Say SORRY

媽媽一直認為, 教一個小朋友, 要佢識幾多字, 會講幾多國語言都唔及有好品德重要, 所以媽媽好注重晢晢o既德育發展, 至少賞罰分明~!  

當晢晢有壞行為時, 即使晢晢未必聽得明, 但媽媽都會同晢晢講:「xxx係唔啱架, 唔可以咁咁咁, 要xxx先乖架… 」, 之後就會要求晢晢say SORRY… 或者有人會覺得媽媽好多餘, 晢晢都未聽得明仲同佢講咁多!? 但媽媽覺得培養品德係應該從小做起! 總有一日佢會明白o既!  

晢晢仲細時, 仲未知咩係「SORRY」, 每當媽媽要求say SORRY時, 晢晢只會跟口水尾講SORRY, 講完仲會卡卡聲笑, 完全唔係發自內心! 不過隨住晢晢長大, 開始明白「SORRY」就等於「認衰」時, 晢晢又會企硬唔講!  

上星期三, 我哋一家三口出街食晚飯, 晢晢過咗瞓覺時間都未瞓情緒有D高漲, 喺車上同媽媽玩玩下突然出手拍媽媽個頭! 痛, 其實一般, 但唔代表唔駛教!

媽媽:「晢晢, 唔可以打媽媽架! 媽媽痛呀… (下略)…  同媽媽Say Sorry」

晢晢:「嗚嗚嗚…」(未至於喊, 但不停ee鶯鶯表示不滿…)

媽媽「你打媽媽係唔啱丫嘛! 唔講Sorry媽媽嬲你架啦!」

晢晢: 「嗚嗚嗚…」(未喊, 但鶯得大聲咗, 而且雙眼通紅)

媽媽:「仲唔肯講呀, 媽媽唔抱你喇!」(然後作勢交晢晢到爸爸手)

晢晢: 「wei wei wei…」(開始喊喇, 然後抱實媽媽)

之後, 晢晢就細細聲講咗聲「SORRY…」 

媽媽聽到晢晢肯Say SORRY, 就即刻抱實晢晢, 同佢講:「係咯, 咁就乖喇, 媽媽鍚晒~!」(跟手送上香吻一個), 之後全程車晢晢都乖乖伏喺媽媽身上冇扭計…

媽媽唔知道呢個方法啱唔啱!? 但至少感覺到晢晢有DD悔意, 起碼say SORRY後會扮乖… 一陣咁多…

唔知幾時, 媽媽唔駛再花咁多口水, 晢晢都肯主動Say SORRY呢?