陶陶上PG – 第六 課 (10M3D) – 13.08.11

放咗3個星期暑假, 陶陶又返學啦~!

『闊別校園』3個星期, 陶陶一點都不陌生, 依然玩到開懷大笑~!

感統活動略見一丁點小進步, 韆鞦坐得更穩陣, 玩彈床時可靈活地不停roll-over(但這可不是正確的玩法)~! 另, 雙腳肌肉都強了, 能自行爬高一級(但未算靈活), 爬行速度亦由龜速變正常速度(可是姿勢仍是『龜式』, 即肚腩黐著地下爬…)

到感觀房(黑房)時, 依然最愛看魚魚和拉電線簾, 不過其間媽媽又刻意帶陶陶拍拍燈制, 陶陶竟發現連媽媽都察覺唔到的按鈕!!! 觀察力都不錯~!

到集體活動時間, 今堂玩拉毛巾, BB面向媽媽躺在大毛巾上, 然後媽媽拉動毛巾直去+轉彎! 爛玩的陶陶當然毫無懼色! 仲好似唔夠喉咁, 玩完一轉停下時郁都唔郁好似想玩多轉!! 哈哈~!

另一個活動係擠皺紙張, 姑娘每人派了雜誌紙及皺紙各一張畀BB摸下, 然後教佢哋擠皺佢, 可惜陶陶興趣不大, 經常走佬!!!

之後的活動主要以感觀為主, 姑娘先關燈, 然後拿出一些玩具如: 發光的觸感球, 會照出叮噹圖案的電筒, 和『水晶球』(其實都唔知叫咩名, 係果D玻璃球物體, 掂下佢會有條光跟住你隻手走果d…)畀bb接觸, 有部份 BB會驚, 但陶陶就好貪玩, 直頭想成個『水晶球』攬住嚟玩, 仲曳到奸笑, 真冇佢修!

到最後茶點時間, 今堂食小曼頭(比星星餅更細粒), 陶陶小肌肉發展仍未成熟, 雖然拎到, 但放唔到入口食, 搞到佢都忟忟哋… 最後媽媽唯有餵佢食一粒止止渴~!

  

  

  

  

  

  

  

小記: 呢日除咗係暑假後第一堂, 亦是排隊報名上下一期課程的大日子! 爸爸晨吉咁早天未光就去到! 仲威到排第一!!! 爸爸無奈地說(send sms畀媽媽):『呢度一個人都冇, 我好似傻佬』媽媽則認為:『你唔似傻佬, 似路縮者…』

Anyway, 多謝爸爸~! 媽媽又有機會陪陶陶學習啦~!