7.1假期 & 反斗車王fans

7.1假期前一日, 晢晢突然患上氣管炎, 上午開始氣速要聞氣, 下午更開始發燒, 媽媽喺公司擔心得要命… 放工回到家, 晢晢仍有點氣速(坐喺度冇嘢做抖氣都hehe聲!), 但人仍然靈精, 玩得, 笑得又好多嘢講, 直頭你唔留心觀察佢呼吸都唔知佢有病!

到7.1早上, 晢晢係有點咳, 但呼吸暢順, 人亦好精神, 早上喺會所遊樂場玩咗一陣車仔就決定出街行吓~!

呢日晢晢好乖, 喺會所玩時好樂意借出佢心愛o既單車畀其他小朋友玩, 又會主動問其他小朋友:『我哋一齊玩好唔好呀!?』 感覺… 又生性了一點…

到中午, 我哋舉家到Megabox IKEA閒遊, 可能假期加上IKEA新開張, 商場真係好多人又好焗, 不過晢晢依然玩得好開心, 每個角落都可以玩好耐, 仲搞到滿頭大汗~!

巧遇麥兜, 晢晢主動要求合照~!

晢晢個頭濕到... 可想而知果度有幾熱!!

只係推車仔, 晢晢都可以玩好耐~~~

到晚上7點多, 我哋喺德福吃過晚飯後就繼續閒逛, 途中經過Trendyland, 畀晢晢拉咗入去, 爸爸見到有『閃電王麥坤』搖控車, 竟然主動問晢晢:『晢晢, 你要唔要呀?』其實晢晢無扭過要買, 加上媽媽唔想晢晢習慣要買玩具, 所以極力阻止!!! 不過無論媽媽如何明示暗示都一一畀人漠視, 媽媽無話可說…

不過當買到手後, 睇見晢晢笑咪咪個樣同埋對架車仔o既鍾愛程度, 媽媽心就軟了…

由買走架車到返到屋企晢晢一直都冇放低過, 即使中途呻過『好重呀!』, 晢晢都唔要我哋幫手!

攬住架車時晢晢不停同爸爸媽媽講:『要乖, 唔扭計先有得玩架!』…『爸爸送閃電王麥坤畀晢晢呀!』….『同Yoyo一齊玩好唔好呀?』…『而家唔玩, 我哋返屋企先玩好唔好呀?』… 佢滿足o既心情完全流露喺佢面上~~~  

返到屋企沖完涼, 晢晢即急不及待拆開嚟玩, 不停將d parts換來換去, 一玩就玩咗個幾鐘, 一秒都未離開過, 爸爸媽媽從未見過佢咁專心同咁長時間玩同一件玩具!!!

已過咗瞓覺時間, 晢晢依然繼續玩, 媽媽就話:『好喇, 唔好玩喇, 最多媽媽畀你攬住瞓啦!』出奇地晢晢竟然答:『好呀!』結果一撻落BB床, 半秒唔夠就笑咪咪攬住閃電王麥坤瞓著~~~

到第二朝, 媽媽一睜開眼就見到晢晢笑咪咪咁坐喺床上, 第一句說話同媽媽講係:『媽咪, 我鍚吓你好唔好呀!!』(明顯地心情極佳!), 然後第二件事又係拎住架車仔玩, 到印印姐姐上到嚟佢就唔駛人叫都主動收好玩具, 乖到連媽媽都眼凸!!!

晢晢o既表現, 令媽媽領悟到, 原來小朋友心情靚就會好乖巧, 而久不久一件半件物質都係其中一個令小朋友心情靚o既方法, 不過真係唔可以過量, 否則破產之餘仲好易寵壞!!! 小心! 小心!!!