我和爸爸媽媽到迪士尼 – 04.07.10

呢朝早一起身, 爸爸突然問晢晢:『晢晢, 想唔想去迪士尼呀?』, 晢晢可能未瞓夠, 竟然話:『唔去呀!』, 爸爸冇放棄, 再同晢晢講:『迪士尼有好多嘢玩架! 有閃電王麥坤喎~~』晢晢話:『我去迪欣湖呀!』…在旁o既媽媽開頭有點不悅, 無啦啦去乜鬼迪士尼? 天氣咁熱!!! 不過經分析後:

1)      成個七月都好忙

2)     八月更熱

3)     九月晢晢開學

4)     十月後小B出世有排唔出得去玩

最後媽媽決定妥協, 一齊向迪士尼出發~!!!

當到達迪士尼, 天氣真係超熱, 但媽媽一d都冇後悔! 因為晢晢係前所未有咁開心!!! 不停笑, 不停講, 不停玩!!! 呢日對晢晢嚟講一定好難忘~! 而媽媽對晢晢個滿足樣都好難忘~!

晢晢:『今次終於有得入迪士尼啦~!』

入場冇耐就有史迪仔巡遊睇~!

我哋大概11點到達, 因為太陽伯伯好猛烈, 所以先主攻室內SHOW, 第一個係LION KING~!

媽媽:『準備入場啦, 緊唔緊張呀?』晢晢:『我淨係覺得好熱咋, 入面有冇冷氣架?』

當燈一熄時, 晢晢突然大喊大叫:『我好驚呀! 我唔睇呀! 我要返屋企呀!』幸好安慰咗一陣晢晢就由頭睇到尾, 只係有點呆, 媽媽開頭仲以為晢晢好悶, 點知一完場, 晢晢就笑咪咪同媽媽講:『媽咪, 真係好好睇, 好得意呀!!! 我見到giraffe 啦, elephant 啦, 跳舞舞啦, 我哋睇多一次好唔好呀??』 (仔, 見你咁開心媽媽就開心喇~!)

之後緊接第二場SHOW ~~ GOLDEN MICKEY~! 可能因為有晢晢熟悉o既卡通人物, 所以唔駛warm-up就已經睇得好投入, 不停叫住佢哋o既名, 又跟住拍手歡呼… 最好笑係, 當WOODY出場時, 晢晢竟然問:『巴施光年呢? 巴施光年去咗邊呀?』 (哈~! 又係喎, 有WOODY又會冇巴施光年o既~!?)

臨完場前10分鐘, 倦極o既晢晢終於頂唔住… 爸爸媽媽趁機食LUNCH~! 不過瞓唔夠半個鐘o既晢晢話咁快就醒咗, 然後繼續玩~~

晢晢:『我差一陣電就得架啦~!』

瞓醒就嚟到巴施光年, 唔知晢晢會唔會以為自己執行緊太空任務呢?

晢晢:『我哋去打怪獸啦!』

晢晢:『正經D影張相先~!』

晢晢:『哎吔, 就到我喇, 好緊張啊~!』

晢晢個樣好認真架~!

玩完巴施光年爸爸就帶咗晢晢渣車, 仲玩咗兩轉!! 因為呢個遊戲唔適合孕婦, 所以媽媽只好留喺手信店呆等…

晢晢:『媽咪, 賣乜你一陣咁多啦~! 我同爸爸去飛車啦~!』

大概20分鐘後, 爸爸就帶咗個滿頭大汗o既晢晢返嚟, 晢晢一見到媽媽就好開心咁話:『媽咪, 真係好好玩呀! 我真係好開心呀! 我哋玩多一次吖好唔好呀?』… 本來媽媽好想拍底佢呢個滿足樣, 不過一舉機又變得怕怕醜醜~~~

跟住落嚟仲玩咗好多設施, 晢晢繼續HAPPY~~~

水花巡遊, 為炎熱o既天氣降降溫~~

玩完『世界真細小』, 晢晢就話:『我搭BOAT呀, 我見到… 我見到… (唱) It’s a small world after all…』(無啦啦唱起歌都有o既~?)

晢晢成日就係呢個傻樣喇~!

入面好嘢睇架~!

坐呢隻船晢晢同樣興奮, 好留心睇住周邊有D乜嘢, 一落船就如數家珍同媽媽講:『媽咪, 我見到zebra啦, hippopotamus啦, elephant啦, alligator 啦… 好得意架~!』

嚟到4D影院... 晢晢:『我係咪好有型呢?』

之後搭『船』嚟到泰山樹屋...

是日唯一一張全家福~!

排隊等WINNIE THE POOH, 期間, 晢晢不停叫住:『我要坐HUNNY車車呀!』, 不過呢個時候晢晢已經有點疲態, 伏咗喺爸爸身上差D瞓著! (不過知道仲有得玩, 所以點都頂硬上!)

一出去見到木馬又話要騎...

玩到差不多天黑就食晚飯, 玩飽o既晢晢終於識肚餓, 食咗成碗义燒飯(走义燒), 食到尾聲, 晢晢聲到廣播有FIREWORK立即彈起身拉我哋走去睇! 爸爸媽媽唯有順佢意提早15分鐘霸個靚位等開show…

我哋個位都唔錯架, 對到正, 唔迫, 又有陣陣涼風~~~

等候期間, 晢晢個人明明已攰到伏喺爸爸膊頭, 但把口就不停問:『FIREWORK呢? 冇o既?』, 好不容易捱到開始, 晢晢如願以償~! (D煙花真係好靚, 加埋d音樂, 感覺…仲好浪漫~~~)

散場時因為人太多, 我哋就逛多一陣手信店, 其間爸爸又父愛大發不停叫晢晢揀玩具買, 真係怕佢會龐壞個仔!!! 幸好晢晢好生性, 玩夠就自動自覺整齊地放回原位, 之後仲同件玩具say bye bye就離開, 然後同媽媽講:『媽咪, 我好叻呀, 識同玩具say goodbye呀!』(係呀! 晢晢你真係好乖! 好叻! 好抵鍚!)

到正式離開, 爸爸抱足晢晢成日真係倦極, 就放低晢晢話:『爸爸好攰呀, 你自己行啦!』同樣倦極o既晢晢當然唔肯放過:『我都好攰呀! 抱抱啦!』呢個時候媽媽出手了~~~ 臨出迪士尼門口, 晢晢回頭望住迪士尼話:『再見啦迪士尼, 我會再嚟架, 等我呀!』哈哈哈~~~~