晢晢3rd & 4th day to school

上學第三天…

晢晢返學頭兩日尚算順利, 到第三日, 老師見佢都ok, 就示意爸爸媽媽跟晢晢say bye bye 先走… 結果… 出事了… 

原本晢晢已經忘記咗我哋, 入咗課室, 仲坐咗埋位玩緊, 不過當我哋一揮手, 晢晢就喊到豬頭咁… 之後老師抱起晢晢安撫, 爸爸媽媽就趁機走人… 

一小時後, 媽媽到學校接放學(爸爸返咗工lu), 晢晢又係一馬當先第一個畀老師帶出嚟, 可惜呢次係帶住兩行眼淚… 老師話晢晢斷斷續續喊咗一個鐘, 又喊到成身汗, 不過蛋糕同水都食晒…  

媽媽接過晢晢後, 晢晢就抱實媽媽, 然後枕個頭落媽媽膊頭低泣, 狀甚淒涼... 不過當媽媽問:「晢晢, 今日好唔好玩呀?」晢晢又半喘著氣答:「好… 玩…」(哈哈~ 真搞笑, 喊到索晒氣仲答我好玩~!)

                        

上學第四天…

有上次經驗, 當晢晢行到接近學校時已唔願行, 不過半氹半抱下總算順利步入學校…

一入校門, 晢晢想玩聰明笨伯車, 媽媽就話:「不如入課放低書包先啦~」(其實媽媽係想趁晢晢拎轉背時閃!)

當晢晢只踏咗一隻腳到課室, 已經意識到要同爸爸媽媽分開, 即時大喊大叫! 我哋唯有抱起佢, 又喺老師指示下入課室陪佢一陣…

媽媽話:「不如玩車車啦… 不如sir滑梯啦…」晢晢就話:「唔玩車車呀… 唔sir滑梯呀… 我要撘巴士呀!!」

過咗一陣, 晢晢開始畀d聰明笨伯車吸引住, 老師就趁機攝位同晢晢玩, 而爸爸媽媽就乘機走佬…

可惜… 媽媽走遲一步, 畀晢晢發現咗, 然後慘叫:「媽~~  咪~~」呢次爸爸媽媽冇心軟, 繼續走人…

之後我哋喺課室外o既玻璃窗「裝」入去, 見到晢晢依然喊緊, 老師就抱住安慰… 爸爸媽媽望咗一陣就走去返工咯...

呢日接放學由婆婆負責, 媽媽中午打返去問晢晢放學時仲有冇喊?

婆婆話:「冇嘢喎, 不知幾開心, 臨放學時見佢係咁玩車車, 玩完一架又一架, 冇時停!」

婆婆又話:「晢晢見到我時都問我『媽媽呢?』 我咪話『返工lor, 唔駛做呀?』, 佢哦咗一聲又冇事喇…」

Wooo… 佢開心返都好d, 幾驚佢又喊到索晒氣呀~!

媽媽返到公司跟同事講起, 同事竟然話:「吓, 晢晢竟然喊呀? 我對佢期望好高過喎, 仲諗住佢一定唔喊添!」

嘻嘻… 其實媽媽咪一樣咁諗, 以為晢晢冇有怕, 但原來佢都有佢軟弱o既時候o既~~

媽媽冇失望架, 呢d只係人生過程, 就當作磨練啦, 將來晢晢要面對o既事仲有更多呀~!

晢晢加油!