兩兄妹。生病記 (3Y5M / 7M11D) – 21.05.11

兄妹情深, 玩要一齊, 食要一齊, 連病都要一齊…

Happy Friday放工返到屋企兩兄妹仲好地地, 朱精姨媽仲上咗嚟帶晢晢到公園玩, 誰不知玩完返嚟沖涼後, 晢晢就不停打冷震, 1分鐘不到就開始面青青同發吽豆, 一摸, 嘩! 咁熱o既!? 一探, 已經38.3度… 發燒了…

媽媽同晢晢講:『晢晢, 你發燒呀!』

晢晢:『係呀! 我好唔舒服呀!』

媽媽:『咁你要快d上床休息啦!』

晢晢『哦』咗一聲就自己爬咗上床瞓著咗…

雖然晢晢病得突然, 而且食咗退燒一段時間仍愈燒愈高(38.3… 38.7… 38.8…), 但出奇地媽媽又十分冷靜, 只密密手替晢晢用暖毛巾抹身…  

平安渡過一晚, 早上起床仍有點微燒(37.8), 但人好精神(唔講都唔知佢病), 睇完醫生食完藥, 除咗有點咳和鼻水, 大致上沒甚麼大礙, 媽媽以為可以鬆一口氣…

誰不知, 哥哥的病菌不知不覺間已傳染咗畀妹妹, 不停咳咳咳咳咳, 半夜情況最為嚴重, 又咳又鼻塞, 十分可憐… 拖到26號早上, 爸爸媽媽便帶陶陶睇醫生(是第1次啊~!), 醫生說陶陶鼻和喉嚨都有點紅… 是感冒…

小插曲是…當我哋入到診症室, 醫生還未問咩病就二話不說捉咗陶陶去磅重…

醫生十分客氣的說:『吾… 畀你做個參考啦… 其實9kg應該係1歲先有o既重量嚟o既…』

媽媽尷尬的答:『吾… 其實佢6個月返健康院時已經知道佢超咗磅… 不過佢雖然重95線, 但高都有90線… 咁仲算唔算超重呢??』

醫生:『吾… 知道你餵人奶其實都唔會挑剔你o既… 不過… 吾… 如果可以keep到重90線就最理想啦…』

果然減肥是女性的終生事業…

差不多3星期過去, 哥哥情況大致已經痊癒, 但妹妹仍然不停流鼻水和咳(婆婆形容得好貼切, 她說『 陶陶個鼻好似穿咗隆咁不停漏水』…), 已轉睇另一醫生, 希望快d好! 因為晚晚半夜咳醒, 媽媽都就快不支倒地咯…