下白泥泥漿樂園 16.08.09

上上個星期日爸爸坐喺電腦前唔知search緊乜, 媽媽都不以為意, 突然爸爸大叫: “老婆, 今日帶晢晢去呢度咯~!” , 媽媽一睇, 原來係出名睇日落勝地 – 下白泥, 爸爸話想同晢晢捉蟹仔wor (仲以為同媽媽睇日落tim)~~ 見近近哋, 打的都係有限錢, 一於奉陪~!

 

我哋大概3點出門口, 喺的士上司機大哥不停講: “而家呢個天時邊有人去丫, 咁熱, 仲要而家3點幾, 晒到死呀…”, 媽媽本來聽到個心都沉一沉, 但一場嚟到可必 “畀個三九唔識七o既司機掃自己興?”, 媽媽即時用念力 “我睇你唔到… 我睇你唔到…”

 

車都行咗一段時間先到 (原來車程都頗遠架), 雖然下白泥係頗偏僻o既地方, 但其實人都唔算少~! (真係要哼司機大佬老虎頭, 又話冇人嚟!!!), 我哋喺門口間士多買咗包芝士餅畀晢晢後就向 “泥漿樂園”出發啦~!

 

沿路都幾晒, 又熱, 但無損晢晢心情, 睇佢笑得幾燦爛就知啦~!

 

行咗數分數就到咗目的地~! 嘩~~~ 係一個幾乎一望無制o既泥漿浴池! 都幾心懭神怡架~!

 

開始時要媽媽赤腳搭喺濕林林軟綿綿o既泥漿上都有d郤步, 但睇見晢晢同爸爸好興奮個樣, 好快就畀佢哋感染咗,  豁出去赤腳行起上嚟啦~!

 

開始時晢晢套衫仲好乾淨, 但冇耐晢晢就開始學爸爸除咗對鞋, 之後仲奮晒身玩成個人坐咗喺泥漿上玩, 唔通晢晢以為可以護膚??

 

 

今次爸爸帶晢晢嚟呢度o既主要目的係捉蟹仔, 呢度基本上行幾步就有一隻~! 爸爸捉咗一隻叫晢晢拎住, 晢晢好叻仔, 竟然夠膽徒手捉住仔蟹仔~! 果然熱愛大自然~! (其實媽媽覺得晢晢同爸爸一樣咁變態就真~~~)

 

 

之後爸爸整估晢晢, 叫晢晢: “食丫”(食咗隻蟹仔)~~ 好在晢晢都唔笨, 一嘢就對咗隻蟹仔畀爸爸(叫爸爸爸)~! 哈哈~!

 

玩咗大概個多小時, 晢晢已經晒到面燶燶, 爸爸同媽媽就打算同隻污jo貓沖身準備, 點知行咗個圈都搵唔到水喉! 我哋入咗間廟問, 佢就建議我哋去附近條溪沖身~~

 

河邊沖涼, 晢晢好似返咗古代咁~!

 

 

晢晢係咪好wild呢~~~

 

沖完身, 晢晢大叫 “餅餅呀~餅餅呀~” 媽媽就畀咗塊芝士餅晢晢, 跟手問晢晢: 好唔好味呀? 點知晢晢黑面拎頭表示唔鍾意食~! 晢晢, 唔好食都係咁食, 你一定好肚餓定喇~!

 

同晢晢休息咗一陣, 我哋一家三口就搭車去流浮山行咗個轉, 買咗少少口立濕就打的回府lu~~

 

呢日晢晢玩得好開心, 不過就真係晒到佢燶~! 第二朝印印姐姐上嚟接晢晢時都話晢晢黑咗d, 印印姐姐仲伸出佢自己隻手脾同晢晢比較膚色, 一比之下先知, 原來晢晢真係就快有姐姐咁黑啦!!   

 

晢晢, 你就嚟似姐姐個仔多過媽媽個仔啦~! 哈哈~!