床邊故事

自晢晢幾個月大開始, 每晚(除非晢晢一早瞓咗)媽媽都會講一個床邊故事先讓晢晢瞓~! 過往晢晢尚算留心, 可以定定地聽完一個故事先走開(當然都有失手時候 ), 但聽唔聽得明就有點保留... 講到某一頁時, 晢晢或者會好躇躍, 但每每唔係因為個故事內容, 而係見到書中有佢認得o既東東, 例如 dog dog 呀, bird, butterfly, baby, Noddy, car, blue, red, apple, chair...晢晢會好開心咁話我知佢認得d乜, 不過阿仔, 媽媽講果本唔係認知o既書, 而係故事書喎~

雖然如此, 但媽媽依然堅持講出故事內容, 因為媽媽深信未見成果唔代表冇果效~!

早前喺書展買咗數本<<3分鐘床邊故事>>, 星期日晚, 媽媽如常講故事, 不過今次有爸爸同晢晢一齊做小聽眾, 有爸爸幫忙做反應, 媽媽愈講愈落力, 聲線表情都誇張不少~! 呢次, 晢晢反應同過往好唔同, 似懂非懂咁, 故事內容去到某d位要大叫時就大叫, 要安靜時就安靜, 要大笑時就會大笑...

媽媽喺呢次經驗, 似乎掌握到少少講故事o既技巧(講咗年多先掌握到 ), 之後幾晚我都用呢個方法同晢晢講故事, 明顯地, 晢晢投入度大咗~!

今晚, 媽媽講o既故事係<青蛙王子>, 晢晢反應又有新突破~!

當媽媽講到"公主個金球唔小心跌咗落個井度..." 晢晢就話: "波波, 冇咗!"..

然後講到"公主因為冇咗個金球而好唔開心..." 晢晢就跟住做出唔開心表情... 

"青蛙去咗城堡搵公主..." 晢晢大叫: "開門呀!"

"青蛙要同公主一齊食飯"... 晢晢就話: "食mum mum呀!"

"原來青蛙係一個好英俊o既王子嚟架..." 晢晢: 嘩~~~~

"最後公主同王子就快快樂樂咁一齊生活啦..." 晢晢: (拍手)yeah (應該係想講"好嘢"不過講咗yeah..).

媽媽用咗不同o既語氣同表情動作後, 晢晢似乎對故事內容明白多咗! 今次真係多得爸爸啟發, 真係應記一功呀~!