艾篙PLAYGROUP – 第一堂 – 07.06.10

晢晢:『我有學返啦, YEAH!!』

呢日係晢晢『提早放暑假』後第一日返PLAYGROUP, 講起媽媽呢日認真頻撲! 一朝早要到新幼稚園交留位費, 然後再到老遠o既佐敦照超聲波, 之後再趕到荃灣跟婆婆會合帶晢晢返學, 再磨兩個半鐘後去接放學, 之後再碌去法國醫院交deposit, 再趕返屋企揍仔… 真係人都癲… 不過能夠將每項任務都順利完成, 辛苦d都係值得o既~!  

經過連日來各方好友支持及安慰, 媽媽對於晢晢轉校一事已經平伏不少, 不過對於第一次返呢間PLAYGROUP的晢晢都有點擔心, 到底佢適唔適應呢? 佢會唔會掛住學校而唔鍾意呢度呢?? 一大堆問題令媽媽有點困擾…

不過一踏入艾篙門口, 媽媽已立即發現所有擔心都係枉然o既~! 晢晢見到課室已二話不說自己除晒鞋, 然後一支箭頭也不回就衝咗入課室, 一秒內已經連人影都唔見, 連阿媽姓咩都唔記得lu~~ 

兩個半鐘頭後, 媽媽跟婆婆一齊接晢晢, 一打開門, 晢晢就笑住衝出嚟攬住媽媽, 似乎玩得十分開心~~~ 

Surman 姐姐對晢晢的評語:

『好奇怪, 晢晢3月只見過一次(試堂), 今日竟然記得我個名, 主動叫我Surman姐姐』(媽媽事先聲名, 上課前媽媽冇同晢晢提過Surman個名架!)  

『空間感及大肌肉不錯, 今日行高低不平o既路同捐山隆都做得幾好…』(晢晢大肌肉一向都不錯架~!) 

『將手放入布袋中, 憑感覺認出花, 茶杯及xx(媽媽唔記得咗), 晢晢能認出80%左右… 』『認出物件後, 再放到相應顏色盒中, 呢個晢晢就完全做到…』(憑手o既感覺認出物件媽媽都未試過同晢晢玩, 搵日玩下先~!) 

『跟紅黃綠pattern 砌lego, 晢晢都跟得到…』(跟pattern呢個遊戲媽媽都未試過同晢晢玩, 仲以為咁細個未做到tim~!) 

『聽聲音比較弱, 其中一個遊戲要求小朋友聽到搖鼓聲就行有條紋o既地墊, 聽到沙磓聲就行有波點o既地墊, 晢晢雖未至於完全做唔到, 但可以再加強!』(咁就麻煩晒Surman姐姐你啦~!) 

『認知能力不錯, 連好偏門o既顏色都認到~! 』(媽媽都唔知咩係偏門顏色? 唔通係啡, 紫呢d???) 

『學習等待要再加強, 每當等候轉活動時都坐得未夠定,日後會喺呢方面加強訓練~! 』(呢點對日後返幼稚園好緊要, 咁就麻煩加多點力度去訓練喇!) 

『晢晢好樂意分享, 叫佢畀件玩具同學佢都好願意畀~!』(晢晢喺外人面前扮乖啫, 平日同Yoyo爭嘢玩爭到… 唉…) 

另外媽媽擔心晢晢偏食, 特意問下食茶點時有冇問題, Surman 肯定的說: 『冇問題』(或者呢度伙食比較好, 又可能有朋輩影響, 見到人哋食佢又食~!) 

此外, 媽媽又問Surman姐姐晢晢上堂時時有冇發脾氣, Surman姐姐話:『冇, 晢晢全日都表現得好開心, 一直未停過笑』(咁… 呢個媽媽都感受到o既~!) 

其實Surman姐姐講o既唔止咁少, 不過隔咗一日紀錄, 媽媽真係忙記咗好多… 希望下次媽媽做好d準備, 做好d紀錄, 等媽媽喺屋企都可以同晢晢跟進跟進啦~!  

見到晢晢咁鍾意呢度, 媽媽終可以放下心頭大石… 呢晚返到屋企, 媽媽問晢晢今日去邊度玩, 晢晢話:『去Surman姐姐度玩』媽媽:『咁開唔開心呀?』晢晢:『開心!』然後晢晢再數畀媽媽知佢今日玩過咩嘢…  媽媽再問:『咁我哋再去Surman姐姐度好唔好呀?』晢晢好開心咁話:『好呀!』…

仔, 你鍾意就好喇, 而且媽媽都相信Surman姐姐可以幫助到你o既~! 晢晢你要加油喇~!

以下呢本簿仔係晢晢上堂表現紀錄, Surman姐姐話今堂係第一堂, 所以每項都會畀貼紙以示鼓勵, 但事實唔係樣樣都做得咁好架咋,下堂開始就會如實紀錄架啦~! (所以晢晢你唔好驕傲喇~!)