趕回家

近來晢晢早瞓問題愈來愈嚴重(晢晢話: 媽媽, 咁都算係問題~!? ), 係架~! 日日放工趕頭趕命就諗住同晢晢玩架嘛! 點知日日都係一隻豬咁瞓瞓瞓!!! 次次一開門, 工人姐姐就係帶咗隻豬仔返嚟! 一瞓就第二朝!! 媽媽都有少少失落架...  

因為咁, 呢個星期四開始我就冇要求工人送晢晢返我屋企, 而係自己上婆婆屋企接仔~! 仲好傻咁放工飛的趕搭6點半班車, 為求喺晢晢瞓覺前趕到~! (好大o既決心呀! )

結果呢日上到婆婆度晢晢果然未瞓, 不過都有少少釣魚, 我就不停聊佢, 同佢一齊食婆婆牌飯盒啦, 聽吓兒歌, 跳吓舞, 玩吓波波, 又講咗個The Ugly Duckling咁... 8點鐘就一齊返屋企... 一路上晢晢不停同我玩"呀胡咋", 不停哈哈大笑, 又不時指吓呢樣, 講吓果樣... 到8點10分, 就剛剛到達我哋屋企門口, 晢晢就變咗隻豬仔喇~~~

到星期五, 媽媽都係同樣咁趕返婆婆度, 呢日我個袋仲好重, 天氣又特別熱, 我都有一刻猶豫不如返屋企放低個袋先到婆婆度（因為巴士站就喺我樓下嘛~!), 不過諗落都係怕晢晢會變豬(咁咪白費心機!), 所以就堅持行10分鐘路往婆婆方向進發! 一到門口, 晢晢就企喺鐵閘講"open please"(示意工人開門畀媽媽, 叻仔! )~! 呢日因為Jane e媽都喺婆婆屋企, 所以特別熱鬧, 晢晢都比平時精神, 我就同佢唱唱跳跳, 追逐吓咁~! 返到我哋屋企都已經8點半, 晢晢出奇地未瞓wor, 我就教下中英文生字啦, 一齊睇下書咁, 9點正就自動變豬喇~!

呢兩日好似好平凡咁, 但媽媽個心就好甜喇~!