生活笑話

放產假期間, 雖然生活好刻板, 但當中都有些點滴, 想起時都會會心微笑~!

 

笑話一:

出院返到屋企, 媽媽努力增奶, 某日沖咗杯『多奶茶』放喺廚房嘆凍, 然後走出廳照顧2B…

爸爸: (走咗入廚房)『咦~! 有杯茶o既?』

媽媽: (其間已聽到開杯蓋聲)『係呀!』

爸爸: (已飲咗啖)『咩茶嚟架!?』

媽媽: 『多... 奶… 茶...!』

爸爸:

 

笑話二:

妹妹返到屋企, 晢晢見到妹妹食媽媽奶感到十分好奇, 於是就問…

晢晢:『媽咪, 可唔可以畀我試一啖呀?』

媽媽: (猶豫咗一陣)『好啦, 餵完妹妹畀你試下啦!』

晢晢: 『ummm… 咩味架?』

(哈哈! 畀你試你又怕~! )

 

笑話三:

每朝返學晢晢見到老師都要講早晨, 但晢晢通常都講得好細聲, 有時甚至細聲到聽唔到! 某日, 晢晢唔知做乜鬼係威係勢大聲向佢面前o既老師…

晢晢:『王…主…任… 早… 晨…』

面前的老師:『晢晢, 我係黃校長…』

媽媽: 

 

笑話四:

某日, 爸爸同晢晢兩父子排排坐睇電視, 其間爸爸正在中眼瞓…

突然, 晢晢伸出食指, 迷迷糊糊的爸爸咬咗晢晢隻手指一啖…

晢晢: (奸笑)『…』

爸爸: (發現唔對路)『…』

晢晢: (繼續奸笑)『…』

爸爸: (發現口中有異物) 『…』

衰仔!!! 原來啱啱撩完鼻屎!!!

 

笑話五:

某日, 爸爸媽媽話:『妹妹好得意呀! (為免以為偏心, 所以接住又講) 晢晢都好得意!』

點知, 晢晢竟然話:『晢晢唔得意!』

爸爸媽媽:『吓!?』

晢晢:『晢晢好有型!!』

(晢晢好在意自己有冇型, 下次大家見到佢識點做啦~!)

 

笑話六:

某日晢晢踩單車其間受(輕)傷, 喊起上嚟, 爸爸為分散晢晢注意力, 就叫晢晢…

爸爸;『晢晢, 你睇吓天空, blue sky呀!』

晢晢:『唔係blue sky 呀! 係gray sky 呀!!! 好灰呀!!!』

(仔, 你損咗少少啫, 駛唔駛咁灰呀!?)

 

笑話七:

爸爸好中意咬晢晢pat pat, 某日晢晢嚴厲地勸止爸爸…

晢晢:『爸爸, 你唔好再咬我pat pat 啦!』

爸爸:『爸爸好肚餓, 想食晢晢pat pat呀!』

晢晢:『唔食得架! (然後竟然除咗條褲) 你睇, 呢個係pat pat, 唔肉肉嚟架!!! 唔好再咬啦!!!』

(爸爸, 晢晢同你講得好清楚, 你以後就唔好再咬啦!)