晢晢受傷了 >.<

嗚嗚嗚… 大好星期日, 仲係晢晢返<幼兒樂園>開學大日子, 點知一早起身, 晢晢喺大人床玩玩下突然畀張被跘倒, 成個大字形撻咗喺床邊, 個頭BOM一聲撞咗喺床邊o既雲石窗台上… 晢晢頭兩秒喺定格冇出聲, 第三秒就大喊加尖叫!! 媽媽一反轉晢晢, 唉… 已經一口血! 唇邊 “監生”撞到裂開, 內唇亦同樣畀4隻牙仔撞破流血… 狀甚淒涼…

睇下晢晢個咀腫到

晢晢對於自己o既傷勢都大為緊張! 不停意圖用手抓偒口!!! 爸爸媽媽見狀即夾手夾腳按實晢晢唔畀佢郁, 晢晢當然不斷反抗, 但爸媽擔心晢晢傷口惡化只好堅持角力, 媽媽又用沾有黃藥水o既綿花按住晢晢傷口止血…  大概掙扎咗大半個鐘, 終於漸漸冷靜落嚟, 爸爸媽媽就開始輪流換衫帶晢晢去診所…

一落到街, 其實晢晢已經好似忙記咗自己受傷咁, 仲會笑, 但事實傷口仍不停滴血… 

等咗大概30分鐘終於有得見醫生, 醫生話好在晢晢傷口近唇邊而非近下巴, 否則就要聯針, 而內唇一般都好快好, 叫我哋唔駛擔心… 醫生同晢晢喺唇邊傷口上貼咗聯針用膠布幫助傷口瘉合, 又開咗一支止痛消炎藥, 希望晢晢快d好返啦~!

值得一讚係, 晢晢見醫生時真係好乖好乖, 醫生叫佢張開口就張開口, 抬高頭就抬高頭, 叫佢唔好郁就唔郁(貼膠布時), 真係好抵鍚!

到晚上晢晢傷口比朝早更腫, 又因為個咀合唔埋, 瞓著覺都不停流口水, 流到成頭都濕晒, 真係冇陰公… 求天父醫治晢晢, 快d好返啦~! 爸爸媽媽都要喺窗台做d防撞措施以免再有同類意外喇~!