行11人到元朗行花市~! 其實冇咩特別嘢想買, 只係想畀晢晢感受一下新年氣氛… 好多人 + 好嘈 + 好迫 + 好多年花 + 好多桔就係新年咯~!

兜咗一圈, 晢晢已經畀d陞汽球吸引, 不停叫住:「balloon呀 balloon呀」, 最後我哋買咗個Mickey balloon畀佢! 晢晢係第一次玩陞汽球, 我哋將條繩綁喺佢條褲度, 當晢晢一放手, 見到個汽球升起就感到好新奇, 好興奮!

可惜冇帶相機, 只好用手機拍攝…

Yoyo表姐都唔輸蝕, 揀咗個巴施光年陞汽球, 不過佢論論盡盡, 只行咗一陣就唔小心甩咗手, 咁就飛走咗lu…  

Yoyo當然唔開心, 朱精姨媽唯有安慰佢:「巴施光年要返太空完成任務呀, 唯有下年見啦!」… 「你又係傻o既, 揀巴施光年, 巴施光年緊係一飛沖天啦!」 Yoyo緊係冇咁易呃! 最後都係要買返個公主汽球先安撫到佢~!

行到大概11點, 我哋一家三口先行打的回家, 晢晢已經攰到飛起, 返到屋企仲攰到唔願沖涼, 最後多得Mickey汽球相助! 成功引到晢晢跳入浴缸邊玩波邊洗白白! 哈~ 原來個汽球一遇水就唔識飛架啦~!

呢晚爸爸媽媽都攰到得返半條人命, 媽媽見晢晢瞓咗都跟埋一齊zzz, 而爸爸仲傻, 著住T-shirt短褲, 冇被冇外套情況下攤咗喺按摩椅瞓到第二朝6點先識返入房, 爸爸捐入被窩時媽媽覺得隔離多咗條冰條~!