一夜長大

一覺醒來就長大咗~!? 對上一次有呢種感覺係喺晢晢大概4-5個月大時, 有一晚, 放晢晢入床仔時, 佢好似就快"賺"爆張床, 冇乜位畀佢轉身咁... 到第二日, 就發現有好多衫仔都唔啱著 ~~~ 咁誇張? 其實可能只係我操心大意, 平日冇留意~! 但又唔排除"細路真係大得咁快"~!

近來再次有呢種"一夜長大"o既感覺, 不過呢次唔係喺體型上, 而係突然覺得晢晢... 成熟咗... 好多點滴, 好怕會忘記, 好想一一記下...

星期二朝早, 一覺醒來就見晢晢自己坐喺床仔, 同鏡入面o既晢晢玩peekapu --- 蹲低時講: "peekapu, 冇o既?", 之後企喺身指住鏡入面o既晢晢講: "哦~ 喺度"... 重複玩咗好多次, 之後再自己拎字咭睇... 其實遊戲都係其次, 媽媽最大感覺係, 晢晢減少咗朝早對我o既倚賴, 唔再一張開眼就叫"媽媽抱抱", 而係可以自己同自己玩...

同一朝早, 晢晢講嘢多咗, 清楚咗, 最欣喜晢晢講o既係中文... 其中一個係每朝會講o既"早晨", 過往係"賭神", 呢朝終於清楚講: "早晨"~!

亦係同一朝早, 晢晢驚覺性似乎高咗, 意識到自己坐o既位太"忟"就跌, 會主動坐返埋d~!媽媽正暗暗地嘗試著放手讓晢晢去感受, 甚至讓佢踫踫釘... 不過呢次反而係爸爸未接受到, 每每見到晢晢坐得太忟就會好快"撲"去抱晢晢坐埋少少, 甚至攬實佢... 呢個可能係因為爸爸見得晢晢少有關, 仍然覺得晢晢好BB... 不過話雖放手, 媽媽都唔會掉以輕心, 一旦動作太危險媽媽都會制止!

明明仲有好多, 不過真係記唔返, 希望有日記起可以後補...

諗返轉頭, 長大o既除咗晢晢, 其實仲有媽媽, 係咪呢!? 媽媽都唔太肯定~!但一路壓喺心口果啖氣(係壓力), 似乎鬆了一點... 過往叫媽媽"放手", 真係太難, 媽媽將同晢晢相處o既時間看得好重好重, 連一秒都唔想錯過...但呢幾日, 似乎想通了甚麼...