親子賀年花燈 ~ 21.01.11

新年就到, 晢晢學校近來都以新年作主題, 讓小朋友認識『新年』~! 有時同晢晢喺街上見到揮春, 風車, 花燈, 晢晢都會大叫『新年嚟啦!』或『恭喜恭喜』, 相信都係學校教架喇~!

早幾日學校有份『親子賀年花燈製作』功課~! 本來呢類美術項目已交咗畀創意爆棚o既爸爸負責, 爸爸仲拍晒心口話:『哦~ 好易啫~!』, 不過媽媽心思思又想整埋一份, 所以就四出找資料, 睇下有冇d又靚又易整o既花燈~! 哈! 竟然無意中畀媽媽搵到喎~!

材料: 利是封, 雜誌紙, 雙面膠紙, 活動眼, 金線 (本來仲有紅絲帶, 但媽媽買唔到, 改咗以金線代替~!)

話雖唔難整, 但晢晢可以幫手o既地方就只有入雜誌紙, 封口, 剪及搣雙面膠紙, 其他就由媽媽負責咯~! 幸好晢晢尚算專心的坐定定睇住媽媽整, 不至於悶到走來走去~~! (咁爸爸負責咩呢? … 咪負責看實晢晢同陶陶囉~!)

整好啦! 媽媽覺得好靚啊!

對眼細咗少少… 嘻~ 冇計啦. 書局得呢個size賣咋~!

小記1: 拍照後, 因為媽媽趕住照顧陶陶, 所以將d剩餘物資隨意放喺梳化就算, 但晢晢好乖咁收好, 然後拎畀媽咪:『媽咪, 唔該收好佢啦! 危險呀!』(因為有較剪)… ummm…乖仔~!

小記2: 完成製作後, 媽媽同晢晢講呢個係賀年花燈~! 到第二朝, 媽媽再問晢晢呢個係咩嚟!? 晢晢話『呢個係賀年魚』… 我暈啦…!