媽媽生日 – 02.05.10

每年生日媽媽都會好唔自在, 或者因為媽媽好怕成為主角… 好怕一大班人上一分鐘為你舉杯後, 下一分鐘就各自各精彩, 然後直到散場時都冇同你講過一句嘢, 甚至連 bye bye也沒有… 感覺… 好虛偽…

所以今年媽媽已一早同爸爸講, 不要刻意做什麼慶祝生日, 不要買生日蛋糕, 又提醒他不要再買無謂的生日禮物… 反而… 感覺自在很多…

別以為媽媽很可憐, 其實媽媽只是選擇了自己喜歡做的事來一個不一樣的慶祝~! 而且還有一個意外驚喜… 所以今年很開心, 很難忘~!

                                                     

4月30日, 媽媽生日前2天: 放工後媽媽買咗好多自己鍾意食的食物同爸爸分享… 包括必食煙三文魚配法包及牛油果醬, 蟹足棒, 大大粒帶子刺身, 勁鮮甜甜蝦刺身30隻, 北寄貝刺身一大盒, 本來仲有八爪魚仔, 但肚皮有點破, 暫時餵住雪櫃先… 另外爸爸又買咗靚靚鮮果盒, 靚西餅x3, 仲有…太多太多, 不能盡錄… 爸爸媽媽食到8點半先call工人姐姐將晢晢送到我哋屋企~~ 哈哈~~ 因為今餐太多生嘢, 所以『買甩』咗晢晢… 一陣咁多啦~!

冇將所有食物拍下.. 因為食嘢係會好忙架~!

極肥美帶子刺身~~ YUMMY~~

                                                    

5月1日, 媽媽生日前1天, 爸爸媽媽再一次『賣甩』晢晢北上行街兼食好嘢~! 為咗減低內疚感, 出發前特意陪晢晢踩單車 + 遊公園, 玩到佢筋疲力、兼睡魔上身就即閃~!

從來未試過喺大陸行街o既媽媽(過往頂多只會行書城), 今次北上之旅簡直就係『大鄉里出城』! 童裝尤其吸引, 十分平, 靚, 正! 平均RMB 30 – RMB 45 就有一件衫/褲! 爸爸媽媽都忍唔住投放咗大量彈藥入貨, 差D連飯都唔夠錢食~! (雖然全部收穫都冇媽媽份, 但因為好抵, 所以買得一樣咁開心~!)

錢差不多駛晒, 腳又攰到跛咁制, 就去嘆媽媽『飛弗』之一 ~~~ 川菜! 今次爸爸揀咗呢間巴蜀風, 環境及食物都不錯~!

今餐我哋點咗: 辣子雞, 水煮魚, 晾衣掛肉, 蒜泥青瓜, 酸溜津白, 抄笋瓜絲… 食到差D爆肚~~ 但真係好好味~~!

食飽返到屋企仲有時間同晢晢玩~! (呢個算係住大西北o既好處~!)

                                                    

5月2日, 媽媽正日生日, 完全冇諗過要做咩慶祝, 朝早完咗崇拜, 就相約一班幼潛同學仔到Candy 姨姨屋企小聚, 因為要賀佢細女出世~ 呢日見返班小朋友真係好開心, 媽媽只係坐喺一旁睇住佢哋玩已經好滿足~!

短時間內已將Candy姨姨間屋反轉!

最令媽媽感動o既, 就係呢班媽媽朋友好有心咁喺呢日為媽媽預備咗生日蛋糕!!! 加上有咁大班小朋友為自己唱生日歌… 真係好感動, 好多謝佢哋~!

點蠟燭時每位小朋友都好期待, 媽媽叫佢哋要手放後面等待, 個個都好聽話照做~!

媽媽生日@全家福

小朋友輪流切生日蛋糕, 媽媽見佢哋咁開心, 仲開心過自己切~!

呢日除咗對媽媽嚟講難忘之外, 對晢晢都一樣印象深刻, 當媽媽問:『今日好唔好玩呀? 今日同邊個玩呀?』晢晢話:『好玩呀! 今日… aii… 有小BB啦, 有嵐嵐啦, 有穎穎啦, 有卓卓啦, 有嫣嫣啦… aii… 有Anna啦, 有(豆豆)哥哥啦… aii… 有小BB啦…(開始重複…)』晢晢真係一個都冇數漏架~! 可想而之佢真係玩得好開心~!

今年生日真係既平淡又精彩, 令媽媽感到自己好幸福!!! 除咗爸爸及一班媽媽預備o既心意外, 媽媽亦收到不少朋友留言及來電祝福… 人生能夠認識到呢班朋友~~~

的~確~好~極~!!! 

 哈哈哈哈哈!!!