艾篙PLAYGROUP – 第二十堂 – 30.08.10

呢日返完PLAYGROUP o既晢晢好似攰到打完仗咁, 到底呢堂玩過D咩呢?

上課情況:

今堂由Kevin哥哥負責~! Kevin哥哥預備咗一個大碗, 一隻湯匙及數粒鐵波子, 然後叫小朋友舀指定數量o既波子~!

開始時隻碗係比較大隻, 波子o既活動範圍大咗, 小朋友舀o既時候顯得有點吃力, 所以後來Kevin哥哥轉用一隻較細o既碗, 小朋友表現就好好多~!

首先晢晢手o既協調能力不錯, 一來d鐵波子都幾重, 二來要控制隻湯匙一次過舀多粒波子都唔係易事, (例如舀緊第5粒時, 匙中o既波子好大機會會跌~!), 但晢晢做得不錯~! 

此外, 晢晢對數理掌握亦都不錯, 能準確舀出指定數目的波子(指令最多為6粒~!)

(小記:舀波子其間, 尤其當指令為6粒時, 晢晢曾經偷雞用手拾起波子然後放進湯匙內, 畀Kevin哥哥捉到正~! )

到下一環節, 小朋友要將湯匙內的波子傳到另一位小朋友的湯匙內, 遊戲好考小朋友的合作性及手眼協調能力, 晢晢無論做放或接果個都表現不錯, 波子未曾跌過~!

之後Kevin哥哥要求小朋友用語言向其他小朋友表示要幾多粒波子, 例如:『xx, 我想要5粒波子, 可唔可以舀畀我呀?』晢晢對於表達及接收訊息都十分準確~! 另外Kevin哥哥又試過輕聲從晢晢耳邊給指令, 例如:『晢晢, 舀3粒畀我~!』晢晢都能準確做到, 即晢晢對於無論大或細聲o既指令都能準確接收~!

之後Kevin哥哥安排小朋友畫波子畫 --- 先放波子到水彩中, 沾滿顏料後把它放到畫紙上(畫紙係放於一塊有框o既板上~!) 做法係要小朋友拎起塊板, 然後上下左右搖動令波子於畫紙上滾動, 畫出軌跡~!

遊戲前Kevin哥哥曾提醒小朋友『要小心d, 唔好太大力, 否則波子會跌…』未知晢晢是否過份緊張? 佢竟然小心到粒波子幾乎冇郁過咁滯! Kevin哥哥話正常由枱面拎起塊畫板時總有點郁動, 但晢晢係穩陣到連呢一下都冇! 所以晢晢幅畫比起其他小朋友就有點遜色, 但換個角度睇, 有如此表現又顯示晢晢手部協調能力不錯, 而且亦算是個謹慎的人~!

晢晢的波子畫

到下一節課堂 --- 大肌肉活動~! Kevin哥哥排咗4條離地有點距離o既棍, 然後畀指令小朋友要佢哋用雙腳連續跳過兩支棍, 晢晢明白指令並且能做到~!

之後Kevin哥哥要求小朋友左右左右腳咁連續跑過兩支棍, 晢晢只是一時時做到, 有時跑過第一支棍後要先雙腳踏齊先再起步跑過第二支棍… 後來改了用行的方法, 呢次晢晢就可以順利做到!

之後Kevin哥哥喺地下加上腳板, 用以協助小朋友掌握踏步的規律, 晢晢用行o既方法跨過棍都冇問題, 但當要做跑的時候, 晢晢仍有點矢步, 未能跟足腳板跑…

之後Kevin哥哥轉用數字牌, 小朋友要跟箸數字一步一步的跨過棍, 晢晢於認字冇問題, 但到要做跑的時候仍有點矢步…

後來Kevin哥哥將棍改為濶板, 晢晢無論要佢雙腳跳過或一步步跨過都冇問題~! (呢次因為安全問題, 所以冇做到跑~!)

課堂秩序方面:

依然良好! 尤其於上半環節晢晢係好專心咁舀波子, 即使都下半部份大肌肉環節, 晢晢都只係間中離座, 但只要一叫都會乖乖返回座位, 表現算是不錯~!

                              

返埋呢堂, 晢晢就要正式返K1喇, 因為婆婆唔贊成晢晢放學後趕返PLAYGROUP咁辛苦, 所以由9月開始晢晢會改為返星期六早上o既PLAYGROUP, 由爸爸接送, 希望晢晢能繼續好好學習~!