2010 下水禮 16.05.10

2010 下水禮 16.05.10

正確d嚟講, 真正下水日子應該係5月15日而非5月16日, 但15號果日當我哋交低入場卷, 準備跳落水之制, 個救生員突然叫住我哋:『仲有10分鐘就閂門啦, 你哋6點先嚟過啦!』媽媽心諗, 晢晢成團火燒到慶合合, 身都未濕過就要走!? 晢晢實喊C啦~! 所以媽媽就厚住面皮問:『吓… 而家走個小朋友實喊架! 你可以可以畀返張入場卷我哋, 我哋6點再嚟過, 但而家可唔可以畀佢玩一陣水呀?』 好在救生員哥哥好人, 一口應承! 咁晢晢玩咗10分鐘就返屋企, 返到去見沖晒涼又唔想再落過去, 所以張飛就留到第二日返完崇拜先玩咯~~ 

上年已經會游幾步o既晢晢, 今年一d都冇生疏, 且更見進步~! 落水之後, 已經識得將下半身浮起, 無論趴或瞓喺水面都冇問題! 而且十分大胆, 有一次喺池邊跑, 唔小心從池邊失足 成個人沉咗落水(當時爸爸仲喺老遠, 而媽媽直頭連泳衣都冇換, 救都救唔切!), 但晢晢浮起後, 只係用手捽兩捽塊面就好似冇事發生過, 簡直胆生毛!  

雖然晢晢o既行為似乎有點奀皮, 但其實佢都受到教訓, 學到嘢架! 當晢晢再次走近池邊時, 媽媽要求『要慢慢行, 坐低咗先落水』晢晢都乖乖照做! 十分聽話~!

由三點半玩到差不多五點, 媽媽有D擔心連午餐都未食o既晢晢會攰到暈低, 所以就催促兩仔爺回家。趁佢哋沖涼時, 媽媽嗱嗱聲煮咗碗貝殼粉 + 烚蛋畀晢晢開餐, 偏食怪晢晢難得地好快手咁將所有食物食晒, 相信佢一定玩到好肚餓~! (平時媽媽一定餓得你太少, 所以你先咁偏食!) 

晢晢同爸爸玩得真係好開心呢~!