艾篙PLAYGROUP – 第十四堂 – 09.08.10

剛到步時晢晢剛剛小睡扎醒, 所以喊咗一陣, 但又係好快冇事, 而且比過去幾堂快安靜, 所以都算係小進步~!

上課情況:

上半部份主要玩有關數理o既遊戲, Surmen姐姐將立體數字放入袋中, 並要求小朋友憑感覺摸出正確數字, 晢晢表現不錯~! 之後Surmen姐姐再要求小朋友排數字, 例如排1_3, 小朋友就要放2到中間, 排312, 小朋友就要將2及1調轉~! Surmen姐姐話晢晢表現很好, 無論如何組合都能夠正確排好! (媽媽就有點奇怪, 因為之前喺家中曾玩過類似練習, 但晢晢表現只係一般, Surmen姐姐話可能班中有同學仔做到, 晢晢睇見人哋點做就喺當中領悟到~! 咁睇嚟同輩力量都幾大, 安排佢返playgroup係冇錯o既~!)

另外, Surmen姐姐話晢晢每次拎起數字都不會倒轉或反轉放下, 即晢晢冇『鏡面字』問題~! (啫係晢晢唔會有讀寫阻礙啦~! 咁就好喇~!)

之後Surmen姐姐再安排小朋友寫數字, Surmen姐姐先喺牆上貼上數字, 然後小朋友就用電筒模寫出123, 晢晢均可做到~! 不過當要求小朋友喺空白o既牆上寫(照)出123時, 晢晢寫1及3冇問題, 但寫2時會經常漏咗寫最底一畫~! 之後Surmen姐姐就拎出盛有米o既盤叫小朋友寫123, 晢晢就123都能寫到, 當熟習後再叫晢晢於空白牆上寫出(照)2字時, 晢晢就再沒有漏寫最底一畫喇~! (媽媽聽見晢晢能夠喺米盤寫字, 立即向婆婆申請咗兩嘜米畀晢晢練習練習~~ 嘻嘻, 真失禮, 晢晢家係冇米架~!)

到課堂下半部份 ---- 大肌肉活動~! Surmen 姐姐於地出放咗幾個呼拉圈, 第一行放一個, 第二行放兩個(玩法似跳飛機), 然後要求小朋友於一個呼拉圈時就雙腿一同跳入, 於兩個呼拉圈時就分開腿跳(每個圈一隻腳), 晢晢做得唔錯~! 之後Surmen姐姐喺每個呼拉圈內放入一個豆袋(共4個), 小朋友每跳入一個圈就拎起個豆袋, 收齊4個就當完成~! 晢晢做法好搞笑, 佢係就係按遊戲規則收齊4個豆袋, 但就唔係用手攬住, 而係每拎一個就『wei』開件衫放個豆袋喺衫入面, 最後件衫入面就有4個豆袋! 真係唔知話佢懶定係醒好!?

課堂秩序方面:

Surmen姐姐話而家晢晢class discipline表現得好好, 已經好少走來走去 (除咗大肌肉活動時, 不過通常一提都會即刻坐返好), 媽媽聽見就放心晒咯~!