艾篙PLAYGROUP – 第十六堂 – 16.08.10

Surmen姐姐打畀媽媽第一句說話就係:『晢晢呢堂好乖, 坐得好定~!』… 實在令媽媽感到安慰~! 回想起晢晢初上課時好似生番咁周圍走兼同人大打出手, 到而家可以變回一個乖孩子, 呢個PLAYGROUP實在功不可沒~!

上課情況:

上半部份係靜態活動, 晢晢表現相當專注~! Surmen姐姐先喺珍珠板(類似發泡膠板)上用顏色筆畫上2及3字, 然後要求小朋友沿線用鉛筆轉出小洞, 晢晢做得不錯, 一來夠力穿過底, 二來對於『2』字的轉彎位都掌握得好好, 明顯地小肌肉有進步~!

之後Surmen姐姐要求小朋友用針線穿起板上的小洞, 晢晢係完全唔需要提點都能夠一個洞接一個洞, 將線上下上下將整個2字穿好, Surmen姐姐話晢晢個2字做得好靚~! 但到穿3字時就會間中skip咗d洞, 尤其於轉彎位時需時提醒方能穿好~!

到課堂下半部份 --- 大肌肉活動, Surmen姐姐搖動跳大繩的繩叫小朋友跳過, 呢班同學仔好夠膽量, 全部成功過關~! 之後晢晢自行加深難度, 主動拖住另一位女同學 騙人哋:『我帶你去搵媽咪好唔好呀?』, 然後拖住人哋一齊跳繩! 不過Surmen姐姐話佢哋做得好好, 最後三個小朋友更成功地數123齊齊跳, 相信佢哋一定玩得好開心~!

之後Surmen姐姐將呼拉圈套於繩中並將它吊起凌空, 再於地上放幾個斜台, 小朋友就要扶著凌空的呼拉圈走過斜台, 晢晢manage得不錯~! 到轉彎位時, 雖然未至於好自如, 但都明白要先放一放手, 然後再接過呼拉圈再前進, 而唔係死拎住個呼拉圈唔放~!

之後Surmen姐姐再將套有呼拉圈的繩『fing』高(過頭), 然後再叫小朋友去接住個呼拉圈, 晢晢好夠膽量, 會伸高手去接, 而且能成功接住! 之後晢晢突然要求『我要喳車』(可能呼拉圈似軚盤), Surmen就順勢叫小朋友一齊『喳車』, 其間會叫佢哋直去及轉彎, 小朋友都玩得好開心~!

到課堂尾聲, Surmen姐姐叫小朋友推及接呼拉圈, 晢晢接得好好, 但推就似乎未掌握到, 未能把握放手時間, 所以推出時距離一般只有佢隻手咁遠, 睇嚟又係做特訓o既時候喇~!

最後Surmen姐姐話晢晢臨入課室跟婆婆say bye bye時都有d扭計, 但又係見到其他小朋友喊時又識得勸人哋『唔駛喊, 媽咪一齊嚟接你冇問題~!』所以媽媽同Surmen姐姐都一致認為晢晢只係扮嘢! 無需要太擔心~!