煙火晚會

某日唔知點解爸爸好有興致咁話: 星期六去睇煙花咯~! 原來佢係講緊9月19日喺屯門舉行, 慶祝祖國建國60周年o既煙火晚會~! 哈~ 帶下晢晢見識下都唔錯~! 就陪你癲!!

一講煙花, 媽媽就諗起1997年7月1日喺尖沙咀第一次睇煙花... 隆隆o既巨響, 大到好似要撲向面o既煙花… 真係好震撼!!! 媽媽仲記得散場時人多到無路可逃~! 媽媽唯有隨住人群行到一個停車場, 然後沿外墻水洰由1 樓爬到地面!! 而家諗返都唔明點解當年咁大膽!? 想到呢度, 就好期待晢晢睇煙花時個樣到底會係點呢!? 會喊"驚驚"”? 定係會“嘩嘩”聲??  

呢日我哋一家3口連同爸爸個朋友4點多就到咗屯門, 是日原來仲係一個盤菜宴+BBQ, 不過天氣實在好熱.好熱.好熱!! 都冇乜胃口食嘢, 晢晢更加變咗隻濕水雞...

晢晢: [我哋坐18席呀~! 幾威~!]

一直等到8點正煙火晚會終於開始啦~! 我哋所在o既位置對到正兼一望無際, 但d煙火確實令人失望… 唔想形容得太衰, 但真係好想用 “奀支支"嚟形容…

不過既然一場嚟到, 媽媽都嘗試努力營造氣氛, 不段喺晢晢耳旁“嘩嘩”叫, 不過晢晢一d反應都冇, 媽媽“嘩”咗5分鐘… 都係… 算吧… 接受現實吧…  

媽媽都有一刻期待最尾數分鐘會有d驚喜掛!? 不過… 都係… 唉...

晢晢仲悶到臨尾5分鐘... 真係企喺度都瞓得著...

算啦~! 爸爸媽媽都唔會太失望o既, 總算 “見識”過, 又出咗一身大大大大大汗丫~~~

晢晢, 最多10月1日再同你睇過~~ 不過係睇電視~~ 哈哈哈~~~~

雖然奀D~ 但都放返幾張煙花相做個紀念啦~! (左邊赤膀果個係晢晢嚟架~!)