你快樂嗎?

剛過去o既主日, 當徐牧喺台上邀請我哋關心隔離左右o既弟兄姊妹"你快樂嗎?"時, 媽媽一如以往面帶笑容保持沉默(媽媽其實係個好內歛o既人), 正當媽媽觀察緊四周弟兄姊妹時, 坐喺背後o既潘牧突然拍一下媽媽膊頭, 然後問: 你快樂嗎? 本來只諗住講笑: 唔快樂呀~! 但潘牧竟然好快咁答: 我知呀!

 

果一刻, 唔知點解個心好激動, 眼淚差不多要流出嚟… 實在太尷尬, 所以應咗一句 “我冇事”就拎轉面迴避, 然後9秒9叫自己盡快冷靜… 畀一個人看穿已經夠, 可必嚇壞其他人!?

 

冷靜過後, 媽媽都唔想再諗點解自己會咁激動(一諗眼淚又要流啦!)... 或者是忙到連自己快唔快樂都冇能力肯定… 又或者跟本冇咩唔快樂, 只係感動聽到有人"了解我"... 算吧! 何必自尋煩惱!?

 

其實媽媽好簡單

可以照顧得晢晢妥妥當當

可以默默地做爸爸背後o既女人

可以見到家人因為自己o既努力而開心

已經好滿足

 

 

突然想起好耐之前一次團契中, 大概7-8年前吧, 當時仲喺學生組, 組長叫大家想想自己o既志願... 仲未有著落o既我, 都未敢肯定自己有冇機會嫁得出... 但想了又想, 最終鼓起勇氣同大家分享"我要做個好媽媽"!

 

記得當時大家反應都冷冷的, 或者因為只得我一個想得太遠, 冇共鳴... 又或者大家當我"發up風"... 冇打緊, 自知自己想緊乜已經夠了! 其實好細個已自覺好了解小朋友個心需要d乜, 當一個好媽媽就好似使命咁, 要為小朋友做一點事...  

 

而家, 真係為人妻喇, 真係做咗媽媽喇... 雖然自知仲有好多改善空間, 但心從未冷過, 都未曾懶過...

感謝天父讓我可以當媽媽

見到晢晢開開心心成長

見到爸爸冇顧慮咁發展自己o既事業

媽媽當自己100分架啦~!