好多好多鼻涕蟲

咩係鼻涕蟲呢? 其實媽媽都唔知佢真正o既名係乜? 總之, 就係一條蟲咁, 個樣好似冇殼蝸牛, 媽媽隨口叫咗佢做鼻涕蟲… 每逢落雨, 屋企樓下都會有好多鼻涕蟲走出嚟~~~

都好幾個月前o既晚上, 屋企樓下又出現好多鼻涕蟲, 晢晢見到以為係樹葉, 就話:『媽咪, 樹葉呀, 我踩!』跟手一腳踩落去, 可憐o既鼻涕蟲差d變屎餅…

媽媽見狀即大叫:『唔係樹葉嚟架!』晢晢知道自己搞錯咗即嚇到頭髮都豎起晒, 然後慘叫:『呀!!! 唔係樹葉!!! 係鼻涕蟲嚟架!!! 好驚呀!!! 好驚呀!!! 抱抱呀!!! 抱抱呀!!!』個樣十級好笑!!!

而家每逢下雨天經過樓下, 晢晢見到地上有疑似鼻涕蟲物體到會問:『媽咪, 係咪鼻涕蟲嚟架?』, 然後又問:『我踩鼻涕蟲好唔好呀?』媽媽就會話:『唔好踩啦, 你踩扁咗佢會好慘架, 而且你都驚啦, 你唔記得上次嗱?』… 然後晢晢就會怕怕醜醜咁笑住點頭~~~

鼻涕蟲事件對晢晢影響都顯示咗喺佢所畫o既畫上, 時時都要畫鼻涕蟲, 又要求媽媽一齊畫, 仲話要畫『好多好多好多鼻涕蟲』先夠… 媽媽就嚟畀你笑C~!

晢晢, 希望你快D擺脫鼻涕蟲o既陰影啦~!