BYE BYE 奶咀 – 17.06.10

可能因為晢晢只係瞓覺先食奶咀, 瞓著咗又唔駛食, 所以好多人都唔知原來晢晢咁大個都仲未戒…

其實喺晢晢歲半時已經完全戒掉, 但果陣爸爸突然工作變得超忙, 媽媽每晚(一星期7日)獨力揍仔變得心力交碎… 某晚, 晢晢扭計扭得好緊要, 媽媽又無力再同佢紏纏, 所以就畀返佢食(畀咗佢又安靜返喎), 而家諗返都好後悔… (講到好似毒品咁…)

唔經唔覺晢晢都兩歲半, 都係時候要戒架喇~! 手指水已經買咗一段日子, 一直等待時機… 不過揀17號呢一晚都只係心血來潮, 事前一d計劃都冇…

喺一年多前我哋已經同晢晢預告:『晢晢, 當你d牙仔出晒果陣個吱吱(奶咀)就會變咗辣辣架啦…』, 晢晢每次聽到呢句都會『siii』一聲然後話『辣辣呀』

呢晚, 晢晢臨瞓時問媽媽攞吱吱, 媽媽就話…

媽媽:『晢晢, 大件事啦!』

晢晢:『咩事呀?』

媽媽:『你d牙仔出齊晒啦, 今晚個吱吱變咗辣辣啦!』

晢晢:『No, 我要吱吱呀!』

媽媽:『辣過喎, 你要唔要試吓?』

晢晢:『試呀!』

之後媽媽就拎咗個加咗料o既吱吱畀晢晢(媽媽lam咗一啖, 真係好苦架, 但苦味好快就散), 晢晢食咗一啖就大喊:『呀!!!! 我個吱吱呀!!! 我個吱吱呀!!!』喊得個樣超級沮喪, 佢冇發脾氣, 只係坐喺BB床上垂頭痛哭… 感覺, 好似佢最好o既朋友離開咗佢咁… 

媽媽見佢喊得咁傷心, 就抱起安慰…

媽媽:『媽咪都話架啦, 晢晢出晒d牙仔個吱吱就會變辣辣架啦, 媽咪都知你好傷心, 你乖啦, 唔好喊, 媽咪鍚返你啦~』

晢晢:『媽咪換吱吱呀…媽咪換吱吱呀… I want white, I want blue, I want yellow..』(佢將佢所有吱吱o既顏色都數晒)

媽媽:『換咗都係辣架, 晢晢大個仔, 唔駛再要吱吱架啦!』

晢晢再一次痛哭, 感覺到佢好沮喪, 好失落(佢唔係扭計喊果隻!)… 媽媽睇見都忍唔住喊埋一份…

晢晢斷斷續續喊咗一個鐘, 一時話『媽咪, 我好驚呀』, 一時又話『媽咪, 我個吱吱呀…』(一直聲音都係軟弱無力的, 又不停流眼淚… 真係好淒涼…), 媽媽都有一刻想放棄, 但又唔想前功盡廢, 唯有不停口咁講故事分散佢注意, 到11點多, 晢晢終於喊到攰, 瞓著咗… 本來有晒心理準備佢半夜會扎醒, 但出奇地又可以一覺瞓到大天光~!

到第二朝, 晢晢見到床頭個吱吱竟然話:『辣辣架, 唔食架啦!』(又會咁快諗通o既?) 但到咗婆婆屋企後, 晢晢nap前都有問婆婆拎吱吱, 婆婆就拎個加料吱吱苦下佢, 佢喊咗一輪就自行入睡, 仲瞓得好林… (幸好婆婆冇心軟, 反而比媽媽更緊張話:『緊係唔可以畀返佢啦, 佢咁個人仲亂呀』… 咁媽媽都放心d~!)

到晚上返到我哋屋企前晢晢已經瞓著咗, 據姐姐所講晢晢呢日因為冇吱吱而成日喊, 相信佢係因為喊到好攰所以咁早瞓…

到半夜一點多, 晢晢扎醒咗, 以為佢又會扭吱吱, 但只係問咗一句『吱吱呢?』, 知道媽媽唔畀就冇再堅持, 一個鐘頭後又自行入睡直到第二朝…

又一大清早, 瞓飽晒o既晢晢心情勁靚, 媽媽特登讚佢:『嘩~! 晢晢唔駛食吱吱都得過喎, 好叻仔呀!』晢晢沾沾自喜話:『大個仔唔食吱吱架!』

之後兩日, 晢晢間唔中都會問『吱吱呢?』但態度唔會好堅持, 而且喺冇吱吱o既情況下, 由扭眼瞓到正式瞓著o既時間亦一次比一次短, 相信佢對失去吱吱o既打擊已經漫漫退去…  

第三日之後, 晢晢已經冇再提起吱吱, 而且瞓得好好, 好快入睡之餘亦能一覺瞓到大天光… 晢晢正式同吱吱say bye bye 啦~!

晢晢, 媽媽睇見你第一晚喊得咁淒涼個樣真係有D對唔住你o既感覺, 又擔心對你o既打擊太大… 不過呢D都係你成長必經階段, 而且你都handle得好好啊~! 希望你大個明白媽媽苦心啦~!