艾篙PLAYGROUP – 第十一堂 – 29.07.10

今堂晢晢臨入課室時都有點黐身而喊咗一陣, 同學仔Anna好細心, 主動拎紙巾同晢晢抺眼淚, 真係乖~! 然後晢晢好快就笑返並投入上課~!

上課情況:

遊戲分兩parts, 一開始Surmen姐姐砌咗條彎彎曲曲、 高低不平而又有好多分岔口o既路, 其中一端放有一個大呼拉圈, 裡面放有不同顏色o既豆袋, 小朋友要找出路線然後爬入呼拉圈中拎出豆袋, 然後再找出路線將佢哋帶『返屋企』(放於分岔口的桶中)…

到遊戲另一part, Surmen姐姐要求走到桶前, 找出不相應顏色o既豆袋, 然後找出路線將豆袋放到正確o既桶中~!   

Surmen姐姐話晢晢於分顏色表演很好, 找出路線更相當突出! 一來完全唔需要提都能找對路線, 二來晢晢係每次都會explore不同路線(即目的地一樣, 但每次都會行唔同o既路線!), 而每次都唔會行錯 (證明晢晢係諗好路線先行動而唔係亂撞!)  Surmen姐姐話, 以佢哋呢個年紀一般都會邊行邊搵路, 有時甚至會中途行錯路, 又或者每去同一個目的地都走同一條路, 好少會好似晢晢咁會諗得出咁多路線! Surmen姐姐話佢教咁耐晢晢係第一個會咁做喎… (媽媽覺得呢種性格好似爸爸!!! 爸爸又係好鍾意explore新路o既人~!)

到課堂下半部分, Surmen姐姐唱OH MACDONALD然後問小朋友OH MACDONALD有咩動物? 不過呢班同學回應較少, 晢晢就衰到只識答:『有小動物lor~!』(仔, 咩小動物先得架!!!???) 之後到想像力遊戲, 例如扮拍打蒼蠅, Surmen姐姐話有d小朋友會幻想到蒼蠅被拍死然後掉喺地上, 但晢晢反應則較小… Surmen姐姐話晢晢認知能力好強, 但似乎又因為咁而削弱咗佢o既想像力, 建議媽媽同晢晢玩多d天馬行空o既role play 遊戲, 因為當佢正式入學後要吸收更多知識時, 想像力就只會更弱…

到玩扮動物時(例如小狗擺尾), 晢晢就好開放地去follow, 證明佢係玩得好投入~!

(小記: 關於想像力, 喺剛過去weekend的晚上, 晢晢無啦啦拎起『無影相機』跟爸爸媽媽影相. 然後拎畀爸爸媽媽問影得靚唔靚… 之後晢晢唔小心跌倒, 爬返起身之後就話:『唉吔, 我部相機跌爛晒啦!』, 然後將地上o既『碎片』執畀爸爸叫爸爸整... 其實晢晢想像力都唔係太差啫~!)

課堂秩序方面:

Surmen姐姐話明顯地晢晢係乖及坐得定咗好多~! 又話佢係好精神, 好活躍, 似乎真係乖咗而唔後病後不在狀態~! 其實媽媽都覺得晢晢近來喺家中都自動自覺咗好多, 相信呢個playgroup居功不少!

小插曲…

返完playgroup果晚, 媽媽問晢晢…

媽媽:『晢晢, 今日返playgroup好唔好玩呀?』

晢晢竟然答我:『我冇返playgroup呀!』

媽媽再問:『咁你今日有冇見到Surmen姐姐/ Kevin哥哥/ XX同學仔呀???』

晢晢奸笑答:『冇呀! 冇見到呀! 我冇返playgroup呀!』…

其實媽媽都估到佢係玩嘢居多, 但都有一點懷疑佢真係冇返而想向婆婆求證, 點知咁啱打親畀婆婆都搵唔到人, 直到第二日Surmen姐姐打嚟, 媽媽先肯定到佢有返咋~! (真係畀佢玩C~!)  

事後同Surmen姐姐分享, 原來咁啱呢堂呢班同學仔都整古Surmen姐姐, 一入課室時某同學刻意叫Surmen姐姐做Kevin哥哥, 晢晢就和應:『係呀! 你係Kevin哥哥嚟架!!!』…(晢晢, 你愈來愈古惑喇~~~)