晢晢的新朋友

喺屋企媽媽一向好少打開大門, 不過自從知道有位20個月大o既小妹妹久不久都會到隔離屋婆婆家開餐時, 媽媽為咗畀晢晢認識新朋友, 就開始晚晚都打開大門, 等候機會邀請妹妹來我哋晢晢家玩~! 好在機會好快就來臨~~~ 

 

開咗門幾日, 終於吸引到呢位妹妹注意啦~! 當妹妹經過我家門口, 就隔住鐵閘大叫「哥哥呀~哥哥呀~」(OH… 佢叫緊我哋晢晢B呀~! 晢晢已經大個仔, 係哥哥啦~~ ) … 媽媽見狀緊係唔會錯過機會, 拿拿聲開門邀請妹妹入嚟玩啦~!

 

一向鍾意BB o既晢晢, 見有妹妹到訪顯得好興奮~! 即刻拎咗幾本書同玩具招呼妹妹, 又讀書畀妹妹聽~ (哈~! 晢晢似乎喺度展示實力~!

) 不過妹妹第一次入屋, 顯得有點拘謹, 但又不至於抗拒~~ 呢晚玩咗數分鐘妹妹就要返去婆婆家食飯咯~!

 自從呢日之後, 晢晢每晚到屋企門口就會問:「嵐嵐妹妹呢? 食飯呀?」

媽媽話:「係呀, 嵐嵐妹妹食飯呀」, 晢晢就無奈地跟媽媽返入屋…

 

如是者過咗幾日, 妹妹又經過我哋家門, 一見到晢晢就同佢工人姐姐講:「姐姐, 開門呀, 同哥哥玩呀!」

(超強的語言能力!)… 媽媽見妹妹咁熱情, 當然唔會放過佢啦~!

 

晢晢見到媽媽開閘, 即急不及待伸手拖妹妹隻手入屋, 又讓出佢至愛o既單車畀妹妹踩, 又趁人哋唔覺意摸妹妹塊面呵人~~ 好搞笑~!

 

而妹妹今次已經唔再怕生保, 好多嘢講~ 又開始踏出多幾步去玩具架拎玩具玩, 仲不停喺晢晢架單車仔上上落落, 玩到唔捨得走~! 不過佢個工人姐姐話妹妹要趕住返媽咪屋企, 所以一定要走, 妹妹就十萬個唔願意咁畀姐姐夾走~!

 

當媽媽關上鐵閘一刻, 兩個小朋友都好唔捨得對方, 隔住度閘伸手捉對方隻手, 一個係咁叫「妹妹妹妹…」, 另一個就不斷叫「哥哥哥哥…」, 互相bye bye咗成幾分鐘, 姐姐好不容易拖妹妹到lift口, 唔駛幾秒又跑返轉頭同晢晢講「bye bye 哥哥」, 然後又重複以上動作… 場面非常「難捨難離」

,笑到我哋肚痛~!

 

媽媽同妹妹個姐姐講, 下次要預多5分鐘佢哋SAY BYE BYE咯~!