晢晢有趣語錄 (兩歲半啦~!)

踏入兩歲半o既晢晢, 明顯地語言能力高咗, 雖然有時講嘢有點老積, 但出自一個兩歲半o既口, 就會變得好有趣, 真係好可愛~! 而家紀錄一吓佢o既有趣語錄先~!

有日搭緊車, 晢晢突然望出窗大叫:『嘩! 靚女喎!』~~ 引得全車人哈哈大笑!

某日爸爸同晢晢行過優之xx, 爸爸話:『入去買糖食好唔好?』晢晢話:『買糖咁好~!?』(得戚得你!!)

某日晢晢在家中boo boo, 痾痾吓大叫:『我… 我… 我… 我抽筋呀!』(完全唔知佢喺邊度學返嚟!?)

晢晢畀我哋說教得多, 而家都識教訓吓媽媽, 某日媽媽飲緊凍飲, 晢晢居然一臉正經話:『飲太多喇你! 飲少少吖嘛!!』(仔, 你怕媽媽飲晒你冇得飲咋嘛!)

晢晢有時又會對d唔正確o既行為睇唔過眼, 某日搭的士, 爸爸無啦啦除咗隻鞋, 晢晢見到就一手拍去爸爸大脾, 然後話:『著返隻鞋啦你!』(幾惡呀!)

而家晢晢好鍾意問我哋意見, 有時會問:『我哋一齊搭shuttle bus好唔好呀?』~~~ 有時又會問:『我想睇電腦得唔得呀?』… (算你乖啦~!)

有次媽媽跌咗嘢喺床邊, 當媽媽烏低身執果陣, 晢晢:『媽咪, 小心頭頭呀! 因住boom呀!』(媽媽心都甜晒~!)

有晚晢晢跟爸爸媽媽一齊食pizza, 佢食到菠蘿就lur咗出嚟, 然後佢就望住舊菠蘿話:『好核凸, 好核凸, 真係好核凸!』~~ (哈哈~! 識得加個『真係』加強語氣, 笑C媽媽啦!)

晢晢唔知幾時做咗<<反斗車王>>fans! 平日已經時時叫住『我閃! 我閃!』, 某日爸爸拎咗個反斗車王拉杆箱返嚟, 晢晢一見到就話:『嘩! 閃電王麥坤喎! 等我睇吓先, 等我睇吓靚唔靚先~!』(笑到媽媽收唔到聲!)

有日婆婆鬧Yoyo, 晢晢竟然夠膽做架兩:『做咩事呀你?』(婆婆怒火即時消晒~!)

有晚爸爸媽媽出外晚饍, 成十點幾先上婆婆屋企接返晢晢, 一入到門口晢晢就話:『我喊呀… 要返媽咪度… 咁耐… 我唔啋你呀!』(因為佢係咪咪咀笑住講, 所以媽媽知佢係扮嘢, 唔係真係嬲咗我哋~!)

某日爸爸畀香蕉糕晢晢食, 媽媽知道佢一向都唔食, 但奇怪地好快舊香蕉糕就唔見咗, 媽媽就問:『晢晢, 你吞咗舊香蕉糕嗱?』 晢晢:『唔係呀, 冇吞呀, lur咗啦!』媽媽:『吓! lur咗? 你lur咗喺邊呀?』晢晢(指住地下):『嘻嘻, 呢度lor, 我超勁呀!』(咁都叫超勁!?)

自從喺教會見到小朋友玩爆旋陀螺, 就時時叫住:『爆旋陀螺, 鋼鐵戰魂, Three two one go shoot!』(真係好學唔學…)

晢晢好鍾意拎爸爸d嘢飲據為己有, 有日佢拎咗爸爸杯凍檸樂, 爸爸偷偷地飲咗啖晢晢就投訴:『咦~~ 飲人哋d嘢!』(仔, 杯嘢明明係爸爸過喎~!)

晢晢一向偏食, 某日婆婆接放學諗住好心買個豬仔包佢嘆, 點咗咬咗一啖就話:『好難食呀! 你食啦!』然後婆婆再拎咗支價值十幾蚊o既提子汁畀晢晢飲, 晢晢用好疑惑o既眼光望咗一眼就問:『係咪利賓納嚟架?』婆婆呃佢話:『係呀, 飲啦!』晢晢飲咗一小口:『好難飲呀, 畀返你!』(激到婆婆扎扎跳, 事後媽媽同婆婆講, playgroup有茶點食, 下次唔駛再買嘢食畀佢喇~!)