說句子

晢晢會用詞語組成短句都有一段時間, 但就「甩咳」d, 未算好流暢~! 不過喺上星期五, 晢晢突然畀咗個驚喜媽媽~!

當時晢晢玩緊個電風扇仔, 發現開唔著, 就拎畀媽媽叫媽媽開, 媽媽(扮晒)檢查後就同晢晢講:「哦, 冇電呀!」, 之後晢晢竟然爆咗句:

「冇電呀!? 搵爸爸整丫!」

嘩! 媽媽聽到嚇咗一跳!  晢晢, 你幾時識講咁長o既句子架!? 之後媽媽即刻打畀爸爸叫晢晢講多次, 可惜呢日晢晢唔想講電話…

到上星期日, 完咗<幼兒樂園>就一家去行商場, 爸爸人有三急去廁所, 晢晢見爸爸走開咗就問:「爸爸呢?」, 媽媽就話「爸爸去疴豬豬!」, 晢晢竟然跟住講:

「我哋爸爸去疴豬豬呀!?」

好驚訝!! 點解識加個「我哋」喺頭? 點解一口氣講到咁多隻字!? 明明上星期仲未得架~! 點解咁突然架!?

小朋友, 點解大得咁快o既!? 晢晢係咪好快就識駁咀架啦!? (唔好呀!!!)