幼兒樂園 – 第八堂 08.11.09

今堂係尾三堂啦~! 不過今堂因為有部份同學要K1 interview, 又有同學唔舒服,, 所以得返Wincy, Anna, 小逸同晢晢4位同學返學咋~!

晢晢:「李小龍look, 勁呢~~ 哈哈!」

每堂必玩玩具~!

唔知係咪因為人少? 今堂晢晢玩得特別開心! 尤其喺唱遊時間, 今堂冇跳舞, 而係玩「爭凳仔」(不過冇扣起一張凳)… 當音樂響起時, 小朋友就要起身圍圈圈跑, 當音樂停時, 就要快快返埋位坐…

玩頭兩次時, 婷姨姨同家長都有開口提示「有音樂啦, 起身行喇… 音樂停啦, 返埋位啦…」, 玩到第三次時,  婷姨姨就要求家長唔准提水(當然婷姨姨都冇提), 目的係要等小朋友自己領悟~! 哈~! 估唔到晢晢竟然馬上明白到遊戲規則~! 當音樂停低時, 晢晢灘開雙手話:「冇聲o既?」, 然後就自行返埋位坐定定~! 到音樂再次響起時, 晢晢又會自行起身走圈圈! 爸爸媽媽對晢晢o既表現都好SURPRISE, Surprise到連相都唔記得影~! 媽媽為免騷撓其他同學, 所以只遠距離向晢晢「樹」起手指公表示讚佢叻叻, 晢晢就滿足咁向媽媽笑一笑~! 片段請CLICK: http://hk.myblog.yahoo.com/myadrianbb/article?mid=896

今堂又講有關刷牙o既故事, 位位都聽到眼定定~!

聽完故事, 婷姨姨原意想小朋友畫「牙膏畫」, 不過擔心小朋友會敏感, 所以就改咗用類似texture但又溫和d既cream喺黑色o既枱布上畫~!

晢晢:「立黐黐, 我鍾意呀~! 我督~!」

「拍拍拍~!」

「Circle~ Circle~」

左右手一齊畫畫, 婷姨姨話「健腦」架, 晢晢, 仲唔做多d!!!

玩咗一陣已變成油立立污jo貓一名…

今堂人少咗, 所以媽媽都留意到好多趣事~! 全部都係發生喺Anna同學及小逸同學身上~!

Anna同學每堂都會揀凳仔坐, 又愛Hello Kitty又愛Pooh, 本來揀好咗Hello Kitty, 但見到小逸同學坐咗Pooh又想要返Pooh, Anna竟然襯小逸起身交樂器時以極速坐咗小逸張凳~! 小逸拎轉頭見到自己張Pooh畀人坐咗, 就嬲霸霸dum咗一吓腳, 然後拍一拍張Hello Kitty示意Anna坐返Hello Kitty, Anna就好無奈咁坐返Hello Kitty~~~超可愛~!

趣事二係發生喺茶點時, 當婷姨姨派蘋果到Anna時, 婷姨姨要求Anna講:「謝謝婷姨姨」, 唔知Anna係咪太心急, 一向口齒伶俐o既佢, 竟然講到好肉緊:「謝謝… 謝謝謝… 姨… 婷…姨姨姨…」, 個樣好似畀人鍊住條頸咁, 對眼又愈碌愈大, 好搞笑~~ 唔知Anna爸有冇拍低呢個趣怪樣呢?

第三件趣事都係喺茶點時, 小逸同學似乎唔太喜歡食蘋果, 但為咗食蛋糕, 就被利誘「質」晒d蘋果入口, 不過後來後悔想lur, 小逸媽就彈開唔畀小逸黐埋去, 小逸爸亦都不為所動… 無奈o既小逸就含住啖蘋果四圍騰, 一時想鼠去垃圾桶, 一時又想走出課室… 可惜統統畀爸媽制止~! 小逸含住啖蘋果起碼有5分鐘, 直到婷姨姨切少少蛋糕畀小逸食, 小逸先將d蘋果連蛋糕齊齊吞下~! 真係好可愛~! 不得不讚係, 雖然小逸係好唔願意食, 但全程都只係低聲慘叫, 冇發過脾氣又冇周圍lur, 真係超級乖~!

點解今日特別想記低d趣事呢!? 因為唔經唔覺, 已經係尾三堂喇, 相信完咗呢一期Playgroup後就唔會再有機會聚齊咁多個一齊上堂, 一諗到呢度, 就真係好唔捨得… 所以好想記多d點滴, 等將來好好回味~!

呢班小朋友, 由佢哋7-8個月大開始就一齊上堂, 數數手指, 已經有一年多… 睇住佢哋由BB長大成小朋友, 每個o既性格愈來愈突出, 感覺好奇妙~!

近來佢哋都忙於K1 interview, 祝佢哋每位都順順利利, 考到心儀o既學校~! 又祝佢哋升上N1後能快快適應, 開心上學去~!