艾篙PLAYGROUP – 第二堂 – 10.06.10

呢日媽媽要返工, 由婆婆代勞帶晢晢返學…第二日, 媽媽問晢晢… 

媽媽:『晢晢, 你尋日去邊度返學嚟呀?』

晢晢:『我返PLAYGROUP呀! 去Surman姐姐度!』

媽媽:『咁好唔好玩呀? 玩咗d咩呀?』

晢晢:『好玩呀! 我打鼓呀!』(不過之後再問佢玩過乜就唔識答我lu)

媽媽:『咁有冇同學仔同你玩架?』

晢晢:『有呀, 有男仔, 有女仔, 都係兩歲lor!』(事後問返Surman姐姐, 原來佢哋冇介紹得咁詳盡過wor, 啫係晢晢你段古啦!!)

媽媽:『咁Surman姐姐鍚唔鍚你?』

晢晢:『(笑得好甜)鍚~!』 

第二晚, 媽媽就收到Surman姐姐電話講返晢晢上課情況:

呢堂音樂部份時間長d, 唱歌方面晢晢好得, , <世界真細小>呢d歌晢晢全部都識唱… 之後畀個鼓佢打, 開始時用手打都ok, 但就未識左右左右咁打… 之後畀鼓棍佢, 及要求佢跟住琴o既快慢節奏打, 但呢part晢晢做得好差, 無論快慢晢晢都係打返自己個rhythm(唉… 枉你出自音樂家庭…), Surman姐姐話日後會做多幾次加強訓練~! 跟住就埋鋼琴彈, 晢晢表現唔錯, 懂得用手指按琴鍵而唔係用手拍~! (緊係啦, 呢個媽媽有教架嘛~!)

完成音樂部份就到建構環節, 今堂Surman姐姐呢咗d鴨仔玩具出嚟, 先問佢哋:『鴨仔住嚟邊度架?』晢晢話:『住天水圍』(真係笑C人), Surman姐姐教返佢鴨仔係住喺池塘… 之後Surman姐姐話d鴨仔會周圍走, 叫佢哋(用lego)起間屋圍住佢哋! 晢晢大至上做到, 但其中有半格lego位漏空咗, Surman姐姐叫佢封返好佢, 但晢晢唔知點做(因為得半格, 放一舊lego又放唔入, 佢又唔識拆過佢放過另一舊), 晢晢竟然話:『由佢lor』, Surman姐姐叫佢諗辦法封好佢, 晢晢又話:『我唔識喎!』(真係激C人!)… 之後Surman姐姐話d鴨仔會跳出嚟, 叫佢哋砌高d幅圍牆, 呢part晢晢做得唔錯~!  

之後入房玩泥膠, Surman姐姐叫小朋友整d餅畀鴨仔食, 其他小朋友聽到整餅都會壓扁舊泥膠當成餅, 唯獨晢晢冇咁做, 但佢就將舊泥膠初到好細粒, size剛剛夠放入鴨仔個口入面, 可見佢腦仔都幾識轉彎~!  

課堂秩序方面, 晢晢呢堂比上堂坐得定咗, Surman話本行為簿仔起到d作用! 唯獨晢晢『屹』凳『屹』得好厲害, Surman姐姐同晢晢講:『你屹張凳會撞到幅牆好痛架!』晢晢就話:『咁我坐前d啦!』又話:『坐定定有貼紙!』… (平日在家或者出街都從未見過晢晢屹凳, Surman姐姐唔講都唔知佢有呢個壞習慣, 希望佢喺呢度學習下可以快快紏正啦~!)

另外, Surman姐姐提到晢晢喺呢度上堂好開心, 好enjoy, 呢點媽媽都感覺得到, 而且媽媽覺得Surman姐姐好細心, 好睇得到晢晢強弱並加以教導! 又注重同家長溝通, 令媽媽了解到晢晢o既課堂表現, 所以十分放心將晢晢交畀佢!!! 媽媽呢次真係冇揀錯Playgroup啦!