細個新年做D乜?

新年話咁快就過咗, 前排朱精姨媽開咗條題「細個新年做D乜? 」媽媽想起以下呢d…

油鐵閘 … 銀色, 仲一定會油到一舊舊~!

地板打腊… 又係打到一舊舊!

油牆… 主要修補一下畀我哋三姊妹搣到一達達, 十足世界地圖o既牆身!

「省」煲, 「省」煮食爐, 「省」水龍頭… 「省」完一定令立立, 好有滿足感!

刷瓷磚黑邊… 工具: 牙刷一支! (閒閒地幾百格, 刷到手指都甩皮! 但又好鍾意做喎~!)

清理床下底… 勁大塵!

抺百頁玻璃… 有好多塊, 抺到手軟!

清理雪櫃… 鮮果格有好多參茸海味!

買新衫… 包括拜年戰衣, 睡衣, 底衫褲…

買年花… 一定有銀柳, 劍蘭; 桃花, 水仙, 年桔等反而少d…

入利是… 朱媽要求好嚴謹, 一張銀紙要平均分成三格對齊接好...

入全盒… 明明d糖乜乜、糖物物都冇人食, 但朱媽一定會買返d擺下…(真係得個「擺」字)

貼福字… 唔興貼揮春, 但一定會貼「福」字喺大門, 仲一定會倒轉貼, 意福到~!

食團年飯… 一定唔少得8餸一湯! 

而一般家庭多數會有o既包角仔, 整蘿蔔糕, 行花市等, 媽媽童年時反而從未試過, 皆因朱媽一向對整小食冇乜興趣, 行花市又怕夜, 又怕迫喎…  

以前過新年, 真係會隆重其事, 朱媽差不多一個月前就會為新年事宜張羅, 尤其為媽媽購買新年戰衣呢一環, 朱媽通常個多月前已經會為媽媽預備, 然後媽媽就傻間間將套戰衣掛好, 放喺當眼處, 日日走去望下, 期待年初一來臨…   

隨著時代轉變, 農曆年所帶來的熱鬧氣氛已冷郤不少, 晢晢呢一代, 又可保留多少?